ພະຍາດໄຂ້ຍຸງລາຍ ເປັນພະຍາດໜຶ່ງທີ່ອັນຕະລາຍ ຖ້າທຸກຄົນຍັງບໍ່ເອົາໃຈໃສ່ຫັນມາປ້ອງກັນແຕ່ຫົວທີ ໂດຍການປະຕິບັດຫຼັກການ 5 ປ ທີ່ກະຊວງສາທາລະນະສຸກວາງອອກ ກໍອາດຈະເຮັດໃຫ້ພະຍາດນີ້ກັບມາແຜ່ລະບາດຄືດັ່ງປີ 2019 ມີຜູ້ຕິດເຊື້ອພະຍາດໄຂ້ຍຸງລາຍທັງໝົດ 39.091 ຄົນ ໃນນັ້ນ ເສຍຊີວິດ 76 ຄົນ ເມື່ອກ້າວເຂົ້າມາໃນປີ 2020 ໃນໄລຍະ 5 ເດືອນ ມີຄົນເຈັບເສຍຊີວິດຍ້ອນພະຍາດນີ້ເຖິງ 4 ຄົນ.
ທ່ານ ດຣ ຣັຕຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກໄດ້ກ່າວໃນວັນທີ 24 ພຶດສະພາ 2020 ວ່າ: ນັບແຕ່ທ້າຍເດືອນທັນວາ 2019 ມາຮອດວັນທີ 22 ພຶດສະພາ 2020 ມີຜູ້ຕິດເຊື້ອທັງໝົດ 1.337 ຄົນ ເສຍຊີວິດ 4 ຄົນ ໃນນັ້ນຢູ່ນະຄອນຫຼວງວຽງຈັນ 2 ຄົນ ໄຊຍະບູລີ 1 ຄົນ ແລະ ແຂວງຄຳມ່ວນ 1 ຄົນ ເຊິ່ງພະຍາດໄຂ້ຍຸງລາຍຖືວ່າເປັນພະຍາດໜຶ່ງທີ່ມີຄວາມຮຸນແຮງເຊັ່ນກັນກັບພະຍາດລະບາດອື່ນໆ ສະນັ້ນ ຈຶ່ງຂໍເຊີນຊວນພໍ່ແມ່ປະຊາຊົນບັນດາເຜົ່າຈົ່ງໄດ້ເປັນເຈົ້າການໃນການທຳລາຍແຫຼ່ງເພາະພັນຍຸງລາຍ ໂດຍປະຕິບັດຕາມ 5 ປ ທີ່ກະຊວງສາທາລະນະສຸກວາງອອກ ເວລາເຈັບເປັນຕ້ອງໄປພົບແພດໝໍ ຫຼີກລ່ຽງການຊື້ຢາມາກິນເອງ ເພາະອາດເປັນອັນຕະລາຍແກ່ຊີວິດຂອງປະຊາຊົນ.
# ຂ່າວ & ພາບ: ເພັດສະໝອນ