ຈາກການຖະແຫຼງຂ່າວຂອງຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂພະຍາດອັກເສບປອດ ທີ່ເກີດຈາກເຊື້ອຈຸລະໂຣກສາຍພັນໃໝ່ COVID-19 ໃນວັນທີ 25 ພຶດສະພາ 2020 ສປປ ລາວ ຍັງບໍ່ຜູ້ຕິດເຊື້ອເພີ່ມ ຕົວເລກສະສົມຜູ້ທີ່ຕິດເຊື້ອຍັງຢູ່ທີ່ 19 ຄົນ ແລະ ປິ່ນປົວຫາຍດີກັບເຮືອນຈຳນວນ 14 ຄົນ.
ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈຳການຄະນະສະເພາະກິດ ກ່າວວ່າ: ໃນວັນທີ 24 ພຶດສະພາ 2020 ໄດ້ເກັບຕົວຢ່າງມາກວດວິເຄາະທັງໝົດ 308 ຄົນ ໃນນັ້ນ ມີແຮງງານລາວທີ່ກັບມາແຕ່ໄທ 247 ຄົນ ແຮງງານຈີນ 58 ຄົນ ກໍລະນີສົງໄສ 03 ຄົນ ແຮງງານລາວທີ່ກັບມາຈາກປະເທດໄທ 247 ຄົນ ເຊີ່ງມາຈາກທ້ອງຖີ່ນແຕ່ລະແຂວງຄື: ແຂວງຫຼວງພະບາງ 46 ຄົນ ແຂວງຈຳປາສັກ 45 ຄົນ ສາລະວັນ 34 ຄົນ ນະຄອນຫຼວງວຽງຈັນ 31 ຄົນ ຄຳມ່ວນ 17 ຄົນ ສະຫວັນນະເຂດ 14 ຄົນ ຫຼວງນ້ຳທາ 13 ຄົນ ບໍລິຄຳໄຊ 12 ຄົນ ຜົ້ງສາລີ 10 ຄົນ ວຽງຈັນ 08 ຄົນ ໄຊຍະບູລີ 06 ຄົນ ອຸດົມໄຊ 04 ຄົນ ຫົວພັນ 04 ຄົນ ບໍ່ແກ້ວ 02 ຄົນ ແລະ ແຂວງຊຽງຂວາງ 01 ຄົນ ຜົນກວດແຮງງານລາວ ແຮງງານຈີນ ແລະ ກໍລະນີສົງໄສທັງໝົດທີ່ກວດ ແມ່ນບໍ່ພົບເຊື້ອ ໝາຍຄວາມວ່າໃນວັນທີ 24 ພຶດສະພາ 2020 ບໍ່ມີຜູ້ຕິດເຊື້ອໃໝ່.
ສັງລວມການກວດວິເຄາະແຕ່ເດືອນມັງກອນ ຮອດວັນທີ 24 ພຶດສະພາ 2020 ໄດ້ເກັບຕົວຢ່າງມາກວດທັງໝົດມີ 5.795 ຕົວຢ່າງ ກວດພົບເຊື້ອສະສົມ 19 ຄົນ (43 ມື້ແລ້ວທີ່ບໍ່ພົບຜູ້ຕິດເຊື້ອໃໝ່). ປັດຈຸບັນ ມີຜູ້ນອນຕິດຕາມຢູ່ໂຮງໝໍມິດຕະພາບ 05 ຄົນ ຍີງ 04 ຄົນ ທັງໝົດເຫັນວ່າມີອາການປົກກະຕິ ຈະໄດ້ສືບຕໍ່ຕິດຕາມຕໍ່ໄປຈົນກວ່າຈະກວດຫາເຊື້ອບໍ່ພົບ.
# ຂ່າວ & ພາບ: ຊິລິການດາ