ທ່ານ ວິເສດ ສະແຫວງສຶກສາ ນັກຂຽນ ນັກປະພັນ ໄດ້ນຳຜົນງານໂຮມເລື່ອງສັ້ນຄັດຈ້ອນຢ້ອນຫຼັງໃນຊຸດ ລາຕີລ້ານແສງ ຈຳນວນ 2.500 ເຫຼັ້ມ ໃຫ້ແກ່ຫໍສະໝຸດແຫ່ງຊາດ ເພື່ອນຳໄປແຈກຢາຍໃຫ້ບັນດາ ແຂວງຢ່າງທົ່ວເຖິງ ແນໃສ່ປະກອບສ່ວນໃນການສົ່ງເສີມການອ່ານ.
ທ່ານ ວິເສດ ສະແຫວງສຶກສາ ກ່າວວ່າ: ໂຮມເລື່ອງສັ້ນ “ລາຕີລ້ານແສງ” ທີ່ນຳມາມອບເທື່ອນີ້ ເປັນການໂຮມເລື່ອງສັ້ນທີ່ຂ້າພະເຈົ້າໄດ້ເລີ່ມຕີພິມແຕ່ປີ 1982 ຈົນເຖິງຊຸມປີ 2002 ເຫດຜົນຂອງການໂຮມເລື່ອງສັ້ນຊຸດນີ້ ເນື່ອງຈາກເຫັນໄດ້ວ່າມີຄວາມຈຳເປັນ ເພື່ອແນໃສ່ຊຸກຍູ້ ສົ່ງເສີມການອ່ານ ໃຫ້ທົ່ວສັງຄົມລາວ ເພາະໃນໄລຍະຜ່ານມາ ເຄີຍໄດ້ຍິນສຽງວິພາກວີຈານກ່ຽວກັບຄົນລາວບໍ່ມັກອ່ານ ດັ່ງນັ້ນ ການມອບປື້ມໃນເທື່ອນີ້ ຈະປະກອບສ່ວນສຳຄັນໃນການສົ່ງເສີມການອ່ານຂອງຄົນລາວ.
ທ່ານ ນາງ ຂັນທະມາລີ ຍັງນຸວົງ ອຳນວຍການຫໍສະໝຸດແຫ່ງຊາດ ໄດ້ສະແດງຄວາມຂອບໃຈຕໍ່ກັບການປະກອບສ່ວນໃນການສົ່ງເສີມການອ່ານ ເຊິ່ງປື້ມຈຳນວນ 2.500 ເຫຼັ້ມ ມູນຄ່າ 87,5 ລ້ານກີບ ຈະໄດ້ເກັບໄວ້ຢູ່ຫໍສະໝຸດແຫ່ງຊາດສ່ວນໜຶ່ງ ແລະ ຈະໄດ້ສົ່ງເຖິງບັນດາແຂວງ ເພື່ອໃຫ້ສອດຄ່ອງກັບເຈຕະນາລົມຂອງ ທ່ານ ວິເສດ ສະແຫວງສຶກສາ ເຮັດໃຫ້ທຸກຄົນສາມາດເຂົ້າເຖິງ ກໍຄືສາມາດອ່ານ ແລະ ຕິດຕາມຜົນງານຂອງເພິ່ນໄດ້.
ປື້ມໂຮມເລື່ອງສັ້ນຄັດຈ້ອນຢ້ອນຫຼັງ ຊຸດ “ລາຕີລ້ານແສງ” ແມ່ນເປັນການໂຮມເອົາຜົນງານໃນອະດີດຂອງທ່ານ ວິເສດ ສະແຫວງສຶກສາ ຈາກປື້ມໂຮມເລື່ອງສັ້ນ 4 ຊຸດຂອງເພິ່ນ ຄື ປື້ມ “ດອງສອງຊັ້ນ” ຈັດພິມໃນປີ 1985 ປື້ມ “ລຳເຊສະອຶ້ນ” ພິມປີ 1995 ປື້ມ “ນົກອ້ຽງຂີ້ຕາຄວາຍ” ພິມໃນປີ 2000 ແລະ ປື້ມ “ອຸບັດຫ້ຽມ” ທີ່ພິມໃນປີ 2003 ເຊິ່ງເລື່ອງສັ້ນທີ່ຄັດຈ້ອນທັງ 13 ເລື່ອງໃນປື້ມ ລາຕີລ້ານແສງ ນີ້ ຂຽນຂຶ້ນລະຫວ່າງປີ 1982-2002 ເຊິ່ງຜູ້ຂຽນບອກວ່າເປັນລະດູບານໃໝ່ ໃນການຜະລິດເລື່ອງສັ້ນຂອງເພິ່ນ.
ສຳລັບພິທີມອບປື້ມຈຳນວນດັ່ງກ່າວ ມີຂຶ້ນວັນທີ 31 ພຶດສະພາ 2022 ທີ່ຫໍສະໝຸດແຫ່ງຊາດ ກ່າວ ມອບໂດຍ ທ່ານ ວິເສດ ສະແຫວງສຶກສາ ແລະ ກ່າວຮັບໂດຍ ທ່ານນາງ ຂັນທະມາລີ ຍັງນຸວົງ ເຊິ່ງມີບັນດານັກຂຽນ ນັກປະພັນ ພ້ອມພາກສ່ວນກ່ຽວຂ້ອງເຂົ້າຮ່ວມ.
# ຂ່າວ – ພາບ : ສຸລິໂຍ