ການປູກຜັກປອດສານພິດຂາຍ ສາມາດສ້າງລາຍຮັບເຂົ້າສູ່ຄອບຄົວ ພ້ອມທັງເຮັດໃຫ້ສຸຂະພາບຂອງຜູ້ປູກ ແລະ ຜູ້ບໍລິໂພກແຂງແຮງ ດັ່ງຄອບຄົວທ່ານນາງ ເລັກ ພົມມະໄລທອງ ບ້ານໂນນແຕ້ ເມືອງໄຊທານີ ນະຄອນຫຼວງວຽງຈັນ ທີ່ຍຶດຖືອາຊີບປູກຜັກປອດສານພິດຂາຍ ສາມາດມາດສ້າງລາຍຮັບເຂົ້າສູ່ຄອບຄົວ 4 ລ້ານກີບຕໍ່ເດືອນ.
ທ່ານນາງ ເລັກ ພົມມະໄລທອງ ໃຫ້ສຳພາດເມື່ອບໍ່ດົນມານີ້ວ່າ: ເພື່ອນຳໃຊ້ເນື້ອທີ່ດິນຂອງຕົນເອງ ໃຫ້ເກີດຜົນປະໂຫຍດ ຈຶ່ງໄດ້ຫັນມາປູກຜັກປອດສານພິດຂາຍເປັນເວລາຫຼາຍປີແລ້ວ ໂດຍເບື້ອງຕົ້ນປູກເນື້ອທີ 2 ໄລ່ ປະກອບມີຜັກກາດ ຜັກສະຫຼັດ ຫອມບົ່ວ ຫອມປ້ອມ ເຊເລີລີ ແລະ ອື່ນໆ ພາຍຫຼັງຕະ ຫຼາດມີຄວາມຕ້ອງການສູງ ຕົນຈຶ່ງຂະຫຍາຍເນື້ອທີ່ອອກຕື່ມອີກ ປັດຈຸບັນມີເນື້ອທີ່ປູກ 5 ໄລ່ ໃນນີ້ໄດ້ປູກໝາກໄມ້ໃຫ້ໝາກ ແລະ ຜັກໃຫ້ຫົວ ຄື: ບັອກຄໍລີ້ ໝາກແຕງ ໝາກຖົ່ວ ແລະ ຫົວກາລົດ ຜົນຜະລິດດັ່ງກ່າວແມ່ນນຳມາຈຳໜ່າຍເອງວັນເສົາ ແລະ ວັນພຸດຂອງທຸກອາທິດ ຢູ່ຕະຫຼາດຜັກປອດສານພິດສູນການຄ້າລາວ-ໄອເຕັກ ນະຄອນຫຼວງວຽງຈັນ ໃນນີ້ ປະເພດຜັກໃຫ້ໃບ ລາຄາ 10.000-15.000 ກີບຕໍ່ກິໂລ ແລະ ປະເພດໃຫ້ຫົວ ໃຫ້ໝາກ ຂາຍລາຄາ 15.000-25.000 ກີບຕໍ່ກິໂລ.
ສຳລັບການປູກຜັກປອດສານພິດ ປັດຈຸບັນແມ່ນພົບຄວາມຫຍຸ້ງຍາກ ຍ້ອນອາກາດຮ້ອນອົບເອົ້າ ນ້ຳຫົດບໍ່ພຽງພໍ ເຮັດໃຫ້ຜັກຂະຫຍາຍໂຕຊ້າ ຕ້ອງໄດ້ໃຊ້ຕົ້ນທຶນເພີ່ມຂຶ້ນ.
# ຂ່າວ & ພາບ: ຂັນທະວີ