ການສຶກສາເປັນວຽກງານໜຶ່ງທີ່ຄວາມສຳຄັນ ໃນການພັດທະນາຊັບພະຍາກອນມະນຸດ ໃຫ້ມີຄວາມຮູ້ ຄວາມສາມາດ ສະນັ້ນ ພັກ-ລັດ ກໍຄືຂະແໜງການກ່ຽວຂ້ອງ ໄດ້ສຸມໃສ່ປັບປຸງວຽກງານດັ່ງກ່າວ ໃຫ້ສອດຄ່ອງກັບການພັດທະນາແຕ່ລະໄລຍະເຊັ່ນ ປັບປຸງຄວາມຮູ້ທາງດ້ານເນື້ອໃນຂອງບົດສອນ ແລະ ທັກສະທາງດ້ານການນິເທດຂອງຄູສອນຊັ້ນປະຖົມສຶກສາ ໂດຍໃຫ້ບູລິມະສິດໃນການຈັດສັນງົບປະມານໃສ່ຂະແໜງການຍ່ອຍປະຖົມສຶກສາ ປັບປຸງຜົນການຮຽນຂອງນັກຮຽນ ໂດຍສະເພາະ ທັກສະການອ່ານອອກຂຽນໄດ້ ແລະ ການຄິດໄລ່ພື້ນຖານຢູ່ຊັ້ນປະຖົມສຶກສາ ເຮັດໃຫ້ຜູ້ທີ່ຈະຮຽນຕໍ່ລະດັບມັດທະຍົມມີຄວາມຮູ້ ແລະ ທັກສະທີ່ເໝາະສົມ ກຳນົດວິທີການທີ່ເປັນໄປໄດ້ດ້ານການເງິນ ໃຫ້ສອດຄ່ອງກັບຕົວຈິງໃນການຂະຫຍາຍການສຶກສາຊັ້ນມັດທະຍົມຕອນຕົ້ນ ໃນເຂດຫ່າງໄກສອກຫຼີກ ຫຼຸດຜ່ອນຄວາມແຕກໂຕນທາງດ້ານຜົນການຮຽນຂອງນັກຮຽນ ໂດຍຜ່ານການຄຸ້ມຄອງຊັບພະຍາກອນຢ່າງມີປະສິດທິພາບ ໂດຍສະເພາະ 40 ເມືອງເປົ້າໝາຍ ສ້າງຄວາມກົມກຽວຄືນໃໝ່ລະຫວ່າງທັກສະ ແລະ ຄວາມສາມາດຂອງພະນັກງານ ຜູ້ບໍລິຫານການສຶກສາ ແລະ ກີລາພາຍໃນກະຊວງ ເພື່ອໃຫ້ໄດ້ຕາມຄວາມຕ້ອງການຂອງວຽກງານໃນປັດຈຸບັນ ແລະ ອະນາຄົດເອົາໃຈໃສ່.
ສ້າງຄວາມເຂັ້ມແຂງໃຫ້ແກ່ຂະແໜງການສຶກສາຂັ້ນແຂວງ ແລະ ຂັ້ນເມືອງ ກຸ່ມໂຮງຮຽນ ແລະ ໂຮງຮຽນເພື່ອເສີມຂະຫຍາຍປະສິດທິພາບປະສິດທິຜົນ ຄວາມຮັບຜິດຊອບໂດຍໃຫ້ມີຄວາມສອດຄ່ອງລະຫວ່າງໜ້າທີ່ ແລະ ພາລະບົດບາດ ຄວາມຮັບຜິດຊອບ ສ້າງຄວາມຊັດເຈນໃຫ້ແກ່ໜ້າວຽກໃນຕຳແໜ່ງງານ ສ້າງລະບົບໃນການສະໜອງ ຈັດສັນຊັບຊ້ອນຊັບພະຍາກອນມະນຸດ ແລະ ການເງິນອີງຕາມຄວາມຕ້ອງການຕົວຈິງ ສະໜອງການສຶກສາຫຼັງຂັ້ນພື້ນຖານທີ່ດີເພື່ອປະກອບສ່ວນ ສະໜັບສະໜູນບັນດາບູລິມະສິດຂອງແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ 9 ເສີມຂະຫຍາຍກີລາກາຍະກຳຂອງລາວກ້າວສູ່ມາດຕະຖານພາກພື້ນ ແລະ ສາກົນ ເຮັດໃຫ້ຂະແໜງການສຶກສາ ແລະ ກີລາມີໂຄງສ້າງ ມີການຄຸ້ມຄອງ ແລະ ການຈັດສັນຊັບພະຍາກອນຢ່າງເໝາະສົມ ເພື່ອສ້າງໂອກາດໃຫ້ພົນລະເມືອງລາວທຸກຄົນ ໄດ້ເຂົ້າເຖິງການສຶກສາທີ່ມີຄຸນະພາບຢ່າງເທົ່າທຽມກັນ ປະກອບສ່ວນໃຫ້ບັນລຸເປົ້າໝາຍການພັດທະນາແບບຍືນຍົງ ສຳລັບວຽກງານການສຶກສາ (SDG-4).
ພາຍຫຼັງທີ່ມີການປັບປຸງບັນດາຂະແໜງການຕ່າງໆແລ້ວ ຈະເຮັດໃຫ້ພົນລະເມືອງລາວທຸກຄົນມີການສຶກສາ ມີຄວາມຮູ້ດ້ານວິຊາການ ແລະ ມີທັກສະທີ່ເໝາະເພື່ອພັດທະນາຄວາມສາມາດຂອງຕົນ ໃນດ້ານການປະກອບສ່ວນ ເດັກນ້ອຍໄວໜຸ່ມມີທັກສະທີ່ດີດ້ານການສຶກສາ ອັດຕາການເຂົ້າຮຽນໃນລະດັບມະຫາວິທະຍາໄລໃນຂະແໜງການທົ່ວໄປ ແລະ ຂະແໜງວິຊາສະເພາະເພີ່ມຂຶ້ນ ການເຂົ້າການສຶກສາກ່ອນໄວຮຽນເພີ່ມຂຶ້ນ ອັດຕາການເຂົ້າຮຽນໃໝ່ ແລະ ອັດຕາເລື່ອນຂັ້ນໃນແຕ່ລະຊັ້ນເພີ່ມຂຶ້ນ ອັດຕາຈົບຊັ້ນໃນແຕ່ລະຊັ້ນໄດ້ຮັບການປັບປຸງ ຄວາມແຕກໂຕນທາງດ້ານຜົນການຮຽນລະຫວ່າງເຂດທີ່ດ້ອຍໂອກາດດີຂຶ້ນ ຫຼັກສູດສ້າງຄູຊັ້ນອະນຸບານ ແລະ ຊັ້ນປະຖົມໄດ້ຮັບການທົບທວນຄືນ ເພື່ອໃຫ້ສອດຄ່ອງກັບຫຼັກສູດການຮຽນ-ການສອນໃໝ່ ສ້າງຫຼັກສູດເຝິກອົບຮົມຄູປະຈຳການຊັ້ນອະນຸບານ ປະຖົມ ໄດ້ຮັບການທົບທວນຄືນໃຫ້ສອດຄ່ອງກັບການຮຽນ-ການສອນໃໝ່ ພ້ອມທັງສະໜອງໃຫ້ແກ່ຄູສອນຊັ້ນອະນຸບານ ແລະ ປະຖົມທົ່ວປະເທດ ຮັບປະກັນຄວາມຕໍ່ເນື່ອງລະຫວ່າງຫຼັກສູດຊັ້ນປະຖົມສຶກສາ ແລະ ມັດທະຍົມ ການຈັດສັນຄູໃຫ້ສອດຄ່ອງກັບຄວາມຕ້ອງການຂອງໂຮງຮຽນຫຼາຍຂຶ້ນ ເພື່ອຫຼຸດຜ່ອນຄວາມແຕກໂຕນ ແລະ ສາມາດເຊື່ອມໂຍງກັບມາດຕະຖານຄຸນນະພາບຂັ້ນພື້ນຖານ ຄຸນນະພາບຂອງຄູສອນ ໃນສະຖາບັນອາຊີວະສຶກສາ ແລະ ເຝິກອົບຮົມວິຊາຊີບໄດ້ຮັບການປັບປຸງດີຂຶ້ນ ແລະ ອື່ນໆ.