ໃນໄລຍະຜ່ານມາ ກໍມີຫຼາຍໆຫາງສຽງຈາກສັງຄົມ ຕໍ່ກັບການປະຕິບັດງານຂອງເຈົ້າໜ້າທີ່ຕຳຫຼວດຈະລາຈອນໄປຕ່າງໆນາໆ ດັ່ງນັ້ນ ຄໍລຳຈະລາຈອນມື້ນີ້ ຂໍນຳສະເໜີ ສິດ-ໜ້າທີ່ຂອງຕຳຫຼວດຈະລາຈອນ ແລະ ຕຳຫຼວດທາງຫຼວງ ທີ່ໄດ້ກຳນົດໄວ້ໃນກົດໝາຍວ່າດ້ວຍຈະລາຈອນທາງບົກ ມາໃຫ້ບັນດາເພື່ອນຜູ້ອ່ານໄດ້ຮັບຊາບ ແລະ ເຂົ້າໃຈຢ່າງຈະແຈ້ງນຳກັນ.
ໃນມາດຕາ 28 ຂອງກົດໝາຍວ່າດ້ວຍການຈະລາຈອນທາງບົກ ທີ່ກຳນົດເຖິງສິດ-ໜ້າທີ່ຂອງຕຳຫຼວດຈະລາຈອນ ແລະ ຕຳຫຼວດທາງຫຼວງ ໄດ້ລະບຸລະອຽດດັ່ງນີ້:
1. ອຳນວຍຄວາມສະດວກ ຄວບຄຸມການຈະລາຈອນ ແລະ ການເຄົາລົບລະບຽບກົດໝາຍການຈະລາຈອນທາງບົກ ແລະ ລະບຽບກົດໝາຍອື່ນໆທີ່ກ່ຽວຂ້ອງ.
2. ກວດກາສະພາບຜູ້ຂັບຂີ່ ເອກະສານຂອງຜູ້ຂັບຂີ່ ແລະ ເອກະສານຂອງຍານພາຫະນະ ກວດກາທາດເຫຼົ້າໃນລົມຫາຍໃຈຂອງຜູ້ຂັບຂີ່ ແລະ ຄວາມໄວຂອງຍານພາຫະນະທຸກຊະນິດ.
3. ສຶກສາອົບຮົມ ປັບໃໝ ແລະ ດຳເນີນຄະດີຕໍ່ຜູ້ລະເມີດລະບຽບກົດໝາຍ.
4. ກັກຕົວຜູ້ລະເມີດ ພ້ອມຍານພາຫະນະທີ່ກໍ່ໃຫ້ເກີດອຸບັດເຫດ ແລ້ວພາໃຫ້ຄົນເສຍຊີວິດ ບາດເຈັບສາຫັດ ຫຼື ເກີດອຸບັດເຫດແລ້ວຕົນເອງຫຼົບໜີ.
5. ກັກຍານພາຫະນະທີ່ບໍ່ມີປະກັນໄພ ໃນກໍລະນີທີ່ເກີດອຸບັດເຫດທີ່ພາໃຫ້ມີຄົນເຈັບ ແລະ ຄູ່ກໍລະນີທີ່ບໍ່ສາມາດຕົກລົງກັນໄດ້ ກ່ຽວກັບຄວາມຮັບຜິດຊອບຕໍ່ຄວາມເສຍຫາຍ.
6. ຍົກ ລັອກລໍ້ ຍານພາຫະນະທີ່ຈອດບໍ່ຖືກຕ້ອງ ແລະ ກີດຂວາງການສັນຈອນ.
7. ກວດຄວັນດຳ ຄວັນຂາວ ສຽງດັງຂອງຍານພາຫະນະ.
8. ປົກປັກຮັກສາຍານພາຫະນະທີ່ຖືກກັກ ພ້ອມດ້ວຍອຸປະກອນໃຫ້ດີ.
9. ເກັບກຳຂໍ້ມູນ ຕິດຕາມຜູ້ລະເມີດກົດຈະລາຈອນຕາມເສັ້ນທາງ ແລະ ແຈ້ງເຫດການໃຫ້ເຈົ້າໜ້າທີ່ໜ່ວຍປະຕິບັດການ.
10. ລົງຊັນນະສູດ ບັນທຶກເຫດການ ຖ່າຍຮູບ ແລະ ແຕ້ມແຜນວາດດຽວໃຫ້ລະອຽດ ຊັດເຈນ ຄົບຖ້ວນ ກ່ຽວກັບສະຖານທີ່ເກີດເຫດ ລວມທັງສືບສວນ-ສອບສວນຜູ້ກ່ຽວຂ້ອງ ແລະ ຍານພາຫະນະທີ່ຢູ່ໃນເຫດການຢ່າງທັນການ.
11. ປະຕິບັດສິດ-ໜ້າທີ່ອື່ນໆຕາມລະບຽບກົດໝາຍ.
ສຳລັບຕຳຫຼວດທາງຫຼວງ ຍັງມີສິດ ແລະ ໜ້າທີ່ໃຫ້ຄວາມຮ່ວມມື ປະສານສົມທົບກັບເຈົ້າໜ້າທີ່ໂຍທາທິການ ແລະ ຂົນສົ່ງ ໃນການກວດກາການຂົນສົ່ງທາງບົກຕາມເສັ້ນທາງຫຼວງອີກດ້ວຍ.
ທັງໝົດທີ່ກ່າວມານັ້ນ ກໍເພື່ອ ໃຫ້ບັນດາທ່ານຜູ້ອ່ານໄດ້ຮັບຮູ້ ແລະ ເຂົ້າໃຈຢ່າງຈະແຈ້ງ ແລະ ກໍພ້ອມໃຫ້ການຮ່ວມມືເພື່ອເຮັດໃຫ້ ການປະຕິບັດວຽກງານຂອງເຂົາ ເຈົ້າໜ້າທີ່ ກໍຄື ການເປັນເຈົ້າການ ໃນການປະຕິບັດຕາມລະບຽບການ ສຳລັບຜູ້ຂັບຂີ່ ທີ່ໄດ້ລະບຸໄວ້ໃນ ມາດຕາ 12 ຂອງກົດໝາຍສະບັບ ດຽວກັນ ຫຼື ເວົ້າໄດ້ວ່າ ຕ່າງຝ່າຍ ຕ່າງປະຕິບັດໜ້າທີ່ ພັນທະຂອງຕົນ ດ້ວຍຄວາມເປັນເຈົ້າການ ເພື່ອ ເຮັດໃຫ້ການສັນຈອນມີຄວາມເປັນ ລະບຽບຮຽບຮ້ອຍ.