ຄົນຕ່າງປະເທດ ຄົນຕ່າງດ້າວ ຫຼື ຄົນບໍ່ມີສັນຊາດຜູ້ໃດ ຫາກໄດ້ເຄື່ອນໄຫວເກັບກຳຂ່າວ ຂໍ້ມູນ ວັດຖຸ ດຳເນີນງານ ຫຼື ເອກະສານທາງຄອມພິວເຕີ ຫຼື ເອກະສານກ່ຽວກັບຄວາມລັບຂອງລັດ ຫຼື ຄວາມລັບທາງລັດຖະການ ເພື່ອກໍ່ຄວາມເສຍຫາຍ ຫຼື ມ້າງເພ ສາທາລະນະລັດ ປະຊາທິປະໄຕ ປະຊາຊົນລາວ ຈະຖືກລົງໂທດຕັດອິດສະຫຼະພາບແຕ່ສິບປີ ຫາ ຊາວປີ ແລະ ຈະຖືກປັບໃໝແຕ່ 5.000.000 ກີບຫາ 300.000.000 ກີບ ອາດຈະຖືກຮິບຊັບ ຖືກຈຳກັດທີ່ຢູ່ ຫຼື ຖືກເນລະເທດ ຫຼື ຖືກຕັດອິດສະຫຼະພາບຕະຫຼອດຊີວິດ ແລະ ຈະຖືກປັບໃໝແຕ່ 30.000.000 ກີບຫາ 400.000.000 ກີບ ຫຼື ປະຫານຊີວິດ.
ບຸກຄົນໃດ ຫາກໄດ້ເຄື່ອນໄຫວເກັບກຳຂ່າວ ຂໍ້ມູນ ວັດຖຸ ການດຳເນີນງານ ຫຼື ເອກະສານທາງຄອມພິວເຕີ ຫຼື ເອກະສານກ່ຽວກັບຄວາມລັບຂອງລັດ ຫຼື ຄວາມລັບທາງລັດຖະການ ສົ່ງໃຫ້ພວກທໍລະຍົດ ຫຼື ກະບົດຕໍ່ຊາດ ເພື່ອມ້າງເພ ສປປ ລາວ ຈະຖືກລົງໂທດຕັດອິດສະຫຼະພາບແຕ່ ຫ້າປີ ຫາ ສິບປີ ແລະ ຈະຖືກປັບໃໝແຕ່ 5.000.000 ກີບຫາ 200.000.000 ກີບ ອາດຈະຖືກຮິບຊັບ ແລະ ອາດຈະຖືກຈຳກັດທີ່ຢູ່.
ພົນລະເມືອງລາວຜູ້ໃດ ຫາກໄດ້ເຄື່ອນໄຫວເກັບກຳຂ່າວ ຂໍ້ມູນ ວັດຖຸ ການດຳເນີນງານ ຫຼື ເອກະສານທາງຄອມພິວເຕີ ຫຼື ເອກະສານກ່ຽວກັບຄວາມລັບຂອງລັດ ຫຼື ຄວາມລັບທາງລັດຖະການ ສົ່ງໃຫ້ຄົນຕ່າງປະເທດ ຫຼື ອົງການຈັດຕັ້ງຕ່າງປະເທດ ເພື່ອໃຊ້ເປັນຂໍ້ມູນກໍ່ຄວາມເສຍຫາຍ ຫຼື ມ້າງເພ ສປປ ລາວ ຈະຖືວ່າໄດ້ກະທຳຜິດໃນສະຖານທໍລະຍົດຕໍ່ຊາດ ແລະ ຈະຖືກລົງໂທດຕາມາດຕາ 110 ຂອງປະມວນກົດໝາຍອາຍາ.
ການກະກຽມໃຫ້ແກ່ການກະທຳຜິດ (ໄດ້ມີການວາງແຜນການ ຫ້າງຫາອຸປະກອນ ໄດ້ເກັບກຳເອກະສານທີ່ເປັນຄວາມລັບຂອງລັດ) ຄວາມພະຍາຍາມກໍ່ການກະທຳຜິດ (ໄດ້ມີການເຄື່ອນໄຫວ ໄດ້ມີການລົງມືກະທຳຜິດສ່ວນໃດສ່ວນໜຶ່ງແລ້ວ ແຕ່ຫາກມີເຫດການອື່ນມາຂັດຂວາງອາດຈະເນື່ອງຈາກສະພາບອຸປະກອນບໍ່ອຳນວຍ ມີຄົນມາພົບເຫັນ ຫຼື ມີຄົນມາສະກັດກັ້ນເຮັດໃຫ້ການເກັບກຳຂ່າວ ການສົ່ງຂໍ້ມູນຂ່າວສານ ການດຳເນີນງານຂອງຜູ້ກ່ຽວຢຸດສະຫງັກລົງ) ຊຶ່ງການກະທຳເຊັ່ນນີ້ກໍຈະຖືກລົງໂທດເຊັ່ນດຽວກັນ.