ທ່ານ ຫຼ້າສາຍ ນວນທາສິງ ຫົວໜ້າພະແນກກະສິກຳ ແລະ ປ່າໄມ້ນະຄອນຫຼວງວຽງຈັນ (ນວ) ໃຫ້ສຳພາດວັນທີ 21 ພຶດສະພາ 2020 ວ່າ: ສຳລັບຂະບວນການປູກຕົ້ນໄມ້ປີນີ້ ຈະດຳເນີນຢູ່ 2 ຂັ້ນຕອນຄື ປູກຕາມແຜນການສ້າງນະຄອນສີຂຽວ ແລະ ປູກເພື່ອສະເຫຼີມສະຫຼອງວັນເດັກນ້ອຍສາກົນ ທີ 1 ມິຖຸນາ ເຊິ່ງຈະຈັດຕັ້ງປະຕິບັດຢູ່ຫຼາຍຈຸດໃນ 9 ຕົວເມືອງ ໂດຍສົມທົບກັບຜູ້ປະກອບການ ເຊິ່ງຈະເລີ່ມປະຕິບັດແຕ່ທ້າຍເດືອນນີ້ເປັນຕົ້ນໄປ.
ເບ້ຍໄມ້ທີ່ຈະນຳມາປູກ ປະກອບມີ ໄມ້ອຸດສາຫະກຳ ຕົ້ນໄມ້ປະດັບ ຕົ້ນໄມ້ໃຫ້ຄວາມຮົ່ມເຢັນ ເຊິ່ງຈະປູກຕາມເສັ້ນທາງຕ່າງໆທີ່ມີຄວາມຍາວ 8,5 ກິໂລແມັດ ມີເບ້ຍໄມ້ 5.390 ເບ້ຍ ສວນສາທາລະນະສີຂຽວ ເນື້ອທີ່ 2,5 ເຮັກຕາ ມີເບ້ຍໄມ້ 1.650 ເບ້ຍ ສຳນັກງານ ຫ້ອງການ ໂຮງແຮມ ໂຮງຮຽນ ວັດສີຂຽວ 4 ເຮັກຕາ ມີເບ້ຍໄມ້ 2.000 ເບ້ຍ ການປົກປັກຮັກສາປ່າທຳມະຊາດ ປ່າສະຫງວນ ປ່າປ້ອງກັນ ແລະ ການປູກໄມ້ເປັນສິນຄ້າ ເນື້ອທີ່ 148 ເຮັກຕາ ມີເບ້ຍໄມ້ 14.000 ເບ້ຍ ການພັດທະນາໂຮງຈັກໂຮງງານສີຂຽວ ເນື້ອທີ່ 13 ເຮັກຕາ ມີເບ້ຍໄມ້ 13.000 ເບ້ຍ ແລະ ປູກໃນພິທີປູກຕົ້ນໄມ້ແຫ່ງຊາດ ຢູ່ໃນ 9 ຕົວເມືອງມີເນື້ອທີ່ທັງໝົດ 19 ເຮັກຕາ ຕາມເສັ້ນທາງ 5,5 ກິໂລແມັດ ລວມເບ້ຍໄມ້ທັງໝົດ 13.000 ກວ່າເບ້ຍ.
ພ້ອມດຽວກັນນີ້ ກໍໄດ້ປຸກລະດົມຜູ້ປະກອບການ ໂດຍສະເພາະແມ່ນບັນດາໂຮງງານປຸງແຕ່ງໄມ້ ແລະ ຊາວກະສິກອນ ປູກຕົ້ນໄມ້ເພື່ອເປັນສິນຄ້າ ເປັນຕົ້ນແມ່ນ ໄມ້ຕິ້ວ ໄມ້ປ່ອງ ໄມ້ອຸດສາຫະກຳ ເພື່ອຮັບໃຊ້ພາຍໃນ ແລະ ສົ່ງອອກຕ່າງປະເທດ ຕາມທິດທາງຂອງລັດຖະບານໃຫ້ໄດ້ 200 ເຮັກຕາ.
# ຂ່າວ & ພາບ: ອົ່ນ ໄຟສົນທອງ