ພາຍຫຼັງທີ່ລັດຖະບານໄດ້ອອກແຈ້ງການ ສະບັບເລກທີ 580/ຫສນຍ ເລື່ອງການສືບຕໍ່ປະຕິບັດບັນດາມາດຕະການຜ່ອນຜັນ ແລະ ມາດຕະການປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໃນໄລຍະວັນທີ 18 ພຶດສະພາ-1 ມິຖຸນາ 2020 ບັນດາອົງການຈັດຕັ້ງທຸກພາກສ່ວນ ໄດ້ເຄື່ອນໄຫວດຳເນີນກິດຈະການຢ່າງເປັນປົກກະຕິ ໂດຍສະເພາະສະຖານີຂົນສົ່ງລົດໂດຍສານສາຍໃຕ້-ສາຍຕ່າງປະເທດ ໄດ້ກັບມາໃຫ້ບໍລິການປະຊາຊົນ ພ້ອມທັງສືບຕໍ່ປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ ເປັນຕົ້ນການຄັດແຍກຜູ້ທີ່ຈະເດີນທາງ ໃຫ້ໃສ່ຜ້າປິດປາກ ການຮັກສາໄລຍະຫ່າງຂອງຜູ້ທີ່ຈະເດີນທາງ ແລະ ອື່ນໆ ເພື່ອຮັບປະກັນບໍ່ໃຫ້ມີແຜ່ລະບາດຂອງພະຍາດໂຄວິດ-19 ເພີ່ມຂຶ້ນ.
ທ່ານ ນາງ ຫຼ້າ ສຸວັນນະໂຊກ ພະນັກງານຈຸດຄັດແຍກ ສະຖານີຂົນສົ່ງລົດໂດຍສານສາຍໃຕ້-ສາຍຕ່າງປະເທດ ໃຫ້ສຳພາດວັນທີ 22 ພຶດສະພາ 2020 ວ່າ: ນັບແຕ່ໄດ້ເລີ່ມທົດລອງເປີດໃຫ້ບໍລິການຂົນສົ່ງ ສະເພາະໂດຍສານພາຍໃນປະເທດວັນທີ 18 ພຶດສະພາ 2020 ເປັນຕົ້ນມາ ສະຖານີຂົນສົ່ງລົດໂດຍສານສາຍໃຕ້ ກໍໄດ້ປະຕິບັດຕາມມາດຕະການປ້ອງກັນພະຍາດໂຄວິດ-19 ຂອງລັດຖະບານຢ່າງເຂັ້ມງວດ ໂດຍສະເພາະ ການປະຕິບັດຕໍ່ຜູ້ໂດຍສານທຸກຄົນທີ່ມາໃຊ້ບໍລິການພະນັກງານຂອງສະຖານີຈະໄດ້ມີການກວດວັດແທກອຸນຫະພູມຜູ້ໂດຍສານ ລວມທັງໂຊເຟີລົດ ແອັດລົດ ແລະ ທຸກຄົນກ່ອນອອກເດີນທາງແຕ່ລະຄັ້ງ ຖ້າຫາກຄົນໃດມີອາການໄຂ້ ພວກເຮົາຈະບໍ່ໃຫ້ຂຶ້ນລົດເດີນທາງ ພ້ອມທັງແນະນຳວິທີການປ້ອງກັນການຮັກສາໄລຍະຫ່າງ 1 ແມັດຂຶ້ນໄປ ໂດຍມີການເວັ້ນຕັ່ງນັ່ງ ຕາມຈຸດນັ່ງລໍຖ້າຊື້ປີ້ລົດ ທີ່ມີການຂຽນຫ້າມນັ່ງໄວ້ໃຫ້ຜູ້ໂດຍສານປະຕິບັດ ແລະ ໃຫ້ທຸກຄົນໃສ່ຜ້າອັດປາກ-ອັດດັງ ໃຊ້ເຈວລ້າງມື ຖ້າຫາກບໍ່ມີຜ້າປິດປາກ ພວກເຮົາກໍມີໄວ້ໃຫ້ບໍລິການ ໂດຍສະເພາະຜູ້ທຸກຍາກຂາດເຂີນຈະບໍ່ໄດ້ເສຍຄ່າ (ໃຫ້ລ້າໆ) ພ້ອມນີ້ ຍັງໄດ້ແນະນຳຜູ້ໂດຍສານຢູ່ໃນລົດ ຮັກສາໄລຍະຫ່າງເວັ້ນຕັ່ງນັ່ງ ອະນາໄມທຳຄວາມສະອາດລົດຂອງຕົນ ແລະ ອື່ນໆ ເຊິ່ງຈະໃຫ້ມີພະນັກງານປະກາດຜ່ານໂທລະໂຄ່ງກ່ອນລົດຈະອອກຈາກຄີວແຕ່ລະຄັ້ງ ເພື່ອໃຫ້ທຸກຄົນໄດ້ປະຕິບັດ ແລະ ຮັບປະກັນຄວາມປອດໄພ ບໍ່ໃຫ້ມີການລະບາດຂອງພະຍາດໂຄວິດ-19 ສຳລັບລົດໂດຍສານແຕ່ລະສາຍ ເພີ່ນຍັງແລ່ນໃນເວລາ ແລະ ລາຄາປົກກະຕິຄືເກົ່າ ສະນັ້ນຈຶ່ງຂໍຄວາມຮ່ວມມືທຸກຄົນ ຊ່ວຍກັນປະຕິບັດນຳກັນ ເພື່ອສະກັດກັ້ນການແຜ່ລະບາດຂອງເຊື້ອໄວຣັສດັ່ງກ່າວຢ່າງເຂັ້ມງວດ.
ທ່ານ ພູ ແກ້ວແສງສະຫວ່າງ ໂຊເຟີລົດແຂວງອັດຕະປື ກ່າວຕື່ມວ່າ: ສຳລັບຜູ້ໂດຍສານທີ່ຈະເດີນທາງສາຍວຽງຈັນ-ອັດຕະປື ກ່ອນຂຶ້ນລົດ ພວກເຮົາໄດ້ປະຕິບັດຕາມແຈ້ງການ ແລະ ຄຳແນະນຳຂອງສະຖານີຂົນສົ່ງໂດຍສານສາຍໃຕ້ເຊັ່ນກັນ ເປັນຕົ້ນ ມີເຈວລ້າງມືໄວ້ໃນໜ້າລົດ ໃຫ້ຜູ້ໂດຍສານໄດ້ລາງມືທຸກຄັ້ງ ແນະນຳຜູ້ໂດຍສານໃຫ້ໃສ່ຜ້າປິດປາກ ແລະ ຮັກສາໄລຍະຫ່າງຂອງບ່ອນນັ່ງ ເຊິ່ງໄລຍະນີ້ ກໍເຫັນວ່າຜູ້ເດີນທາງໄປທາງໃຕ້ຍັງຄວາມເບົາບາງຢູ່ ເຮັດໃຫ້ການແນະນຳປະຕິບັດການຮັກສາໄລຍະຫ່າງຂອງຜູ້ໂດຍສານກໍງ່າຍຂຶ້ນ ເຊິ່ງສາເຫດຄືທຸກຄົນຮັບຮູ້ນຳກັນແລ້ວ ໄລຍະນີ້ຍັງເປັນໄລຍະຜ່ອນຜັນມາດຕະການປ້ອງກັນ ຄວບຄຸມ ແລະ ແກ້ໄຂຂອງພະຍາດໂຄວິດ-19 ຂອງລັດຖະບານ ເຮັດໃຫ້ບາງຄົນຍັງມີຄວາມກັງວົນ ແລະ ຢ້ານກົວຕິດໄວຣັສ ເລີຍບໍ່ປາກົດເຫັນມີຜູ້ຢາກເດີນທາງຫຼາຍປານໃດ ເຊິ່ງມັນກໍໄດ້ສົ່ງຜົນກະທົບໂດຍກົງຕໍ່ການຂົນສົ່ງ ແຕ່ເຖິງຢ່າງໃດກໍຕາມ ພວກເຮົາກໍເຫັນໃຈຜູ້ປະກອບການນຳກັນ ແລະ ຈະສືບຕໍ່ຂົນສົ່ງໂດຍສານໃນໄລຍະປະຕິບັດມາດຜ່ອນຜັນຂອງລັດຖະບານແຕ່ວັນທີ 18 ພຶດສະພາ-1 ມິຖຸນາ 2020 ຕໍ່ໄປ.
# ຂ່າວ & ພາບ: ລັດເວລາ