ພະແນກສຶກສາທິການ ແລະ ກີລາ ນະຄອນຫຼວງວຽງຈັນ (ນວ) ຈັດການແຂ່ງຂັນສີລະປະວັນນະຄະ ດີຂອງນັກຮຽນຊັ້ນມັດທະຍົມສຶກສາທົ່ວນະຄອນຫຼວງວຽງຈັນ ຂຶ້ນວັນທີ 20 ພຶດສະພາ 2022 ທີ່ສູນການ ຄ້າທົ່ງຂັນຄຳ ນວ ໂດຍມີທ່ານ ສີທົນ ດາວພະລັດ ຮອງຫົວໜ້າພະແນກສຶກສາທິການ ແລະ ກີລາ ນວ ທ່ານ ວິລະວັນ ບຸນສຸກໄທ ຫົວນ້າກົມກີລາມວນຊົນ ພະລະ ແລະ ສີລະປະສຶກສາ ກະຊວງສຶກສາທິການ ແລະ ກີລາ ພ້ອມດ້ວຍທ່ານຮອງຫົວໜ້າພະແນກສຶກສາທິການ ແລະ ກີລາ ນວ ທ່ານເຈົ້າເມືອງ ຮອງເຈົ້າເມືອງ ຫົວໜ້າ ຮອງຫົວໜ້າຫ້ອງການສືກສາທິການ ແລະ ກີລາ 9 ເມືອງ ແຂກຖືກເຊີນ ຄູ-ອາຈານ ນັກຮຽນ ແລະ ມວນຊົນ ຊາວ ນວ ເຂົ້າຮ່ວມ
ການແຂ່ງຂັນສີລະປະໃນຄັ້ງນີ້ ເປັນການຜັນຂະຫຍາຍແຜນຍຸດທະສາດຂອງພະແນກສຶກສາ ໃຫ້ສອດຄ່ອງກັບ 5 ຫຼັກມູນຂອງການສຶກສາ ເປັນສົ່ງເສີມໃຫ້ຊາວໜຸ່ມເຍົາວະຊົນຜູ້ທີ່ຮັກມັກສິລະປະ ເປັນການຮັກສາວັດທະນະທຳ ຮີດຄອງປະເພນີຂອງຊາດ ການແຂ່ງຂັນໃນຄັ້ງນີ້ ປະກອບມີທັງໝົດ 12 ຄະນະ ມາຈາກ 9 ຕົວເມືອງ ການແຂ່ງຂັນມີ 2 ລາຍການ ຄື ຮ້ອງເພງ ແລະ ຟ້ອນປະກອບສຽງເພງ.
ສຳລັບລາງວັນປະເພດຮ້ອງເພງ ອັນດັບ1 ຈະໄດ້ຮັບຂັນລາງວັນ ພ້ອມເງິນສົດ 800.000 ກີບ ແລະ ຂອງຂວັນຈາກບໍລິສັດນ້ຳຫວານລາວ ອັນດັບ 2 ໄດ້ຮັບຂັນລາງວັນ ພ້ອມເງິນສົດ 700.000 ກີບ ອັນດັບທີ 3 ໄດ້ຮັບຂັນລາງວັນ ພ້ອມເງິນສົດ 500.000 ກີບ ແລະ ລາງວັນຊົມເຊີຍ ໄດ້ຮັບເງິນຜູ້ລະ 100.000 ກີບ ສ່ວນ ລາງວັນປະເພດຟ້ອນປະກອບສຽງເພງ ອັນດັບ1 ຈະໄດ້ຮັບຂັນລາງວັນ ພ້ອມເງິນສົດ 2.000.000 ກີບ ແລະ ຂອງຂວັນຈາກບໍລິສັດນ້ຳຫວານລາວ ອັນດັບ 2 ໄດ້ຮັບຂັນລາງວັນ ພ້ອມເງິນສົດ 1.500.000 ກີບ ອັນດັບທີ 3 ໄດ້ຮັບຂັນລາງວັນ ພ້ອມເງິນສົດ 1.000.000ກີບ ແລະ ລາງວັນຊົມເຊີຍ ໄດ້ຮັບເງິນພາກສ່ວນລະ 500.000 ກີບ.
ຜົນການແຂ່ງຂັນປະເພດຮ້ອງເພງ ອັນດັບ1 ແມ່ນເມືອງປາກງື່ມ ອັນດັບ2 ຈາກໂຮງຮຽນ ມສ ລາວ-ຫວຽດນາມ ອັນດັບ 3 ເມື່ອງສີໂຄດຕະບອງ ສ່ວນປະເພດຟ້ອນປະກອບເພງ ອັນດັບ1 ເມືອງສີໂຄດຕະບອງ ແລະ ເປັນແຊັມສະໄໝທີ 5 ຕິດຕໍ່ກັນ ອັນດັບ 2 ເມືອງໄຊເສດຖາ ແລະ ອັນດັບ 3 ແມ່ນເມືອງຫາດຊາຍຟອງ.
# ຂ່າວ – ພາບ : ບຸນມີ