ກອງປະຊຸມແລກປ່ຽນບົດຮຽນວຽກງານປ້ອງກັນ ແລະ ໂຕ້ຕອບພະຍາດໂຄວິດ-19 ເພື່ອປຶກສາຫາລື ຖອດຖອນບົດຮຽນ ຫຼຸດຜ່ອນຜົນກະທົບຈາກພະຍາດໂຄວິດໃນ ສປປ ລາວ ແບບເຊິ່ງໜ້າ ແລະ ຜ່ານທາງອອນລາຍໃນທົ່ວປະເທດ ໄດ້ຈັດຂຶ້ນໃນທີ 19 ພຶດສະພາ 2022 ຢູ່ໂຮງແຮມຄຣາວພລາຊາ ນະຄອນຫຼວງວຽງຈັນ ໂດຍເປັນປະທານຂອງທ່ານ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ມີຫົວໜ້າ-ຮອງຫົວໜ້າພະແນກ ທີ່ມາຈາກ 10 ແຂວງ ອົງການຈັດຕັ້ງທາງສັງຄົມ ພາກສ່ວນກ່ຽວຂ້ອງ ແລະ ແຂກຖືກເຊີນເຂົ້າຮ່ວມ.
ທ່ານ ສີສະຫວາດ ສຸດທານີລະໄຊ ໄດ້ຍົກໃຫ້ເຫັນອັດຕາການສັກຢາກັນພະຍາດໃນທົ່ວປະເທດທີ່ສູງ ແລະ ປຶກສາຫາລືກ່ຽວກັບຄວາມສຳຄັນຂອງການຮ່ວມມືລະຫວ່າງທຸກກະຊວງ ແລະ ພາກສ່ວນກ່ຽວຂ້ອງ ໃນການພັດທະນາເພື່ອຕ້ານພະຍາດໂຄວິດ ສະແດງຄວາມຂອບໃຈມາຍັງອົງການຈັດຕັ້ງທາງສັງຄົມລາວ ທີ່ໄດ້ໃຫ້ຄວາມສໍາຄັນວຽກງານດັ່ງກ່າວ ການແຜ່ລະບາດຂອງພະຍາດໂຄວິດ ຍັງດຳເນີນຢູ່ຕໍ່ໄປ ເຖິງວ່າຈະມີຂໍ້ຈຳກັດໜ້ອຍກໍຕາມ ແຕ່ຍັງຕ້ອງປະຕິບັດຕາມມາດຕະການອະນາໄມທີ່ດີ ແລະ ຮຽນຮູ້ຈາກການເຄື່ອນໄຫວທີ່ປະສົບຜົນສຳເລັດຂອງພວກເຮົາ ເພື່ອໄປເຖິງທຸກພາກພື້ນ.
ທ່ານນາງ ຈັນສີ ພິມມະຈັນ ປະທານຄະນະກຳມາທິການປະສານງານອົງການຈັດຕັ້ງທາງສັງຄົມລາວ ໄດ້ກ່າວວ່າ: ອົງການຈັດຕັ້ງທາງສັງຄົມລາວ ໄດ້ມີບົດບາດສຳຄັນໃນການຫຼຸດຜ່ອນການແຜ່ລະບາດຂອງພະຍາດໂຄວິດ-19 ແລະ ພວກເຮົາທຸກຄົນຕ້ອງສືບຕໍ່ພະຍາຍາມຊ່ວຍເຫຼືອປະຊາຊົນໃຫ້ຟື້ນຟູຈາກຜົນກະທົບດ້ານສຸຂະພາບ ແລະ ເສດຖະກິດໃນອະນາຄົດ.
ສໍາລັບໂຄງການການປະກອບສ່ວນອົງການຈັດຕັ້ງສັງຄົມລາວ ເພື່ອປ້ອງກັນ ແລະຫຼຸດຜ່ອນຄວາມສ່ຽງຈາກພະຍາດໂຄວິດ-19 ໃນ ສປປ ລາວ (CISAC) ເປັນໂຄງການຕອບໂຕ້ສຸກເສີນຕໍ່ການລະບາດຂອງພະຍາດໂຄວິດ-19 ເຊິ່ງໄດ້ສະໜັບສະໜູນ 20 ສະມາຄົມ ຂອງອົງການຈັດຕັ້ງທາງສັງຄົມລາວ ໃນ 10 ແຂວງ ເພື່ອດໍາເນີນກິດຈະກໍາຫຼາຍກ່ວາ 480 ກິດຈະກຳ ມີຜູ້ໄດ້ຮັບຜົນປະໂຫຍດເຖິງ 60.000 ຄົນ ແລະ ຫຼຸດຜ່ອນການແຜ່ລະບາດຂອງພະຍາດໂຄວິດໃນລາວ.
ໂຄງການ CISAC ແມ່ນນຳພາໂດຍກຸ່ມອົງການຈັດຕັ້ງຮ່ວມກັນ ເຊິ່ງຈັດຕັ້ງປະຕິບັດໂດຍອົງການແພລນ ສາກົນ ຮ່ວມກັບສະມາຄົມສຸຂະພາບຊູມຊົນ ແລະ ການມີສ່ວນຮ່ວມ ແລະ ສະມາຄົມສົ່ງເສີມກະສິກໍາຍືນຍົງ ພາຍໃຕ້ການຊີ້ນຳ ແລະ ປະສານງານຜ່ານຄະນະກໍາມະການປະສານງານອົງການຈັດຕັ້ງສັງຄົມລາວ.
ການໃຫ້ທຶນຂອງໂຄງການ CISAC ແມ່ນສ່ວນໜຶ່ງຂອງການຕອບສະໜອງຂອງທີມງານເອີຣົບ ຕໍ່ກັບ ໂຄວິດ-19 ສະໜອງທຶນໂດຍສະຫະພາບເອີຣົບ ເພື່ອແນໃສ່ການສະໜັບສະໜູນຊ່ວຍລັດຖະບານແຫ່ງ ສປປ ລາວ ເພື່ອຫຼຸດຜ່ອນຜົນກະທົບດ້ານສາທາລະນະສຸກ ສັງຄົມ ແລະ ເສດຖະກິດຈາກການລະບາດຂອງພະຍາດ ແລະ ເພີ່ມທະວີການຮ່ວມມືຢ່າງມີປະສິດທິຜົນກັບບັນດາອົງການຈັດຕັ້ງສັງຄົມ ທຶນທີ່ສະໜອງໃຫ້ພາຍໃຕ້ໂຄງການນີ້ ແມ່ນສະເພາະສໍາລັບອົງການຈັດຕັ້ງທາງສັງຄົມ ສະຫະພາບເອີຣົບຍັງໃຫ້ການສະໜອງທຶນໃຫ້ກະຊວງສາທາລະນະສຸກ ແລະ ຮ່ວມກັບ WHO ທີ່ໄດ້ມີການສະໜັບສະໜູນການຕອບໂຕ້ໂດຍກົງ ໃຫ້ທາງພາກລັດຖະບານ ຕໍ່ກັບການໂຕ້ຕອບພະຍາດໂຄວິດ-19 ນີ້ເປັນຄວາມພະຍາຍາມໃນລະດັບມາຫາພາກ ແລະ ສະຫະພາບເອີຣົບພູມໃຈທີ່ໄດ້ຮ່ວມມືກັບລັດຖະບານລາວ ແລະ ສັງຄົມພົນລະເຮືອນລາວ ເພື່ອຫຼຸດຜ່ອນຜົນກະທົບທາງລົບຈາກພະຍາດນີ້ ທັງຜົນກະທົບຕໍ່ສຸຂະພາບ ແລະ ຜົນກະທົບຕໍ່ຊີວິດການເປັນຢູ່.
# ຂ່າວ – ພາບ : ສີພອນ