ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ພ້ອມດ້ວຍຄະນະ ເຂົ້າພົບປະ ແລະ ແລກປ່ຽນບົດຮຽນລະຫວ່າງກະຊວງຍຸຕິທໍາ ກັບອົງການປົກຄອງແຂວງຈໍາປາສັກ ວັນທີ 12 ພຶດສະພາ 2022 ທີ່ກະຊວງຍຸຕິທຳ ເປັນກຽດຕ້ອງຮັບຂອງທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທໍາ ມີຫົວໜ້າກົມ ສະຖາບັນອ້ອມຂ້າງກະຊວງເຂົ້າຮ່ວມ.
![](https://v2.vientianemai.net/wp-content/uploads/2022/05/280298865_3147811028765908_1604780087006935504_n-1024x814.jpg)
ທ່ານ ໄພວີ ສີບົວລິພັນ ໄດ້ຂໍລາຍງານສະພາບ ແລະ ການເຄື່ອນໄຫວວຽກງານຂອງກະຊວງຍຸຕິທຳ ໂດຍໄດ້ຍົກໃຫ້ເຫັນສະພາບຈຸດພິເສດ ການນຳພາຈັດຕັ້ງປະຕິບັດວຽກງານວິຊາສະເພາະຕ່າງໆ ພ້ອມກັນນັ້ນ ທັງສອງຝ່າຍປຶກສາຫາລືການຮ່ວມມືວຽກງານຍຸຕິທຳທັງສອງຝ່າຍ ທັງນີ້ກໍເພື່ອຊຸກຍູ້ ແລະ ສົ່ງເສີມການຮ່ວມມືໃນການສົ່ງເສີມ ແລະ ສ້າງຄວາມເຂັ້ມແຂງໃຫ້ແກ່ວຽກງານຍຸຕິທຳແບບມີຈຸດສຸມ ລະຫວ່າງກະຊວງຍຸຕິທຳ ແລະ ອົງການປົກຄອງແຂວງຈໍາປາສັກ ແນໃສ່ຜັນຂະຫຍາຍ ແລະ ຈັດຕັ້ງປະຕິບັດແນວທາງນະໂຍບາຍຂອງພັກ ແຜນພັດທະນາເສດຖະກິດແຫ່ງຊາດ ແລະ ຂອງແຂວງຈໍາປາສັກ ກົດໝາຍ ແລະ ນິຕິກໍາໃຕ້ກົດໝາຍທີ່ວາງອອກເປັນແຕ່ລະໄລຍະ ຕາມພາລະບົດບາດຂອງຕົນໃນວຽກງານຍຸຕິທຳຢູ່ແຂວງຈໍາປາສັກໃຫ້ມີປະສິດທິຜົນສູງ.
![](https://v2.vientianemai.net/wp-content/uploads/2022/05/279869025_291239053217534_61297237131071970_n-1024x683.jpg)
ຈາກນັ້ນ ສອງຝ່າຍກໍໄດ້ເຊັນບົດບັນທຶກຄວາມເຂົ້າໃຈຮ່ວມກັນ ໂດຍທັງສອງຝ່າຍຕົກລົງເຫັນດີເປັນເອກະພາບ ການສົ່ງເສີມ ແລະ ຊຸກຍູ້ການຈັດຕັ້ງຜັນຂະຫຍາຍບັນດານະໂຍບາຍ ແຜນການ ແຜນງານ ແລະ ໂຄງການກ່ຽວກັບການພັດທະນາວຽກງານຍຸຕິທຳ ແລະ ການຈັດຕັ້ງປະຕິບັດກົດໝາຍ ແລະ ນິຕິກໍາໃຕ້ກົດໝາຍຂອງແຂວງຈໍາປາສັກ ການສົ່ງເສີມ ແລະ ສ້າງຄວາມເຂັ້ມແຂງໃຫ້ແກ່ການຈັດຕັ້ງໃນຂະແໜງຍຸຕິທຳຢູ່ແຂວງຈໍາປາສັກໃຫ້ສາມາດການເຄື່ອນໄຫວໄປຕາມພາລະບົດບາດຂອງຕົນຕາມກົດໝາຍ ໂດຍສະເພາະການຫັນອົງການປະຕິບັດຄໍາຕັດສີນຂອງສານໃຫ້ຂຶ້ນຕາມສາຍຕັ້ງເທື່ອລະກ້າວ ກໍ່ສ້າງ ແລະ ບຳລຸງຍົກລະດັບ ແລກປ່ຽນບົດຮຽນ ປະສົບດ້ານກົດໝາຍ ຍຸຕິທຳໃຫ້ພະນັກງານລັດຖະກອນໃນຂະແໜງຍຸຕິທຳຂອງແຂວງຈໍາປາສັກເຊັ່ນ ວຽກງານສ້າງນິຕິກໍາ ການໂຄສະນາ ແລະ ເຜີຍແຜ່ກົດໝາຍ ວຽກງານຍຸຕິທຳຮາກຖານ ທະບຽນສານ ການປະຕິບັດຄໍາຕັດສີນຂອງສານ ການຊ່ວຍເຫຼືອລ້າທາງດ້ານກົດໝາຍ ວຽກການແກ້ໄຂຂໍ້ຂັດແຍ່ງທາງດ້ານເສດຖະກິດ ແລະ ວຽກງານຊຸກຍູ້ ແລະ ສົ່ງເສີມການນໍາໃຊ້ເຕັກນິກ-ເຕັກໂນໂລຊີທັນໄໝເຂົ້າໃນວຽກງານສະຖິຕິ ການເກັບກຳຂໍ້ມູນ ການລາຍງານວຽກງານຍຸຕິທຳ ການໂຄສະນາເຜີຍແຜ່ກົດໝາຍຕ່າງໆ ເພື່ອເຮັດໃຫ້ການປະຕິບັດພາລະບົດບາດຂອງຕົນໃຫ້ມີປະສິດທິຜົນສູງ ແລະ ອື່ນໆ.
![](https://v2.vientianemai.net/wp-content/uploads/2022/05/279434615_530673828762859_1753687578358325187_n-1024x682.jpg)
# ຂ່າວ – ພາບ : ອົ່ນ ໄຟສົມທອງ