ທ່ານ ກະຕ່າຍ ມາກໂນຊາ ນັກຂ່າວ-ນັກຈັດລາຍການ (ໂຄສົກ) ວິທະຍຸກະຈາຍສຽງແຫ່ງຊາດລາວ ນໍາປຶ້ມ “ຫາຍະນະຈາກໄວຣັສໂຄໂຣນ່າ ສູມະນຸດໃນທົ່ວໂລກ” ໄປມອບໃຫ້ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຂັ້ນສູນກາງ ວັນທີ 12 ພຶດສະພາ 2022 ຢູ່ກະຊວງສາທາລະນະສຸກ ເພື່ອມອບຕໍ່ໃຫ້ບັນດາແຂວງ ແລະ ພາກສ່ວນຕ່າງໆໃນທົ່ວປະເທດ ເຊິ່ງຕາງໜ້າມອບໂດຍທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ແລະ ຮັບໂດຍທ່ານ ດຣ ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ ມີພາກສ່ວນກ່ຽວຂ້ອງ ເຂົ້າຮ່ວມ.
![](https://v2.vientianemai.net/wp-content/uploads/2022/05/277679576_1447136952392591_623225026414526421_n-1024x683.jpg)
ປຶ້ມທີ່ນໍາມາມອບຄັ້ງນີ້ ມີ 1.000 ຫົວ ເຊິ່ງທ່ານ ກະຕ່າຍ ມາກໂນຊາ ໄດ້ໃຊ້ເວລາ 2 ປີກວ່າ ເພື່ອຮວບຮວມຂໍ້ມູນກ່ຽວກັບສະພາບການລະບາດ ແລະ ຄວາມອັນຕະລາຍຮ້າຍແຮງຂອງໄວຣັສໂຄໂຣນ່າ (ໂຄວິດ-19) ທີ່ລະບາດຮ້າຍແຮງແຕ່ທ້າຍປີ 2019 ເປັນຕົ້ນມາ ແລະ ພົບເຫັນການລະບາດຢູ່ຫຼາຍປະເທດທົ່ວໂລກ ເຮັດໃຫ້ອົງການອະນາໄມໂລກ (WHO) ປະກາດໃຫ້ການລະບາດຂອງພະຍາດໂຄວິດ-19 ເປັນເຫດການສຸກເສີນດ້ານສາທາລະນະສຸກລະຫວ່າງປະເທດ ເຮັດໃຫ້ມີຜູ້ຕິດເຊື້ອ ແລະ ເສຍຊີວິດທົ່ວໂລກເປັນຈໍານວນຫຼວງຫຼາຍ ທັງສົ່ງຜົນກະທົບຕໍ່ເສດຖະກິດຂອງທຸກປະເທດທົ່ວໂລກ ນອກຈາກໄດ້ເວົ້າເຖິງສະພາບການລະບາດ ແລະ ຄວາມອັນຕະລາຍຮ້າຍແຮງຂອງພະຍາດໂຄວິດ-19 ທີ່ເກີດຂຶ້ນຢູ່ຫຼາຍປະເທດໃນທະວີບອາຊີ ອາເມຣິກາ ອາເມຣິກາລາຕີນ ແລະ ເອີຣົບ ແລ້ວ ປຶ້ມດັ່ງກ່າວຍັງໄດ້ນໍາສະເໜີໃຫ້ຮູ້ກ່ຽວກັບພະຍາດຕິດຕໍ່ຮ້າຍແຮງທີ່ເຄີຍເກີດຂຶ້ນຢູ່ໃນໂລກ ເຮັດໃຫ້ມີຜູ້ຕິດເຊື້ອ ແລະ ເສຍຊີວິດຈໍານວນຫຼາຍຢູ່ບັນດາປະເທດທົ່ວໂລກໃນໄລຍະຜ່ານມາ ເປັນຕົ້ນ: ພະຍາດອະຫິວາ ໄຂ້ຫວັດໃຫຍ່ ພະຍາດເຮສໄອວີ/ເອດສ (HIV) ພະຍາດລະບົບຫາຍໃຈບົກຜ່ອງຮຸນແຮງ (SARS) ແລະ ພະຍາດອື່ນໆ.
![](https://v2.vientianemai.net/wp-content/uploads/2022/05/279872942_2266404156848033_844209503961221777_n-1024x683.jpg)
ທ່ານ ກະຕ່າຍ ມາກໂນຊາ ໃຫ້ສໍາພາດວ່າ: ແຮງຈູງໃຈທີ່ເຮັດໃຫ້ຕົນເອງໃຊ້ເວລາ 2 ປີກວ່າ ເພື່ອຂຽນປຶ້ມຫົວນີ້ ຍ້ອນເຫັນວ່າພະຍາດໂຄວິດ-19 ເປັນພະຍາດຕິດຕໍ່ທີ່ມີຄວາມອັນຕະລາຍຮ້າຍແຮງ ນອກຈາກສົ່ງຜົນກະທົບຮ້າຍແຮງຕໍ່ຮ່າງກາຍ ແລະ ຈິດໃຈຂອງມວນມະນຸດ ຍັງສົ່ງຜົນກະທົບຢ່າງໜັກໜ່ວງຕໍ່ເສດຖະກິດ-ສັງຄົມ ແລະ ວິຖີການດໍາລົງຊີວິດຂອງຄົນໃນໂລກ ຕົນຫວັງວ່າປຶ້ມດັ່ງກ່າວຈະເປັນການບັນທຶກເຫດການ ແລະ ຖ່າຍທອດຄວາມຮູ້ກ່ຽວກັບພະຍາດໂຄວິດ-19 ໃຫ້ສັງຄົມ ກໍຄືຄົນຮຸ່ນຫຼັງໄດ້ຮັບຮູ້ ເພື່ອເປັນບົດຮຽນ ແລະ ຮູ້ຈັກດໍາລົງຊີວິດປົກກະຕິແບບໃໝ່ ໄດ້ຢ່າງປອດໄພຈາກການລະບາດຂອງພະຍາດຕິດຕໍ່ຮ້າຍແຮງຕ່າງໆໃນອະນາຄົດ.
![](https://v2.vientianemai.net/wp-content/uploads/2022/05/278381361_3206770932942259_8776448523673039602_n-1024x683.jpg)
ນອກຈາກມອບປຶ້ມດັ່ງກ່າວແລ້ວ ທ່ານ ກະຕ່າຍ ມາກໂນຊາ ຍັງໄດ້ມອບຜ້າອັດປາກ-ດັງ 10 ແກັດ ໃຫ້ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຂັ້ນສູນກາງ ລວມມູນຄ່າທັງໝົດໃນການມອບຄັ້ງນີ້ 37.500.000 ກີບ.
![](https://v2.vientianemai.net/wp-content/uploads/2022/05/277679576_1447136952392591_623225026414526421_n-1024x683.jpg)
# ຂ່າວ – ພາບ : ສະບາໄພ