ບໍລິສັດພັດທະນາການປະມົງ (ADC) ຈໍາກັດ ສະເໜີການນຳນະຄອນຫຼວຽງຈັນ ໃນການຂະຫຍາຍເນື້ອທີ່ການຜະລິດ ເພື່ອປັບປຸງພື້ນຖານໂຄລ່າງສະຖານີເພາະພັນປາ ການລ້ຽງປາຊີ້ນ ການແປຮູບຜະລິດຕະພັນປາ ແລະ ການບໍລິການດ້ານເຕັກນິກໃຫ້ສັງຄົມ ຂະນະທີ່ທ່ານເຈົ້າຄອງນະຄອນຫຼວງວຽງຈັນ ເນັ້ນໃຫ້ບັນດາແນກການ ສົມທົບກັບເມືອງ ເພື່ອແກ້ໄຂບັນຫາດັ່ງກ່າວ.
ຕາມການລາຍງານສະພາບໂດຍຫຍໍ້ກ່ຽວກັບການຜະລິດລູກປາ ແລະ ປາຊີ້ນ ຂອງນັກວິຊາການປະຈຳ ADC ໃນໂອກາດທີ່ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ພ້ອມຄະນະ ລົງຊຸກຍູ້ການຜະລິດການ ຜະລິດກະສິກຳຢູ່ເມືອງນາຊາຍທອງ ວ່າ: ດ້ານການຜະ ລິດລູກປາ ປະກອບມີ ການບໍາລຸງຮັກສາພໍ່ແມ່ພັນ (ປານີນ)ພໍ່-ແມ່ພັນປານີນ ມີທັງໝົດ 2.500 ກິໂລ ຫຼື ປະມານ 2.300 ໂຕ ໃນນີ້ ປາແມ່ພັນ 1.700 ກິໂລ ປະມານ 1.600 ໂຕ ແລະ ປາພໍ່ພັນ 800 ກິໂລ ປະມານ 700 ໂຕ ໃນຈໍານວນ 5 ໜອງ ສ່ວນການປະສົມພັນ ເກັບຝັກໄຂ່ ແລະ ຜະລິດ ປານ້ອຍໂດຍອີງໃສ່ຈໍານວນພໍ່-ແມ່ພັນທີມີ ການປະສົມພັນ ແລະ ເກັບໄຂ່ ສະເລ່ຍໄດ້ 14 ກິໂລ/ ເດືອນ ຜະລິດເປັນ ປາແປງ (ປາແຕກໃໝ່) ໄດ້ປະມານ 1,12 ລ້ານໂຕ/ເດືອນ ແປງເພດ ແລະ ອາ ນຸບານເປັນປານ້ອຍ ພ້ອມຈໍາໜ່າຍໄດ້ 8 ແສນໂຕ/ເດືອນ ສ່ວນດ້ານການບໍລິການ ການຈໍາໜ່າຍ ປານ້ອຍໃນໄລຍະຜ່ານມາ ທາງບໍລິສັດພັດທະນາການປະມົງ (ADC) ພວກເຮົາໄດ້ ໃຫ້ບໍລິການ ແກ່ສະມາຊິກ ແລະ ລູກຄ້າທົ່ວໄປ ທັງທາງພາຍໃນນະຄອນ ຫຼວງວຽງຈັນ ແລະ ຕ່າງແຂວງ ໂດຍ ສະເລ່ຍ ປະມານ 10,5 ລ້ານໂຕ/ປີ ໃນນີ້ສະໜອງໃນນະຄອນຫຼວງວຽງຈັນ ໃຫ້ບໍລິການສະມາຊິກ ແລະ ລູກຄ້າທົ່ວໄປ ໄດ້ປະມານ8 ລ້ານໂຕ/ປີ ແລະ ຍັງສະໜອງໃຫ້ຕ່າງແຂວງ ໄດ້ປະມານ 2,5 ລ້ານໂຕ/ປີ ປະກອບມີ ແຂວງວຽງຈັນ ອຸດົມໄຊ ຫຼວງພະບາງ ແລະ ແຂວງໄຊຍະບູລີເປັນຕົ້ນ ນອກ ຈາກການເພາະພັນ ການບໍລິການລູກປາໃຫ້ສັງຄົມ ສະຖານີຂອງພວກເຮົາຍັງເປັນບ່ອນຮຽນຮູ້ຂອງນັກວິຊາການ ນັກສຶກສາ ຊາວກະສິກອນຕື່ມອີກ.
ຢ່າງໃດກໍຕາມເພື່ອເປັນການເພີ່ມ ຫຼື ຂະຫຍາຍກິດຈະກໍາດ້ານການຜະລິດ ແລະ ການບໍລິການ ເຕັກນິກວິຊາການ ດ້ານດັ່ງກ່າວນັ້ນ ອາດຈະຕ້ອງໄດ້ເພີ່ມເນື້ອທີ່ການຜະລິດຂຶ້ນຕື່ມ ເພື່ອຮອງຮັບ ໃນການກໍ່ສ້າງ ແລະ ປັບປຸງດ້ານພື້ນຖານໂຄງລ່າງ ຂອງສະຖານີ ໂດຍສະເພາະການຂະຫຍາຍ ການຜະລິດລູກປາ ການລ້ຽງປາຊີ້ນ ການແປຮູບຜະ ລິດຕະພັນປາ ແລະ ການໃຫ້ບໍລິການເຕັກ ນິກວິຊາການ ຈາກເດີມທີ່ມີຢູ່ ແລ້ວທັງໝົດ 9.055 ເຮັກຕາ ເພີ່ມອີກ 8.00 ເຮັກຕາ ລວມທັງ ໝົດ 17.055 ເຮັກຕາເພື່ອຮອງຮັບຕາມ ທິດທາງແຜນພັດທະນາການລ້ຽງປາ ແລະ ການປະມົງ ຂອງບໍລິສັດ ໃນເຂດພື້ນທີ່ສະຖານີລ້ຽງປານໍ້າຫຸມ.
ໂອກາດດັ່ງກ່າວ ທ່ານເຈົ້າຄອງນະຄອນຫຼວງວຽງຈັນ ສະແດງຄວາມຊົມເຊີຍຕໍ່ການເຄື່ອນໄຫວຂອງ ADC ໃນໄລຍະຜ່ານການ ເຊິ່ງປະກອບສ່ວນສ້າງຄວາມເຂັ້ມແຂງໃຫ້ຊາວກະສິກອນ ສ້າງວິຊາອາຊີບ ສ້າງບົດຮຽນໃຫ້ກັບນັກຮຽນນັກສຶກສາ ແລະ ຍັງເປັນການແກ້ໄຂທາງດ້ານເສດຖະກິດ ກໍຄື ຫຼຸດຜ່ອນການນຳເຂົ້າ ເຊິ່ງຕ້ອງໄດ້ມີການສືບຕໍ່ສົ່ງເສີມເຮັດໃຫ້ວຽກງານດັ່ງກ່າວຂະຫຍາຍຕົວຕື່ມອີກ ສ່ວນການສະເໜີຂໍທິດຊີ້ນໍາກ່ຽວກັບການຈັດຕັ້ງປະຕິບັດ ທິດທາງແຜນ ພັດທະນາ ການ ລ້ຽງປາ ແລະ ການປະມົງ ຂອງບໍລິສັດພັດທະນາການປະມົງ (ADC) ຈໍາກັດ ໂດຍສະເພາະແມ່ນເນື້ອທີ່ດິນທີ່ຈະຂະຫຍາຍການຜະລິດນັ້ນ ແມ່ນໃຫ້ເມືອງແຕ່ງຕັ້ງຄະນະລົງເກັບກຳຂໍ້ມູນ ກວດກາຄືນເນື້ອທີ່ດິນຢູ່ໃນຂໍ້ຕົກລົງຂອງທ່ານເຈົ້າຄອງນະຄອນຫຼວງວຽງຈັນໃນເມື່ອກ່ອນ ສົມທົບກັບພະແນກການກ່ຽວຂ້ອງ ໂດຍເຮັດເປັນຈຸດສຸມ ແລລະ ມີການລາຍງານແຕ່ລະຂັ້ນ ເພື່ອໃຫ້ແກ້ໄຂໄດ້ຢ່າງໂດຍໄວ ສ່ວນການເຄື່ອນໄຫວດ້ານອື່ນໆຂອງໂຄງການແມ່ນຢາກໃຫ້ສືບຕໍ່ສ້າງຄວາມເຂັ້ມແຂງໃຫ້ຊາວກະສິກອນ ທັງເປັນການຫຼຸດຜ່ອນການນຳເຂົ້າລູກປາຕື່ມອີກ.
ການລົງຊຸກຍູ້ການຜະລິດການ ຜະລິດກະສິກຳເທື່ອນີ້ມີຂຶ້ນໃນວັນທີ 10 ພຶດສະພາ 2022 ໂດຍການໃຫ້ການຕ້ອນຮັບຂອງຄະນະສູນບໍລິການຊົນລະກະເສດນໍ້າຫຸມ-ນໍ້າຊ່ວງ ບໍລິສັດພັດທະ ນາການປະມົງ (ADC) ຈໍາກັດ ແລະ ພະນັກງານກ່ຽວຂ້ອງ.