ກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ຈັດກອງປະຊຸມຮ່ວມກັບສື່ມວນຊົນ ເພື່ອແລກປ່ຽນບົດຮຽນໃນການຈັດຕັ້ງປະຕິບັດວຽກງານປອດຄວັນຢາສູບ ແລະ ສະຖານະການກ່ຽວກັບຢາສູບໃນສະພາບປັດຈຸບັນ ແລະ ວັນງົດສູບຢາໂລກ ປະຈຳປີ 2020 ຂຶ້ນໃນວັນທີ 21 ພຶດສະພາ 2020 ມີທ່ານ ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ທ່ານ ບຸນຫາບ ສຸລິໂຍ ຮອງຫົວໜ້າກົມສື່ມວນຊົນ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ມີບັນດາຄະນະບັນນາທິການ ວິຊາການຂ່າວຈາກໂທລະພາບ ວິທະຍຸ ໜັງສືພິມ ແລະ ສື່ສັງຄົມອອນລາຍທຸກຂະແໜງການເຂົ້າຮ່ວມ.
ໂອກາດນີ້ ທ່ານ ພອນປະເສີດ ອຸນາພົມ ກ່າວວ່າ: ການສູບຢາແມ່ນເປັນສາເຫດຕົ້ນຕໍຂອງການເປັນພະຍາດປອດຊຳເຮື້ອ ແລະ ພະຍາດລະບົບທາງເດີນຫາຍໃຈ ການສຶກສາຂອງທີມງານຊ່ຽວຊານດ້ານສາທາລະນະສຸກ ທີ່ຈັດໂດຍອົງການອະນາໄມໂລກໃນທ້າຍເດືອນເມສາ 2020 ໃຫ້ເຫັນວ່າ ຜູ້ສູບຢາແມ່ນມີຄວາມສ່ຽງທີ່ຈະກຳເນີດພະຍາດຮ້າຍແຮງຊະນິດອື່ນ ພ້ອມກັບພະຍາດໂຄວິດ-19 ຮ້າຍແຮງຂຶ້ນກວ່າເກົ່າ ຖ້າທຽບໃສ່ຜູ້ບໍ່ສູບຢາ ໂດຍພະຍາດໂຄວິດ-19 ເປັນພະຍາດຊຶມເຊື້ອ ແລະ ຮ້າຍແຮງ ທີ່ທຳລາຍປອດຂອງຜູ້ຄົນ ການສູບຢາເຮັດໃຫ້ຄວາມສາມາດໃນການເຮັດວຽກຂອງປອດຫຼຸດລົງ ທັງເຮັດໃຫ້ຮ່າງກາຍບໍ່ສາມາດຕ້ານກັບໄວຣັດໂຄໂຣນາ ແລະ ພະຍາດອື່ນໆ.
ນອກຈາກນີ້ ການສູບຢາຍັງເປັນປັດໄຈສ່ຽງຕໍ່ການເປັນພະຍາດບໍ່ຕິດຕໍ່ຫຼາຍຊະນິດ ເປັນຕົ້ນ ພະຍາດຫົວໃຈ ມະເຮັງປອດ ແລະ ເບົາຫວານ ທັງຍັງເຮດໃຫ້ບຸກຄົນທີ່ມີພະຍາດປະຈຳຕົວເຫຼົ່ານີ້ເປັນພະຍາດຮ້າຍແຮງນຳອີກ ເມື່ອຕິດພະຍາດໂຄວິດ-19 ເຊິ່ງຜົນການສຶກສາ ສະແດງໃຫ້ເຫັນວ່າ ຢາສູບເຮັດໃຫ້ຄົນເສຍຊີວິດຫຼາຍກວ່າ 8 ລ້ານຄົນແຕ່ລະປີໃນທົ່ວໂລກ ໃນຈຳນວນຜູ້ເສຍຊີວິດດັ່ງກ່າວ ຫຼາຍກວ່າ 7 ລ້ານຄົນແມ່ນຜູ້ສູບຢາ ແລະ ປະມານ 1,2 ລ້ານຄົນ ແມ່ນຜູ້ບໍ່ສູບຢາ ແຕ່ໄດ້ຮັບຄວັນຢາສູບ ສຳລັບ ສປປ ລາວ ຄົນເສຍຊີວິດຍ້ອນຢາສູບ ປະມານ 6.225 ຄົນຕໍ່ປີ.
# ຂ່າວ & ພາບ: ສີພອນ