ບໍລິສັດ SpaceX (ສະເປຊເອັກຊ໌) ຂອງມະຫາເສດຖີ ອີລອນ ມັສ ປ່ອຍດາວທຽມຊຸດຫຼ້າສຸດ ເຂົ້າສູ່ອະວະກາດ ຕາມແຜນງານທຸລະກິດອິນເຕີເນັດບຣອດແບນ ທີ່ຫວັງສົ່ງດາວທຽມອີກຫຼວງຫຼາຍຂຶ້ນໂຄຈອນອ້ອມໂລກພາຍໃນ 1 ປີ.
ຍານອະວະກາດ SpaceX Falcon 9 ຂອງບໍລິສັດເຕັກໂນໂລຊີແຫ່ງນີ້ ຖືກປ່ອຍຕົວຂຶ້ນສູ່ອະວະກາດຈາກສະຖານີຂອງກອງທັບອາກາດ ທີ່ແຫຼມຄາແນເວີຣັລ (Cape Canaveral) ລັດຟຼໍຣິດາ ໂດຍມີພາລະກິດຫຼັກຄືການສົ່ງດາວທຽມຊຸດທີ 4 ຈຳນວນປະມານ 60 ດວງຂຶ້ນສູ່ວົງໂຄຈອນ.
ດາວທຽມຊຸດຫຼ້າສຸດຂອງ SpaceX ທີ່ເດີນທາງຂຶ້ນສູ່ອະວະກາດນີ້ ຈະເຂົ້າໄປເປັນສ່ວນໜຶ່ງຂອງເຄືອຂ່າຍດາວທຽມຂອງບໍລິສັດຈຳນວນກວ່າ 170 ດວງ ທີ່ໂຄຈອນຢູ່ອ້ອມໂລກແລ້ວໃນຂະນະນີ້ ໂດຍບໍລິສັດມີແຜນຈະສົ່ງດາວທຽມຂຶ້ນອະວະກາດອີກຢ່າງໜ້ອຍ 22 ຄັ້ງ ຕະຫຼອດປີ 2020 ເພື່ອຊ່ວຍເສີມສ້າງເຄືອຂ່າຍອິນເຕີເນັດບຣອດແບນຂອງຕົນ ຊຶ່ງຕັ້ງຊື່ໄວ້ວ່າ Starlink (ສະຕາຣ໌ລິງ) ຜ່ານດາວທຽມບໍ່ໜ້ອຍກວ່າ 1.500 ດວງ ຕາມແຜນງານທຸລະກິດທີ່ວາງໄວ້.
ປັດຈຸບັນ SpaceX ມີໃບອະນຸຍາດເພື່ອປ່ອຍດາວທຽມກວ່າ 10.000 ດວງຢູ່ໃນມື ແລະ ມີແຜນຈະຂໍໃບອະນຸຍາດເພີ່ມເຕີມ ເພື່ອໃຫ້ສາມາດປ່ອຍເພີ່ມອີກ 30.000 ດວງ ໂດຍມີຈຸດປະສົງທີ່ຈະໃຊ້ດາວທຽມທັງໝົດ ໃນການໃຫ້ບໍລິການອິນເຕີເນັດລາຄາຖືກ ໃຫ້ກັບຜູ້ໃຊ້ງານໃນສະຫະລັດອາເມຣິກາ ແລະ ການາດາ ພາຍໃນປີ 2020 ກ່ອນຈະຂະຫຍາຍບໍລິການອິນເຕີເນັດຄວາມໄວສູງລາຄາຖືກນີ້ໄປຍັງທົ່ວໂລກ ອັນລວມເຖິງພື້ນທີ່ຫ່າງໄກທີ່ບໍ່ມີອິນເຕີເນັດໃຊ້.
ທ່ານ ອີລອນ ມັສ ຜູ້ບໍລິຫານ SpaceX ປະເມີນວ່າ ຫາກແຜນງານນີ້ສຳເລັດ ລາຍໄດ້ຂອງບໍລິສັດຈະເພີ່ມຂຶ້ນປີລະຫຼາຍຕື້ໂດລາ ຂະນະທີ່ຫຼາຍຝ່າຍຕັ້ງຂໍ້ສົງໄສກ່ຽວກັບໂອກາດຄວາມສຳເລັດ ແລະ ຄວາມສ່ຽງຂອງແຜນທຸລະກິດນີ້ ຊຶ່ງມີທັງຕົ້ນທຶນການສ້າງ ແລະ ການປ່ອຍດາວທຽມທີ່ຄາດວ່າຈະສູງເຖິງປະມານ 10 ຕື້ໂດລາ ແລະ ການສ້າງສະຖານີວຽກ ຫຼື Terminal ທີ່ມີຄວາມຊັບຊ້ອນແຕ່ລາຄາບໍ່ສູງໃຫ້ກັບຜູ້ໃຊ້ງານ.
ຍິ່ງໄປກວ່ານັ້ນ ນັກດາລາສາດຍັງກັງວົນວ່າ ລະດັບຄວາມສູງຂອງວົງໂຄຈອນຂອງດາວທຽມຂອງ SpaceX ອາດບົດບັງການເບິ່ງກຸ່ມດາວໃນໄລຍະເວລາກາງຄືນ ຊຶ່ງທາງບໍລິສັດກຳລັງເລັ່ງຫາລືກັບທຸກຝ່າຍທີ່ກ່ຽວຂ້ອງກັບປະເດັນນີ້ຢູ່.
ນອກຈາກ SpaceX ແລ້ວ ບໍລິສັດຄູ່ແຂ່ງ ແລະ ທຸລະກິດ Start-up ອີກຫຼາຍແຫ່ງ ກໍມີແຜນທີ່ຈະປ່ອຍດາວທຽມ ຊຶ່ງລວມກັນແລ້ວບໍ່ໜ້ອຍກວ່າຫຼາຍສິບພັນດວງເຂົ້າສູ່ວົງໂຄຈອນອ້ອມໂລກ ພາຍໃນໄລຍະທົດສະວັດໜ້າ ເຮັດໃຫ້ເກີດຄຳຖາມກ່ຽວກັບຄວາມສ່ຽງທີ່ດາວທຽມເຫຼົ່ານີ້ ຈະໂຄຈອນມາປະທະກັນເອງ ແລະ ຂໍ້ສົງໄສວ່າ ໜ່ວຍງານຄຸ້ມຄອງຈະສາມາດຄວບຄຸມແຜນພັດທະນາທຸລະກິດເຫຼົ່ານີ້ໄດ້ແນວໃດ.