ຮ່ວມກັນກໍ່ເຫດໃຊ້ອາວຸດປືນ ປຸ້ນຊັບພົນລະເມືອງ ຢູ່ບ້ານໜອງແຫ້ວ ເມືອງຫາດຊາຍຟອງ ນະຄອນຫຼວງວຽງຈັນ ກວດຊັບສິນຜູ້ເສຍຫາຍໄປຈຳນວນຫຼາຍ ແຕ່ກໍໜີບໍ່ລອດ ຖືກເຈົ້າໜ້າທີ່ ປກສ ຈັບຕົວມາດຳເນີນຄະດີໄດ້ 2 ຄົນ ແລະ ອີກ 1 ຄົນຍັງເອົາຕົວຫຼົບໜ
ອີງຕາມຂໍ້ມູນຂອງເຈົ້າໜ້າທີ່ ປກສ ນະຄອນຫຼວງວຽງຈັນ ທ່ານ ພັທ ສຸລິວັນ ລາດສະວົງ ຫົວໜ້າຫ້ອງຕຳຫຼວດ ປກສ ນະຄອນຫຼວງວຽງຈັນ ໃຫ້ຮູ້ວ່າ: ໃນເວລາ 11:30 ໂມງ ຂອງວັນທີ 8 ພຶດສະພາ 2020 ເຈົ້າໜ້າທີ່ ປກສ ເມືອງຫາດຊາຍຟອງ ໄດ້ຮັບແຈ້ງຄວາມຈາກຜູ້ຖືກເສຍຫາຍສອງຜົວ-ເມຍ ຊື່ທ້າວ ຮຸ່ຍ ແລະ ນາງ ຄຳແພງ ຢູ່ບ້ານໜອງແຫ້ວ ເມືອງຫາດຊາຍຟອງ ວ່າ: ມີຄົນຮ້າຍ 3 ຄົນ ເຂົ້າມາໃນເຮືອນ ໃຊ້ອາວຸດປືນສັ້ນບໍ່ຮູ້ຊະນິດຈີ້ ແລະ ມັດມື ມັດແຂນພວກກ່ຽວທັງສອງໄວ້ ແລ້ວເອົາໄປຂັງໃນຫ້ອງນອນ ຈາກນັ້ນ ຄົນຮ້າຍກໍ່ໄດ້ຄົ້ນເອົາຊັບສິນມີຄ່າພາຍໃນເຮືອນໄປ ໃນນັ້ນ ມີແຫວນຄຳ 2 ວົງ ສາຍຄໍຄຳຂາວໜັກ 1 ບາດ ໂມງ 1 ໜ່ວຍ ໂທລະສັບໄອໂຟນ 2 ໜ່ວຍ ບັດ ATM ບັດພະນັກງານບຳນານ ໃບຂັບຂີ່ ເງິນສົດຈຳນວນ 3,4 ລ້ານກີບ ແລະ ລົດເກັງໂຕໂຍ ຕ້າແຄມລີ້ ແລ້ວເອົາຕົວຫຼົບໜີ.
ເມື່ອຮູ້ແນວນັ້ນ ເຈົ້າໜ້າທີ່ ປກສ ເມືອງຫາດຊາຍຟອງ ກໍໄດ້ແຕ່ງຕັ້ງໜ່ວຍງານວິຊາສະເພາະລົງກວດກາເກັບກຳຂໍ້ມູນໃນສະຖານທີ່ເກີດເຫດ ພ້ອມທັງສົມທົບກັບກຳລັງວິຊາສະເພາະຫ້ອງຕຳຫຼວດ ປກສ ນວ ກອງພັນປ້ອງກັນເຄື່ອນທີ່ ແລະ ບັນດາສະຖານີ 1191 ປກສ ເມືອງສີສັດຕະນາກ ຕິດຕາມເປົ້າໝາຍ ຈົນຮອດເວລາ 19:00 ໂມງຂອງວັນດຽວກັນ ເຈົ້າໜ້າທີ່ສາມາດຈັບຕົວຜູ້ຖືກຫາໄດ້ 2 ຄົນຄື: ທ້າວ ອານຸສັກ (ກິໂນ່) ອາຍຸ 45 ປີ ອາຊີບກຳມະກອນ ບ້ານສະພານທອງເໜືອ ແລະ ທ້າວ ອານັນຕະໄຊ (ໂຈອີ້) ອາຍຸ 21 ປີ ອາຊີບນັກສຶກສາ ບ້ານໂພນສະຫວັນເໜືອ ທັງສອງຢູ່ເມືອງສີສັດຕະນາກ ນະຄອນຫຼວງວຽງຈັນ.
ຜ່ານການສອບສວນ ທ້າວ ອານຸສັກ ແລະ ທ້າວ ອານັນຕະໄຊ ໄດ້ສາລະພາບຕໍ່ເຈົ້າໜ້າທີ່ວ່າ: ພວກກ່ຽວທັງ 2 ຄົນໄດ້ລົງມືປຸ້ນເອົາຊັບສິນຂອງທ້າວ ຮຸ່ຍ ແລະ ນາງ ຄຳແພງ ແທ້ ແລະ ໄດ້ເອົາຊັບສິນທີ່ປຸ້ນມາແບ່ງກັນ ແລ້ວກໍເອົາຕົວຫຼົບໜີ ປັດຈຸບັນ ເຈົ້າໜ້າທີ່ ປກສ ນວ ກຳລັງລວບລວມຂໍ້ມູນ ແລະ ຕິດຕາມຜູ້ຮ່ວມຂະບວນການອີກ 1 ຄົນ ເພື່ອນຳມາລົງໂທດຕາມກົດໝາຍ.