ທ່ານ ພອນສານ ວິໄລເມັ້ງ ຫົວໜ້າກົມປົກປ້ອງແຮງງານ ສູນກາງສະຫະພັນກຳມະບານລາວ ໃຫ້ສຳພາດວັນທີ 18 ພຶດສະພາ 2020 ວ່າ: ໃນໄລຍະທີ່ມີການແຜ່ລະບາດພະຍາດ COVID-19 ຄະນະສູນກາງສະຫະພັນກຳມະບານລາວ ໄດ້ມອບໝາຍໃຫ້ກົມປົກປ້ອງແຮງງານ ເປັນເຈົ້າການຕິດຕາມ ເກັບກຳຂໍ້ມູນຜົນກະທົບຕໍ່ແຮງງານລາວ ແລະ ພວກເຮົາໄດ້ປະສານອົງການຈັດຕັ້ງກຳມະບານແຕ່ລະຂັ້ນກຳລັງເກັບກຳຢູ່ ແຕ່ຍັງບໍ່ທັນໄດ້ຕົວເລກທີ່ຊັດເຈນ ຄາດຄະເນວ່າຈະມີແຮງງານບໍ່ມີວຽກເຮັດຫຼາຍ ຍ້ອນສະພາບການຫຼຸດຜ່ອນການຜະລິດຂອງໂຮງງານ ເນື່ອງຈາກສະພາບຜົນກະທົບຕໍ່ເສດຖະກິດໂລກ ຄວາມຕ້ອງການກຳລັງສັ່ງຊື້ຈາກຕ່າງປະເທດຫຼຸດລົງ ແລະ ສະພາບການປິດປະເທດອື່ນໆ ເຊິ່ງການຊ່ວຍເຫຼືອແຮງງານດັ່ງກ່າວ ໄດ້ສືບຕໍ່ປຶກສາຫາລື ຊອກຫາວິທີທາງແກ້ໄຂຮ່ວມກັບກະຊວງແຮງງານ ແລະ ສະຫວັດດີການສັງຄົມ ສະພາການຄ້າ ແລະ ອຸດສາຫະກຳແຫ່ງຊາດລາວ ກ່ອນອື່ນແມ່ນໃຫ້ຂຶ້ນທະບຽນແຮງງານທີ່ຕົກງານ ຈາກນັ້ນ ສະເໜີໃຫ້ແຮງງານລາວປະສານກັບພາກສ່ວນກ່ຽວຂ້ອງຢູ່ຂັ້ນສູນກາງ ແລະ ທ້ອງຖິ່ນເພື່ອຫາທາງແກ້ໄຂ ສ່ວນການຈັດຫາງານ ແມ່ນກະຊວງແຮງງານເປັນເຈົ້າການປະຕິບັດຕາມກົດໝາຍ ແລະ ການປົກປ້ອງສິດ ແລະ ຜົນປະໂຫຍດຂອງຊາວແຮງງານເຊັ່ນ: ບໍ່ໄດ້ຮັບຄ່າແຮງງານ ຮັບຄ່າແຮງງານບໍ່ຖືກຕ້ອງຕາມສັນຍາ ຖືກການກົດຂີ່ຂູດຮີດແຮງງານ ການໃຊ້ຄວາມຮຸນແຮງຕໍ່ແຮງງານ ແມ່ນອົງການກຳມະບານເປັນຜູ້ແກ້ໄຂ ໂດຍມີໂທລະສັບສາຍດ່ວນ 1512 ເປັນບ່ອນຮຽກຮ້ອງ ພ້ອມນັ້ນ ກຳມະກອນ ແລະ ຊາວຜູ້ອອກແຮງງານສາມາດປະສານຂໍການຊ່ວຍເຫຼືອຈາກສະຫະພັນກຳມະບານແຂວງ ເມືອງ ສຳນັກງານອົງການຕ່າງໆ ລ້ວນແຕ່ມີການຈັດຕັ້ງກຳມະບານຮັບຜິດຊອບ ທ່ານສາມາດຮຽກຮ້ອງຄວາມເປັນທຳຕາມກົດໝາຍ.
ໃນນາມອົງການກຳມະບານ ເຊິ່ງເປັນຕົວແທນຂອງຊາວຜູ້ອອກແຮງງານ ເຮັດໜ້າທີ່ໃນການປົກປ້ອງສິດ ແລະ ຜົນປະໂຫຍດອັນຊອບທຳຂອງກຳມະກອນ ແລະ ຊາວຜູ້ອອກແຮງງານ ເພື່ອຄົ້ນຄວ້າພິຈາລະນາແກ້ໄຂບັນຫາຕໍ່ຜູ້ໄດ້ຮັບຜົນກະທົບຄື: ສະເໜີໃຫ້ລັດຖະບານສຸມໃສ່ຄົ້ນຄວ້າກຳນົດອັດຕາການຈ່າຍເງິນຊົດເຊີຍຜົນກະທົບໃຫ້ກຳມະກອນ ແລະ ຊາວຜູ້ອອກແຮງງານໃນໄລຍະປິດໂຮງງານ ທຸລະກິດຕ່າງໆຈາກການປິດປະເທດ ໂດຍສະເພາະອັດຕາການຊົດເຊີຍທີ່ນຳໃຊ້ເງິນກອງທຶນຈາກປະກັນສັງຄົມຂຶ້ນກັບກະຊວງແຮງງານ ແລະ ສະຫວັດດີການສັງຄົມ ຮຽກຮ້ອງມາຍັງຜູ້ໃຊ້ແຮງງານ ຈ່າຍເງິນເດືອນໃຫ້ກຳມະກອນ ແລະ ຊາວຜູ້ອອກແຮງງານຕາມກອງປະຊຸມອົງການ 3 ຝ່າຍດ້ານແຮງງານ ແລະ ຄະນະສະເພາະກິດດ້ານເສດຖະກິດໄດ້ຄົ້ນຄວ້າເປັນເອກະພາບກັນ ພ້ອມນັ້ນ ຮຽກຮ້ອງຜູ້ໃຊ້ແຮງງານບໍ່ຄວນຊອກເຫດຜົນເພື່ອເປັນການຖ່ວງດຶງ ບໍ່ຈ່າຍຄ່າແຮງງານໃຫ້ກຳມະກອນເດືອນເມສາ ແລະ ບໍ່ໃຫ້ສວຍໂອກາດປົດຈຳນວນແຮງງານອອກຈາກວຽກ.
ນອກນັ້ນ ການແກ້ໄຂບັນຫາແຮງງານທີ່ວ່າງງານໄລຍະຍາວ ສະເໜີໃຫ້ພາກລັດເພີ່ມການກະຕຸ້ນເສດຖະກິດໃຫ້ແຂງແຮງກວ່າເກົ່າ ດ້ວຍການສ້າງທຸລະກິດປະກອບການໃໝ່ ສ້າງວຽກເຮັດງານທຳເພີ່ມຂຶ້ນ ສ້າງລາຍຮັບໃຫ້ແຮງງານກຳມະກອນລາວ ແລະ ຄວນໃຊ້ໂອກາດໃນການດັດສົມ ຈຳກັດແຮງງານຕ່າງປະເທດເຂົ້າລາວໂດຍບໍ່ຈຳເປັນເຊັ່ນ: ກຳມະກອນບໍ່ມີສີມື ອາຊີບທີ່ສະຫງວນໃຫ້ຄົນລາວ ຕາມທີ່ໄດ້ລະບຸໄວ້ໃນກົດໝາຍວ່າດ້ວຍແຮງງານ ແລະ ກົດໝາຍອື່ນໆຢ່າງເຂັ້ມງວດ ພ້ອມທັງເປັນການສ້າງກາລະໂອກາດໃຫ້ແຮງງານລາວທີ່ເຄື່ອນຍ້າຍເຂົ້າມາຈາກຕ່າງປະເທດມີວຽກເຮັດງານທຳຫຼາຍຂຶ້ນ ຫຼຸດຜ່ອນການເຄື່ອນຍ້າຍແຮງງານໄປຕ່າງປະເທດຜິດກົດໝາຍ ຕົກເປັນເຫຍື່ອຂອງການຄ້າມະນຸດ ແລະ ປາກົດການຫຍໍ້ທໍ້ຕ່າງໆ ສະເໜີໃຫ້ລັດຖະບານ ອົງການຈັດຕັ້ງສາກົນ ເພີ່ມງົບປະມານໃຫ້ອົງການກຳມະບານໃນການຄຸ້ມຄອງ ປົກປ້ອງສິດ ແລະ ຜົນປະໂຫຍດອັນຊອບທຳໃຫ້ກຳມະກອນ ແລະ ຊາວຜູ້ອອກແຮງງານ ເຊິ່ງຜ່ານມາອົງການກຳມະບານໄດ້ຮັບງົບປະມານຈຳກັດຫຼາຍ ບໍ່ສາມາດເຄື່ອນໄຫວຊ່ວຍເຫຼືອກຳມະກອນ ແລະ ຊາວຜູ້ອອກແຮງງານລາວທີ່ໄດ້ ເຊິ່ງໄດ້ຮັບຜົນກະທົບ ບໍ່ສາມາດປົກປ້ອງ ແລະ ຜົນປະໂຫຍດໃຫ້ກຳມະກອນໄດ້ຢ່າງທົ່ວເຖິງ ແລະ ສະເໜີໃຫ້ກຳມະກອນ-ຊາວຜູ້ອອກແຮງງານຫັນໄປຊອກວຽກເຮັດງານທຳອັນໃໝ່ ເປັນຕົ້ນ ຫັນເປັນຜູ້ປະກອບການດ້ວຍຕົນເອງເຊັ່ນ ການຜະລິດກະສິກຳ ຫັດຖະກຳ ເປີດຮ້ານຂາຍເຄື່ອງ ສ້າງເປັນຜະລິດຕະພັນຂອງຕົນເອງ ແລະ ອື່ນໆ ເພີ່ມສ້າງລາຍຮັບແກ້ໄຂຊີວິດການເປັນຢູ່ ເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງເທື່ອລະກ້າວ.
# ຂ່າວ & ພາບ: ຂັນທະວີ