ທ່ານ ຄຳຫຼ້າ ພົມມະວັນ ຜູ້ອຳນວຍການລັດວິສາຫະກິດການບິນລາວ ໃຫ້ສຳພາດວັນທີ 19 ພຶດສະພາ 2020 ວ່າ: ແຜນການເປີດຖ້ຽວບິນເສັ້ນທາງພາຍໃນປະເທດຄືນ ເລີ່ມຖ້ຽວບິນທຳອິດນັບແຕ່ວັນທີ 22 ພຶດສະພາ 2020 ເປັນຕົ້ນໄປ ເຊິ່ງບິນເສັ້ນທາງພາຍໃນປະເທດທັງໝົດມີ 6 ເສັ້ນທາງຄື: ເສັ້ນທາງນະຄອນຫຼວງວຽງຈັນ (ນວ)-ຫຼວງພະບາງ-ນວ ບິນ 4 ຖ້ຽວຕໍ່ອາທິດ (ວັນຈັນ ວັນພຸດ ວັນສຸກ ແລະ ອາທິດ) ເສັ້ນທາງ ນວ-ປາກເຊ-ນວ ບິນ 4 ຖ້ຽວຕໍ່ອາທິດ (ວັນຈັນ ພຸດ ສຸກ ແລະ ອາທິດ) ນວ-ສະຫວັນນະເຂດ-ນວ ບິນ 3 ຖ້ຽວຕໍ່ອາທິດ (ວັນຈັນ ວັນພຸດ ວັນສຸກ) ເສັ້ນທາງ ນວ-ຊຽງຂວາງ-ນວ ບິນ 3 ຖ້ຽວຕໍ່ອາທິດ (ວັນຈັນ ວັນພຸດ ວັນສຸກ) ເສັ້ນທາງ ນວ-ອຸດົມໄຊ-ນວ ບິນ 3 ຖ້ຽວຕໍ່ອາທິດ (ວັນອັງຄານ ວັນພະຫັດ ວັນເສົາ) ເສັ້ນທາງ ນວ-ຫຼວງນ້ຳທາ-ນວ ບິນ 4 ຖ້ຽວຕໍ່ອາທິດ (ວັນຈັນ ວັນພຸດ ວັນສຸກ ວັນອາທິດ).
ການກະກຽມຄວາມພ້ອມ ໃຫ້ແກ່ການເປີດຖ້ຽວບິນສາຍພາຍໃນປະເທດຄືນໃໝ່ ເພື່ອຮັບປະກັນຄວາມປອດໄພ ກໍໄດ້ມີມາດຕະການເຂັ້ມງວດຄື: ມີການຂ້າເຊື້ອໃນເຮືອບິນກ່ອນຂຶ້ນເຮືອບິນທຸກຄັ້ງ ກ່ອນເຂົ້າປະຕິບັດງານຂອງພະນັກງານແຈ້ງປີ້ ທຸກຄົນຕ້ອງໄດ້ວັດແທກອຸຫະພູມ ລວມທັງຈຸບິນ ອຸນຫະພູມແມ່ນບໍ່ໃຫ້ສູງກາຍ 37,5 ອົງສາ ແລະ ມີອຸປະກອນປ້ອງກັນຕົນເອງຕະຫຼອດການປະຕິບັດໜ້າທີ່ເຊັ່ນ: ຜ້າອັດປາກ-ດັງ ຖົງມື ແລະ ນ້ຳຢາລ້າງມື ວັດແທກອຸຫະພູມຮ່າງກາຍໃຫ້ຜູ້ໂດຍສານທຸກຄົນ ກ່ອນເວລາຈະແຈ້ງປີ້ ແລະ ຜູ້ໂດຍສານຕ້ອງມາແຈ້ງດ້ວຍຕົນເອງ ຫ້າມບໍ່ໃຫ້ຄົນອື່ນມາແຈ້ງປີ້ໃຫ້ຢ່າງເດັດຂາດ ກ່ອນຂຶ້ນເຮືອບິນ ຜູ້ໂດຍສານຕ້ອງໃສ່ຜ້າປິດປາກທຸກຄົນ ຕະຫຼອດໄລຍະການເດີນທາງ ແລະ ລວມທັງພະນັກງານຈຸບິນທີ່ປະຕິບັດໜ້າທີ່ຮັບໃຊ້ຖ້ຽວບິນນັ້ນ ກຳນົດເວັ້ນໄລຍະຫ່າງຂອງຜູ້ໂດຍສານ 1 ແມັດ ໃນເວລາແຈ້ງປີ້ ແລະ ເວລາປ່ອຍຜູ້ໂດຍສານຂຶ້ນເຮືອບິນ ການບໍລິການເທິງເຮືອບິນ ແມ່ນບໍ່ໃຫ້ມີການສຳຜັດກັນລະຫວ່າງພະນັກງານຈຸຫ້ອງໂດຍສານ (ພະນັກງານບໍລິການຢູ່ເທິງເຮືອບິນ) ແລະ ຜູ້ໂດຍສານ ທາງການບິນລາວຈະຢຸດຕິການເສີບອາຫານ ເຂົ້າໜົມ ນ້ຳຊາ ແລະ ກາເຟ ຈະມີແຕ່ນ້ຳດື່ມໄວ້ບໍລິການໃຫ້ຜູ້ໂດຍສານ ໂດຍຈະຈັດວາງໃສ່ໂຕະໄວ້ຈຸດທີ່ປ່ອຍຜູ້ໂດຍສານຂຶ້ນເຮືອບິນ ແລະ ແນະນຳໃຫ້ຜູ້ໂດຍສານແຕ່ລະທ່ານ ຈັບເອົາດ້ວຍຕົນເອງຕະຫຼອດໄລຍະເວລາທີ່ບໍ່ໄດ້ບິນ (ຈອດເຮືອບິນ) ເຮົາຍັງໄດ້ມີການສ້ອມບຳລຸງຮັກສາເຮືອບິນເປັນປົກກະຕິ ຕາມມາດຕະຖານສາກົນ.
# ຂ່າວ & ພາບ: ຂັນທະວີ