ໝາກເງາະ ຖືເປັນພືດຊະນິດໜຶ່ງທີ່ຕະຫຼາດຕ້ອງການ ດັ່ງນັ້ນ ຈຶ່ງເຮັດໃຫ້ຊາວກະສິກອນຫຼາຍຄອບຄົວ ຫັນມານິຍົມປູກໝາກເງາະສ້າງລາຍຮັບ ສ້າງເສດຖະກິດຄອບຄົວ ເໝືອນດັ່ງຄອບຄົວທ່ານ ມາ ມົວຊົງດຣາ ໄດ້ປູກໝາກເງາະ ໂດຍປູກໃນຮູບແບບກະສິກຳອິນຊີ ສະເລ່ຍສ້າງລາຍຮັບໄດ້ຫຼາຍຮ້ອຍລ້ານກີບຕໍ່ປີ.
ທ່ານ ມາ ມົວຊົງດຣາ ເຈົ້າຂອງສວນໄມ້ໃຫ້ໝາກກະສິກຳອິນຊີ ບ້ານດວງບຸດດີ ເມືອງໄຊທານີ ນະຄອນຫຼວງວຽງຈັນ ໄດ້ໃຫ້ສຳພາດໃນວັນທີ 19 ພຶດສະພາ 2020 ວ່າ: ໄດ້ເລີ່ມຫັນມາປູກໝາກເງາະໃນປີ 2000 ໃນເນື້ອທີ່ 3 ເຮັກຕາ ມີຕົ້ນໝາກເງາະ 300 ຕົ້ນ ໂດຍເບ້ຍທີ່ນຳມາປູກແມ່ນນຳເຂົ້າຈາກປະເທດເພື່ອນບ້ານ ນັບຕັ້ງແຕ່ລົງມືປູກ ແມ່ນໄດ້ໃຊ້ເວລາປະມານ 6 ປີ ຈຶ່ງສາມາດເກັບຜົນຜະລິດໄດ້ ສະເລ່ຍຕົ້ນໜຶ່ງແມ່ນໃຫ້ຜົນຜະລິດປະມານ 120 ກິໂລກຣາມ ຂາຍຢູ່ພາຍໃນສວນກິໂລໜຶ່ງ 10 ພັນກີບ ສ້າງລາຍຮັບໄດ້ປີໜຶ່ງ 300 ລ້ານກີບ
ສຳລັບເຕັກນິກການປູກໝາກເງາະທີ່ຈະເຮັດໃຫ້ໄດ້ຮັບຜົນດີ ຕ້ອງມີເນື້ອທີ່ດິນປູກຢູ່ເນີນສູງ ສ່ວນການບົວລະບັດຮັກສານັ້ນ ແມ່ນຕ້ອງໄດ້ເອົາໃຈໃສ່ໃນການໃສ່ຝຸ່ນຄອກ ໃຫ້ນ້ຳ ຕົບແຕ່ງໃຫ້ຕົ້ນເຕ້ຍ ແລະ ໄດ້ຮັບແສງສະໝ່ຳສະເໝີ ນອກຈາກນັ້ນ ຍັງປູກພືດໝູນວຽນປະເພດໝາກຫຸ່ງ ໝາກສິດາ ໝາກຊົມພູ ໝາກກ້ວຍ ແລະ ພືດອິນຊີຊະນິດຕ່າງໆອີກ 10 ກວ່າເຮັກຕາ.
ສຳລັບຜູ້ທີ່ສົນໃຈຫັນມາປະກອບອາຊີບກະສິກຳ ແມ່ນຍິນດີໃຫ້ຄຳແນະນຳວິທີປູກ ແຕ່ສິ່ງທີ່ຄວນເອົາໃຈໃສ່ກ່ອນທີ່ຈະຫັນມາປະກອບອາຊີບກະສິກຳ ກໍຄື ກ່ອນທີ່ຈະປູກພືດນັ້ນ ຄວນໄລ່ລຽງເສດຖະກິດກ່ອນຈະປູກ ແລະ ວາງແຜນການປູກ ເພື່ອໃຫ້ພືດທີ່ປູກຖືກຕາມຄວາມຕ້ອງການຂອງຕະຫຼາດ ຈຶ່ງຈະສາມາດສ້າງລາຍຮັບເຂົ້າມາໄດ້ຢ່າງຍືນຍົງ.
# ຂ່າວ & ພາບ: ເພັດສະໝອນ