ພົບກັນໃນວັນນີ້ ມີເລື່ອງທາງການອັງກິດ ອອກມາດຕະການເກັບພາສີນ້ຳອັດລົມທີ່ມີທາດຫວານເກີນກຳນົດ ແລະ ແຜນກຳຈັດເຈົ້າໜ້າທີ່ຕຳຫຼວດທີ່ປະພຶດໂລເລຢູ່ຟິລິບປິນ.
ທີ່ ອັງກິດ: ກ່ອນນີ້ 2 ປີປາຍ ໜັງສືພິມ ເດິ ເນເຊິນ (The Nation 7 ເມສາ 2018) ໄດ້ໃຫ້ຮູ້ວ່າ: ທາງການປະເທດອັງກິດ ໄດ້ເອົາມາດຕະການອັນຈຳເປັນ ເພື່ອຕ້ານພະຍາດ “ຕຸ້ຍ” ຫຼື ນ້ຳໜັກເກີນມາດຕະຖານອັນຈຳເປັນ ດ້ວຍການປະກາດເກັບພາສີຜະລິດຕະພັນນ້ຳອັດລົມ ທີ່ມີສ່ວນປະສົມຂອງນ້ຳຕານເກີນຂອບເຂດ ເປົ້າໝາຍຂອງມາດຕະການທີ່ວ່ານີ້ ກໍແມ່ນເພື່ອປົກປ້ອງເດັກນ້ອຍອັງກິດ ຈາກພະຍາດທີ່ເກີດຈາກຄວາມຫວານ ຄື: ພະຍາດຕຸ້ຍ ແລະ ພະຍາດແຂ້ວແມງ ທີ່ແຜ່ຫຼາຍໃນໝູ່ເດັກນ້ອຍ ຍ້ອນການດື່ມນ້ຳອັດລົມ ເຊັ່ນ: ແຟນຕາ ເປບຊີ ໂຄຄາໂຄລາ ແລະອື່ນໆ.
ລາຍລະອຽດຂອງການເກັບພາສີ ມີດັ່ງນີ້: ນ້ຳອັດລົມ (ນ້ຳຫວານ) ທີ່ມີທາດນ້ຳຕານປະສົມ 5 ກຼາມ ໃນ 100 ມີລີລິດ (100 ml) ຈະຕ້ອງໄດ້ເສຍພາສີ 18 ເພັນຕໍ່ນ້ຳຫວານ 1 ລິດ (18 pence 1 ປອນຂອງອັງກິດ ມີ 100 pence) ຫຼື ປະມານ 200 ກວ່າກີບ ແຕ່ຖ້າມີທາດນ້ຳຕານກວ່າ 8 ກຼາມຂຶ້ນໄປໃນ 100 ມີລີກຼາມແລ້ວ ອັດຕາພາສີກໍຈະເພີ່ມຂຶ້ນເປັນ 24 ເພັນ ສຳລັບນ້ຳຫວານ 1 ລິດ ພໍມາດຕະການດັ່ງກ່າວຖືກປະກາດອອກມາ ທາງບໍລິສັດນ້ຳຫວານລະດັບຫົວແຖວໃນອັງກິດ ເຊັ່ນ: ແຟນຕາ ຣີເບນາ (Fanta Ribena) ແລະ ລູໂຄເຊດ (Lucozade) ກໍໄດ້ຕັດບໍລິມາດນ້ຳຕານລົງໃນຜະລິດຕະພັນຂອງຕົນ ເພື່ອຫຼີກລ່ຽງການເສຍພາສີ ສ່ວນບໍລິສັດນ້ຳຫວານ ເປບຊີ ແລະ ໂຄຄາໂຄລາ ນັ້ນ ຍອມເສຍພາສີ ແຕ່ບໍ່ຍອມຫຼຸດທາດນ້ຳຕານລົງໃນຜະລິດຕະພັນຂອງຕົນ ເຊິ່ງບັນຈຸທາດນ້ຳຕານຫຼາຍກວ່າ 10 ກຼາມຕໍ່ 100 ມີລີລິດ ໃນປັດຈຸບັນ ທາງການຂອງຫຼາຍສິບປະເທດໃນທົ່ວໂລກ ໄດ້ເອົາມາດຕະການເກັບພາສີທາດຫວານໃນເຄື່ອງດື່ມປະເພດນ້ຳອັດລົມລົງ ໃນນັ້ນ ລວມທັງຫວຽດນາມ ແລະ ອິນເດຍ ໃນອາຊີຂອງພວກເຮົາ ໂດຍມີເປົ້າໝາຍຫຼຸດຄວາມສ່ຽງເກີດພະຍາດຕຸ້ຍ ເຊິ່ງເປັນຊະນວນກໍ່ໃຫ້ເກີດສາລະພັດພະຍາດຕາມມາ.
ທີ່ ຟິລິບປິນ: ນັບແຕ່ໄດ້ຖືກເລືອກເປັນປະທານາທິບໍດີໃນກາງປີ 2016 ເປັນຕົ້ນມາ ທ່ານ ໂຣດິໂກ ດູເຕັກເຕ ຂອງຟິລິບປິນ ກໍໄດ້ປະກາດຜະເດັດເສິກກັບຢາເສບຕິດແບບບໍ່ໄວ້ໜ້າໃຜໃນທົ່ວປະເທດ ເຊິ່ງເຮັດໃຫ້ຜູ້ມີສ່ວນພົວພັນກັບອາຊະຍາກຳຢາເສບຕິດ ຈຳນວນກວ່າ 4.500 ຄົນ ຖືກຂ້າຕາຍໃນການປະທະກັນກັບເຈົ້າໜ້າທີ່ຕຳຫຼວດ (ສະຖິຕິໃນກາງປີ 2018) ບັ້ນຮົບຕ້ານຢາເສບຕິດນີ້ ໄດ້ກໍ່ໃຫ້ເກີດບັນຫາຄວາມບໍ່ປອດໄພຈາກກຸ່ມຄົນຮ້າຍ ນອກນັ້ນຍັງໄດ້ຮັບຄຳຕຳນິຕິຕຽນຈາກບັນດາປະເທດຕາເວັນຕົກ ແລະ ກຸ່ມສິດທິມະນຸດ ແຕ່ທ່ານປະທານາທິບໍດີ ດູເຕັກເຕ ນອກຈາກບໍ່ສົນແລ້ວ ຍັງໄດ້ປະກາດຢ່າງແຈ່ມແຈ້ງວ່າ ຈະເດີນໜ້າປາບອາຊະຍາກຳຢາເສບຕິດຕໍ່ໄປ ຈົນຮອດມື້ສຸດທ້າຍຂອງອາຍຸການເປັນປະທານາທິບໍດີຂອງທ່ານ (ອາຍຸການຂອງປະທານາທິບໍດີຟິລິບປິນນັ້ນແມ່ນ 6 ປີ).
ແນວໃດກໍດີ ບັນຍາກາດແຫ່ງຄວາມບໍ່ປອດໄພນັ້ນ ບໍ່ພຽງແຕ່ເກີດຈາກກຸ່ມຄົນຮ້າຍ ແຕ່ຍັງເກີດຈາກນ້ຳມືຂອງເຈົ້າໜ້າທີ່ຕຳຫຼວດທີ່ຮັບຜິດຊອບປາບຢາເສບຕິດ ເຈົ້າໜ້າທີ່ຕຳຫຼວດພວກນີ້ ສວຍໃຊ້ອຳນາດທີ່ມີເກີນຂອບເຂດ ເພື່ອຜົນປະໂຫຍດສ່ວນຕົວ ເຊັ່ນ: ມີການພົວພັນກັບຄະດີຂົ່ມຂືນ ການລັກພາຕົວ ແລະ ປຸ້ນຊັບ ຂ່າວບອກວ່າ: ເຈົ້າໜ້າທີ່ຕຳຫຼວດທີ່ມີຄະດີຈຳນວນກວ່າ 100 ຄົນ ຖືກນຳຕົວໄປພົບທ່ານ ດູເຕັກເຕ ທີ່ທຳນຽບປະທານາທິບໍດີ ໃນວັນທີ 7 ສິງຫາ 2018 ທ່ານປະທານາທິບໍດີໄດ້ຖະແຫຼງຜ່ານສື່ໂທລະພາບວ່າ ຖ້າເຈົ້າໜ້າທີ່ຕຳຫຼວດກຸ່ມນີ້ຍັງສືບຕໍ່ກະທຳຜິດ ທ່ານຈະສັ່ງປະຫານຊີວິດທັນທີ ແລະ ວ່າທ່ານມີໜ່ວຍຕິດຕາມການປະພຶດຂອງຄົນກຸ່ມນີ້ໄປຕະຫຼອດຊີວິດ.