ບໍລິສັດ ລ້ານຊ້າງມິເນໂຣນສ໌ລິມິເຕັດ ບໍ່ຄຳ-ທອງເຊໂປນ (ລຊມລ) ໄດ້ມອບເງິນ 5.582.907,81 ໂດລາສະຫະລັດ ສຳລັບຄ່າຊັບພະຍາກອນແຮ່ທາດໄຕມາດທີ 4 ປີ 2021 ຈາກການຜະລິດ-ຈຳໜ່າຍໂລຫະຄຳ ແລະ ທອງ (ລວມທັງໝົດຫຼາຍກວ່າ 17,24 ລ້ານໂດລາ ປີ 2021) ເຊິ່ງລວມຍອດລາຍຮັບມອບໃຫ້ລັດຖະບານລາວປີ 2021 (ລວມທັງອາກອນຕ່າງໆ ແລະ ຄ່າຊັບພະຍາກອນແຮ່ທາດ) ຫຼາຍກວ່າ 40,84 ລ້ານໂດລາ.
ພິທີມອບຈັດຂຶ້ນວັນທີ 20 ເມສາ 2022 ຜ່ານມາ ທີ່ກະຊວງການເງິນ ກ່າວມອບໂດຍທ່ານ ສະໝານ ອະເນກາ ຜູ້ອຳນວຍການໃຫຍ່ບໍລິສັດ ລ້ານຊ້າງມິເນໂຣນສ໌ ລິມິເຕັດ ບໍ່ຄຳ-ທອງເຊໂປນ (ລຊມລ) ແລະ ກ່າວຮັບໂດຍທ່ານ ພຸດທະສິນ ເຮືອງທະວົງ ຫົວໜ້າກົມຄຸ້ມຄອງຊັບສິນແຫ່ງລັດ ກະຊວງການເງິນ ມີພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ນັບເປັນນິມິດໝາຍທີ່ດີ ທີ່ທາງຂັ້ນສູນກາງໄດ້ເລີ່ມຕົ້ນມີການກະຈາຍລາຍຮັບລົງສູ່ທ້ອງຖິ່ນ ເຊິ່ງທາງກົມຄຸ້ມຄອງຊັບສິນແຫ່ງລັດ ໄດ້ແຈ້ງໃຫ້ຊາບວ່າ ລາຍຮັບຈາກຄ່າຊັບພະຍາກອນແຮ່ທາດປີ 2021 ໄດ້ຖືກແບ່ງປັນລົງສູ່ແຂວງສະຫວັນນະເຂດປະມານ 7,5 ລ້ານໂດລາ ເຊິ່ງໄດ້ກາຍເປັນຄວາມພາກພູມໃຈຂອງຜູ້ພັດທະນາ ກໍຄືບໍລິສັດ ລຊມລ ແລະ ແຂວງສະຫວັນນະເຂດ ກໍຄືແຂວງເຈົ້າພາບ ນັບແຕ່ເລີ່ມມີການຂຸດຄົ້ນ-ປຸງແຕ່ງ-ຜະລິດຄຳ-ທອງປີ 2003 ເປັນຕົ້ນມາ ບໍລິສັດ ລຊມລ ໄດ້ປະກອບສ່ວນພັນທະຂອງຕົນທີ່ເປັນລາຍຮັບໂດຍກົງໃຫ້ລັດຖະບານລາວ ເປັນເງິນທັງໝົດຫຼາຍກວ່າ 1,6 ຕື້ໂດລາ ລວມທັງຄ່າຊັບພະຍາກອນແຮ່ທາດທັງໝົດຫຼາຍກ່ວາ 383 ລ້ານໂດລາ.