ສະພາປະຊາຊົນນະຄອນຫຼວງວຽງຈັນ (ສປ ນວ) ຈັດເຝິກອົບຮົມການສ້າງຄວາມເຂັ້ມແຂງໃຫ້ພະນັກງານ-ລັດຖະກອນ ພາຍໃນ ສປ ນວ ແລະ ຄະນະຊ່ວຍວຽກຂອງຄະນະສະມາຊິກ ສປ ນວ ປະຈຳເຂດເລືອກຕັ້ງເມືອງ ທົ່ວ ນວ ຂຶ້ນວັນທີ 20-22 ເມສາ 2022 ຢູ່ແຂວງວຽງຈັນ ໂດຍເປັນປະທານຂອງທ່ານນາງ ລໍາພອຍ ສີອັກຄະຈັນ ຮອງປະທານ ສປ ນວ ມີທ່ານ ບຸນທາມ ພຸດທະວົງສາ ຮອງປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ຮອງປະທານ ສປ ນວ ພ້ອມດ້ວຍກຳມະການຄະນະປະຈຳ ສປ ນວ ຮອງປະທານຄະນະກຳມະການ ສປ ນວ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານນາງ ລຳພອຍ ສີອັກຄະຈັນ ກ່າວວ່າ: ຈຸດປະສົງຂອງຊຸດເຝິກອົບຮົມຄັ້ງນີ້ ເພື່ອຍົກລະດັບຄວາມຮູ້ຄວາມສາມາດໃນການເປັນເສນາທິການດ້ານຕ່າງໆແກ່ພະນັກງານວິຊາການໃຫ້ມີປະສິດທິຜົນເພີ່ມຂຶ້ນ ທັງຢູ່ໃນໄລຍະທີ່ພວກເຮົາກໍາລັງກະກຽມກອງປະຊຸມສະໄໝສາມັນ ເທື່ອທີ 3 ຂອງ ສປ ນວ ຊຸດທີ II ການເຝິກອົບຮົມກ່ຽວກັບການປະຕິບັດພາລະບົດບາດການເປັນເສນາທິການໃຫ້ສະພາປະຊາຊົນ ຈຶ່ງມີຄວາມສໍາຄັນຢ່າງຍິ່ງ ແລະ ເປັນໂອກາດດີທີ່ຈະໄດ້ຍົກລະດັບຄວາມຮູ້ ຄວາມສາມາດ ແລະ ແລກປ່ຽນຄວາມຄິດເຫັນເຊິ່ງກັນ ແລະ ກັນ ໃນການປະຕິບັດໜ້າທີ່ວຽກງານໃນໄລຍະຜ່ານມາ.
ການປະຕິບັດພາລະບົດບາດເປັນເສນາທິການຮອບດ້ານໃຫ້ສະພາປະຊາຊົນ ເປັນຕົ້ນ ການກະກຽມເນື້ອໃນກອງປະຊຸມຂອງສະພາປະຊາຊົນ ການຄົ້ນຄວ້າ ວິເຄາະ-ວິໄຈບັນຫາ ເພື່ອສະໜອງຂໍ້ມູນ-ຂ່າວສານໃຫ້ການນໍາ ສປ ນວ ໃນໄລຍະຜ່ານມາ ມີຫຼາຍດ້ານທີ່ມີການຫັນປ່ຽນຢ່າງຕັ້ງໜ້າ ແລະ ໄດ້ຮັບປະສິດທິຜົນເປັນກ້າວໆ ສະແດງອອກ ການດໍາເນີນກອງປະຊຸມຂອງສະພາປະຊາຊົນ ແລະ ກອງປະຊຸມຄະນະປະຈໍາ ລ້ວນແຕ່ໄດ້ຮັບຜົນສໍາເລັດຕາມຄາດໝາຍທີ່ວາງໄວ້ ຄຽງຄູ່ກັບຜົນສໍາເລັດດັ່ງກ່າວ ການປະຕິບັດພາລະບົດບາດຂອງເສນາທິການຈໍານວນໜຶ່ງຍັງພົບຄວາມຫຍຸ້ງຍາກຫຼາຍບັນຫາ ແລະ ບໍ່ທັນກໍາແໜ້ນໄດ້ ເຖິງພາລະບົດບາດຂອງສະພາປະຊາຊົນ ທີ່ໄດ້ກໍານົດໄວ້ໃນກົດໝາຍສະພາປະຊາຊົນຂັ້ນແຂວງ ເວົ້າສະ ເພາະພາລະບົດບາດຂອງບັນດາກົງຈັກການຈັດຕັ້ງພາຍໃນຂອງສະພາປະຊາຊົນທີ່ຕົນຮັບຜິດຊອບ ເຮັດໃຫ້ການເຄື່ອນໄຫວວຽກງານບາງດ້ານຊັກຊ້າ ການຂຽນເອກະສານບໍ່ທັນລະອຽດ ໂດຍສະເພາະການສ້າງເອກະສານທາງລັດຖະການ ການບັນທຶກ ການສ້າງແຜນການ ການສະຫຼຸບສັງລວມ ແລະ ການວິເຄາະ-ວິໄຈບັນຫາຕໍ່ຜົນຂອງການຕິດຕາມກວດກາ ບັນດາເນື້ອໃນທີ່ນໍາເຂົ້າພິຈາລະນາໃນກອງປະຊຸມຂອງສະພາປະຊາຊົນຍັງບໍ່ທັນລະອຽດ ເລິກເຊິ່ງ ການສະແດງທັດສະນະວິຊາການຕໍ່ເນື້ອໃນຕ່າງໆຍັງມີໜ້ອຍ.
ຊຸດເຝິກອົບຮົມຄັ້ງນີ້ ຈະໄດ້ແລກປ່ຽນຄໍາຄິດເຫັນ ແລະ ສ້າງຄວາມເປັນເອກະພາບຕໍ່ເນື້ອໃນ ຄື: ບົດຮຽນ ແລະ ວິທີການຂຽນແຜນການລົງຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ ບົດຮຽນ ແລະ ວິທີການຂຽນແຜນການລົງຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ກົດໝາຍ ແລະ ນິຕິກໍາໃຕ້ກົດໝາຍ ບົດຮຽນ ແລະ ວິທີການຂຽນແຜນການ ລົງຕິດຕາມກວດກາຄໍາຮ້ອງທຸກ ແລະ ຄໍາສະເໜີຂອງປະຊາຊົນ ບົດຮຽນການຕິດຕາມກວດກາວຽກງານ ໃນຂົງເຂດເສດຖະກິດ ຄວາມຮູ້ພື້ນຖານດ້ານພິທີການ ແລະ ມາລະຍາດທາງສັງຄົມ ຄວາມຮູ້ພື້ນຖານໃນການບໍາລຸງຮັກສາ ແລະ ການແກ້ໄຂບັນຫາເບື້ອງຕົ້ນໃນການນໍາໃຊ້ອຸປະກອນໄອທີພາຍໃນຫ້ອງການ ແລະ ເຜີຍແຜ່ມະຕິຂອງຄະນະປະຈໍາ ສປ ນວ ສະບັບເລກທີ 066/ຄປຈ ລົງວັນທີ 13 ສິງຫາ 2021 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະສະມາຊິກ ສປ ນວ ປະຈໍາເຂດເລືອກຕັ້ງເມືອງ.
ຂ່າວ – ພາບ : ສະບາໄພ