ວັນທີ 19 ເມສາ 2022 ທີ່ຄະນະຈັດຕັ້ງສູນກາງພັກ (ຄຈສພ) ໄດ້ຈັດກອງປະຊຸມສະຫຼຸບແຜນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2021 ຂອງບັນດາໜ່ວຍພັກທີ່ຂຶ້ນກັບອົງຄະນະພັກຄະນະຈັດຕັ້ງສູນກາງພັກ ແລະ ປາຖະກະຖາວັນສ້າງຕັ້ງຄະນະຈັດຕັ້ງສູນກາງພັກ ຄົບຮອບ 67 ປີ (25/3/1955-25/3/2022) ໂດຍເປັນປະທານຂອງສະຫາຍນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ ເລຂາທິການສູນກາງພັກ ເລຂາຄະນະພັກ ຫົວໜ້າ ຄຈສພ ມີຮອງຫົວໜ້າ ຄຈສພ ມີຄະນະພັກ ຄະນະໜ່ວຍພັກບັນດາກົມ ແລະ ສະມາຊິກພັກເຂົ້າຮ່ວມ.
ກອງປະຊຸມ ໄດ້ສະຫຼຸບຕີລາຄາການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2021 ໂດຍໄດ້ຍົກໃຫ້ເຫັນດ້ານດີ ດ້ານອ່ອນ ຂໍ້ຄົງຄ້າງ ສາເຫດ ບົດຮຽນທີ່ຖອດຖອນໄດ້ ແລະ ພ້ອມກັນຄົ້ນຄວ້າປະກອບຄຳຄິດຄຳເຫັນຢ່າງກົງໄປກົງມາ ເພື່ອວາງທິດທາງແຜນການໃນຕໍ່ໜ້າ ຜ່ານການຕີລາຄາຄຸນນະພາບ ແລະ ແບ່ງປະເພດໜ່ວຍພັກຈາກ 8 ໜ່ວຍພັກ ສາມາດຢັ້ງຢືນເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ໄດ້ 8 ໜ່ວຍພັກຄື:
- ໜ່ວຍພັກກົມກໍ່ສ້າງພັກ
- ໜ່ວຍພັກກົມກໍ່ສ້າງພະນັກງານ
- ໜ່ວຍພັກກົມຈັດຕັ້ງ-ພະນັກງານ
- ໜ່ວຍພັກກົມຄຸ້ມຄອງພະນັກງານ
- ໜ່ວຍພັກກົມປ້ອງກັນພັກ-ພະນັກງານ
- ໜ່ວຍພັກກົມໂຄສະນາກໍ່ສ້າງພັກ-ພະນັກງານ
- ໜ່ວຍພັກກົມກົງຈັກການຈັດຕັ້ງ ແລະ ກົດລະບຽບພັກ
- ໜ່ວຍພັກຫ້ອງການ
ໃນກອງປະຊຸມຄັ້ງນີ້ ຍັງໄດ້ຕີລາຄາຄຸນນະພາບແບ່ງປະເພດສະມາຊິກພັກ ທີ່ເປັນສະມາຊິກພັກປະເພດແຂງ 109 ສະຫາຍ ຍິງ 47 ສະຫາຍ ເທົ່າກັບ 91% ປະເພດກາງ 13 ສະຫາຍ ຍິງ 8 ສະຫາຍ ເທົ່າກັບ 8,95%.
# ຂ່າວ – ພາບ : ຊິລິການດາ