ກະຊວງແຜນການ ແລະ ການລົງທຶນ (ກຜທ) ຮ່ວມກັບອົງການຮ່ວມມືເພື່ອການພັດທະນາຂອງລຸກຊໍາບວກ (LuxDev) ແລະ ອົງການຮ່ວມມືເພື່ອການພັດທະນາຂອງສະວິດ (SDC) ຈັດກອງປະຊຸມຄະນະຊີ້ນຳລະດັບຊາດ ຂອງແຜນງານການພັດທະນາທ້ອງຖິ່ນຢູ່ 4 ແຂວງເປົ້າໝາຍ: ແຂວງບໍ່ແກ້ວ ບໍລິຄຳໄຊ ຄຳມ່ວນ ແລະ ແຂວງວຽງຈັນ (ແຜນງານລາວ/030) ໂດຍເປັນປະທານຂອງທ່ານ ນາງ ພອນວັນ ອຸທະວົງ ຮອງລັດຖະມົນຕີ ກະຊວງແຜນການ ແລະ ການລົງທຶນ ມີທ່ານ ແຊມ ຊຣາຍເນີ ອຸປະທູດແຫ່ງລາຊະອານາຈັກລູກຊໍາບວກ ປະຈຳລາວ ທ່ານຮອງເຈົ້າແຂວງຈາກ 4 ແຂວງເປົ້າໝາຍ ທ່ານ ຊ໋ອງ ຝຣັງຊົວ ກູເອນ໊ອດ ຫົວໜ້າການຮ່ວມມືພາກພື້ນແມ່ນ້ຳຂອງ SDC ແລະ ຜູ້ຕາງໜ້າຈາກພາກສ່ວນກ່ຽວຂ້ອງຂັ້ນສູນກາງ ແລະ ທ້ອງຖິ່ນ ເຂົ້າຮ່ວມ.
![](https://v2.vientianemai.net/wp-content/uploads/2022/04/275675134_692142711908471_6550376082023629160_n-1024x540.jpg)
ຈຸດປະສົງ ເພື່ອທົບທວນຜົນສຳເລັດ ຄວາມຄືບໜ້າ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານໃນໄລຍະໜຶ່ງປີທີ່ຜ່ານມາ ເພື່ອຖອດຖອນບົດຮຽນ ແລະ ກໍານົດແຜນດຳເນີນງານປີ 2022 ເຊິ່ງເປັນປີສຸດທ້າຍ ໃຫ້ມີຄວາມໂລ່ງລ່ຽນ ພ້ອມນີ້ ກໍໄດ້ປຶກສາຫາລືກ່ຽວກັບການຮ່ວມມື ສປປ ລາວ-ລຸກຊຳບວກ ໃນໄລຍະໃໝ່ 2023-2027 ແຜນງານລາວ/030 ໄດ້ເລີ່ມຕົ້ນໃນປີ 2017 ແລະ ມີງົບປະມານທັງໝົດຫຼາຍກວ່າ 33 ລ້ານເອີໂຣ ປະມານ 426,1 ຕື້ກີບ ລວມທັງການສະໜັບສະໜູນເພີ່ມເຕີມຈາກ SDC ແຕ່ປີ 2020 ເປັນຕົ້ນມາ ເປົ້າໝາຍຕົ້ນຕໍຂອງແຜນງານດັ່ງກ່າວ ແມ່ນເພື່ອຫຼຸດຜ່ອນຄວາມທຸກຍາກ ແລະ ຍົກສູງຊີວິດການເປັນຢູ່ຂອງປະຊາຊົນໃນ 229 ບ້ານເປົ້າໝາຍ ຄຽງຄູ່ກັບການ ສະໜັບສະໜູນ ສປປ ລາວ ໃນການສ້າງຄວາມເຂັ້ມແຂງຂົງເຂດການພັດທະນາທ້ອງຖິ່ນ ຢູ່ຂັ້ນສູນກາງ ແລະ ທ້ອງຖິ່ນ.
![](https://v2.vientianemai.net/wp-content/uploads/2022/04/275677662_333276448784735_7075761789106333551_n-1024x831.jpg)
ທ່ານ ນາງ ພອນວັນ ອຸທະວົງ ໄດ້ກ່າວເນັ້ນວ່າ ແຜນງານລາວ/030 ເປັນແຜນງານການຮ່ວມມືຕົວແບບທີ່ສຸມໃສ່ພາກປະຕິບັດຕົວຈິງ ໂດຍສະເພາະກິດຈະກຳພາກສະໜາມ ສົ່ງເສີມການສ້າງຄວາມອາດສາມາດ ແລະ ການມີສ່ວນຮ່ວມຂອງພາກສ່ວນກ່ຽວຂ້ອງຢູ່ທຸກລະດັບ ໂດຍສະເພາະ ປະຊາຊົນຜູ້ໄດ້ຮັບຜົນປະໂຫຍດ ເພື່ອຮັບປະກັນການພັດທະນາແບບຍືນຍົງໃນໄລຍະຍາວ ຍິ່ງໄປກວ່ານັ້ນ ແຜນງານລາວ/030 ຍັງປະກອບສ່ວນຢ່າງຕັ້ງໜ້າ ຕໍ່ການບັນລຸບັນດາບູລິມະສິດຂອງແຜນພັດທະນາ ເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ກໍຄືຄັ້ງຜ່ານມາ ເຖິງຢ່າງໃດກໍຕາມ ແຜນງານລາວ/030 ຍັງຕ້ອງປະເຊີນໜ້າກັບສິ່ງທ້າທາຍຫຼາຍຢ່າງ ເປັນຕົ້ນແມ່ນດ້ານກໍານົດເວລາໃນການຈັດຕັ້ງປະຕິບັດບັນດາກິດຈະກໍາທີ່ຍັງເຫຼືອໃຫ້ສໍາເລັດ ແລະ ການແຜ່ລະບາດຂອງພະຍາດ COVID-19 ທີ່ສົ່ງຜົນກະທົບເຮັດໃຫ້ບາງໜ້າວຽກຕ້ອງແກ່ຍາວອອກໄປ.
![](https://v2.vientianemai.net/wp-content/uploads/2022/04/277327995_1007782289866163_1614629578640980181_n.jpg)
ທ່ານ ແຊມ ຊຣາຍເນີ ໄດ້ກ່າວເນັ້ນໜັກເຖິງຄວາມສໍາຄັນຂອງການຮ່ວມມືລະຫວ່າງ ສປປ ລາວ ແລະ ລູກຊໍາບວກ ເຖິງວ່າແຜນງານລາວ/030 ຈະພົບກັບຂໍ້ຫຍຸ້ງຍາກຫຼາຍຢ່າງຈາກຜົນກະທົບຂອງການລະບາດພະຍາດ ໂຄວິດ-19 ແຕ່ມັນກໍສະແດງໃຫ້ເຫັນເຖິງຄວາມສາມາດໃນການຮັບມືແກ້ບັນຫາຢ່າງມີປະສິດທິພາບ ຍ້ອນການຮ່ວມມືທີ່ເຂັ້ມແຂງ ເພື່ອຮັບປະກັນການພັດທະນາທ້ອງຖິ່ນທີ່ຍືນຍົງ ກໍຄືການຫຼຸດຜ່ອນຄວາມທຸກຍາກ ແລະ ບໍ່ປະປ່ອຍໃຜໄວ້ຂ້າງຫຼັງ ແລະ ພ້ອມສືບຕໍ່ໃຫ້ການສະໜັບສະໜູນແກ່ແຜນງານລາວ/030 ໃນໄລຍະໃໝ່ ແລະ ໃນອະນາຄົດ.
# ຂ່າວ – ພາບ : ບຸນມີ