ວັນທີ 5 ເມສາ 2022 ຜ່ານມາ ອຳນາດການປົກຄອງແຂວງສະຫວັນນະເຂດ ແລະ ບໍລິສັດ ລ້ານຊ້າງມິເນໂຣນສ໌ລິມິເຕັດ (LXML) ບໍ່ຄຳ-ທອງເຊໂປນ ໄດ້ລົງນາມບົດບັນທຶກຄວາມເຂົ້າໃຈເພື່ອຍົກລະດັບເສັ້ນທາງຂອງລັດ ເລກທີ 28A ປູຢາງສອງຊັ້ນ ຍາວ 41,56 ກິໂລແມັດ ແຕ່ບ້ານນາບໍ່ ຫາເມືອງວິລະບູລີ ເຊິ່ງເປັນທີ່ຕັ້ງຂອງບໍ່ຄຳ-ທອງເຊໂປນ ຮ່ວມລົງນາມສະຫວ່າງທ່ານ ສະໝານ ອະເນກາ ຜູ້ອຳນວຍການໃຫຍ່ບໍລິສັດ ລ້ານຊ້າງ ມິເນໂຣນສ໌ລິມິເຕັດ ແລະ ທ່ານ ວາລີຍະ ສີຈັນທອງທິບ ຫົວໜ້າພະແນກແຜນການ ແລະ ການລົງທຶນແຂວງສະຫວັນນະເຂດ ມີທ່ານ ວຽງທະວີສອນ ເທບພະຈັນ ຮອງເຈົ້າແຂວງສະຫວັນະເຂດ ພະແນກການອ້ອມຂ້າງແຂວງ ແລະ ພາກສ່ວນທີ່ກ່ຽວຂ້ອງສອງຝ່າຍເຂົ້າຮ່ວມ.
ໃນຜ່ານມາ ເສັ້ນທາງ 28A ເປັນເສັ້ນທາງປູຢາງທີ່ບໍລິສັດ LXML ສ້າງຂຶ້ນປີ 2005 ເພື່ອເຊື່ອມຕໍ່ກັບເສັ້ນທາງເລກທີ 9 ຈາກບ້ານນາບໍ່ ເມືອງເຊໂປນ ຫາເມືອງວິລະບູລີ ແລະ ເປັນແລວທາງເສດຖະກິດຕາເວັນອອກຕາເວັນຕົກທີ່ສຳຄັນໃຫ້ແກ່ການຂົນສົ່ງສິນຄ້າ ແລະ ການພັດທະນາ ໂດຍເຊື່ອມຕໍ່ລາວກັບຫວຽດນາມ ແລະ ໄທ ກໍຄືເປີດທາງສູ່ເຂດຊົນນະບົດໃຫ້ມີການຜະລິດກະສິກຳ ແລະ ເສດຖະກິດອື່ນໆໃຫ້ໄດ້ດີ ປັດຈຸບັນ ເສັ້ນນທາງໄດ້ເປ່ເພຫຼາຍບ່ອນ ຍ້ອນນໍາໃຊ້ມາຫຼາຍກວ່າ 10 ປີ ເຮັດໃຫ້ການສັນຈອນຂົນສົ່ງສິນຄ້າ ເພື່ອຮັບໃຊ້ໃນການຜະລິດ ແລະ ການດຳລົງຊີວິດຂອງປະຊາຊົນພົບຄວາມຫຍຸ້ງຍາກ ໂດຍສະເພາະໃນລະດູຝົນ ໂຄງການຍົກລະດັບເສັ້ນທາງຈະໄດ້ນຳໃຊ້ເງິນຈາກກອງທຶນຟື້ນຟູໂຄງການບໍ່ຄຳ-ທອງເຊໂປນ 5 ລ້ານໂດລາສະຫະລັດ ເປັນເງິນສະສົມທີ່ບໍລິສັດເປັນຜູ້ຮັກສາໄວ້ເພື່ອນຳໃຊັໃນການຟື້ນຟູສະພາບແວດລ້ອມ ແລະ ສັງຄົມພາຍຫຼັງການປິດບໍ່ໃນອະນາຄົດ.
ກ່ອນປີ 2000 ເມືອງວິລະບູລີຍັງຖືວ່າເປັນເຂດຊົນນະບົດຫ່າງໄກສອກຫຼີກ ເສັ້ນທາງດິນດັ້ງເດີມຄັບແຄບ ແລະ ມີນ້ຳຖ້ວມໃນລະດູຝົນ ເຮັດໃຫ້ທາງເລືອກໃນການຂົນສົ່ງມີຄວາມຈຳກັດ ເສັ້ນທາງກໍເປັນບວກເປັນຕົມ ທີ່ຫຍຸ້ງຍາກລຳບາກທີ່ສຸດ ການເດີນທາງດ້ວຍລົດຈາກບ້ານນາບໍ່ ຫາເມືອງວິລະບູລີໃຊ້ເວລາ 2 ວັນ ນອກນັ້ນ ເມືອງວິລະບູລີເປັນເຂດທີ່ໄດ້ມີການຖິ້ມລະບີດຢ່າງຫຼວງຫຼາຍ ແລະ ຜົນກະທົບທີ່ຕາມມາຈາກລະເບີດຝັງດິນທີ່ບໍ່ທັນແຕກ ກໍເປັນອັນຕະລາຍຢ່າງມະຫາສານ ປັດຈຸບັນ ທຸກບ້ານຢູ່ເມືອງວິລະບູລີມີເສັ້ນທາງເຂົ້າເຖິງ ນັບແຕ່ເລີ່ມດຳເນີນການຂຸດຄົ້ນ-ຜະລິດຄຳ-ທອງປີ 2003 ເປັນຕົ້ນມາ LXML ໄດ້ລົງທຶນປະມານ 20 ລ້ານໂດລາ ເພື່ອກໍ່ສ້າງ ແລະ ບຳລຸງຮັກສາເສັ້ນທາງທ້ອງຖິ່ນພາຍໃນເມືອງ ລວມທັງເສັ້ນທາງ 28A ນອກນັ້ນ ຍັງສະໜອງທຶນຈາກກອງທຶນພັດທະນາຊຸມຊົນມູນຄ່າ 750.000 ໂດລາຕໍ່ປີໃຫ້ເມືອງວິລະບູລີ ເຊິ່ງສ່ວນໜຶ່ງຂອງທຶນ ຖືກແບ່ງເຂົ້າໃນການກໍ່ສ້າງ ແລະ ສ້ອມແປງເສັ້ນທາງທ້ອງຖິ່ນບວກກັບໂຄງການບໍລິການດ້ານສາທາລະນະສຸກພື້ນຖານ ການສຶກສາ ແລະ ຄວາມໝັ້ນຄົງດ້ານສະບຽງອາຫານ ນອກນີ້ ບໍລິສັດຍັງລົງທຶນປະມານ 34 ລ້ານໂດລາ ກໍ່ສ້າງ ແລະ ບໍາລຸງຮັກສາຕາໜ່າງໄຟຟ້າແຫ່ງຊາດຈາກເມືອງທ່າແຂກເຖິງມະຫາໄຊ ດ້ວຍການຮ່ວມມືກັບລັດວິສາຫະກິດໄຟຟ້າລາວ.
ນັບແຕ່ເລີ່ມຂຸດຄົ້ນບໍ່ແຮ່ເປັນຕົ້ນມາ ບໍລິສັດໄດ້ສະໜອງລາຍຮັບໂດຍກົງຫຼາຍກວ່າ 1,6 ຕື້ໂດລາ ໃຫ້ລັດຖະບານລາວ ຜ່ານການຈ່າຍຄ່າພາສີຊັບພະຍາກອນແຮ່ທາດ ເງິນປັນຜົນ ແລະ ພາສີອາກອນຕ່າງໆ ສ່ວນຜົນປະໂຫຍດທາງອ້ອມ ເປັນຕົ້ນ ການສ້າງວຽກເຮັດງານທຳ ການຝຶກອົບຮົມ ແລະ ການສະໜັບສະ ໜູນທຸລະກິດທ້ອງຖິ່ນນັ້ນ ໄດ້ຫັນປ່ຽນເມືອງວິລະບູລີຈາກສະຖານະໜຶ່ງໃນເມືອງທີ່ທຸກຍາກທີ່ສຸດຂອງລາວສູ່ເມືອງທີ່ມີເສດຖະກິດຊົນນະບົດທີ່ຂະຫຍາຍຕົວຢ່າງວ່ອງໄວ.
# ຂ່າວ – ພາບ : ສົມສະຫວັນ