ວັນທີ 18 ພຶດສະພາ 2020 ເວລາປະມານ 12 ໂມງ 15 ນາທີ ໄດ້ເກີດເຫດໄຟໄໝ້ຮ້ານຂາຍວັດສະດຸກໍ່ສ້າງ ເຂດບ້ານໂພນຕ້ອງສະຫວາດ ເມືອງຈັນທະບູລີ ນະຄອນຫຼວງວຽງຈັນ ພາຍຫຼັງທີ່ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານອັກຄີໄພ ນວ ໄດ້ຮັບແຈ້ງ ກໍຮີບດ່ວນອອກໄປຫາຈຸດເກີດເຫດທັນທີ ພ້ອມລົດດັບເພີງຈຳນວນ 2 ຄັນ ແລະ ກຳລັງເຈົ້າໜ້າທີ່ຈຳນວນໜຶ່ງ.
ຈຸດເກີດເຫດເປັນເຮືອນຫ້ອງແຖວ 2 ຊັ້ນ ຈຳນວນ 3 ຫ້ອງແຖວຕິດກັນ ກໍ່ດ້ວຍຊີມັງ ເຈົ້າໜ້າທີ່ໃຊ້ເວລາປະມານ 20 ນາທີ ກໍສາມາດມອດໄຟໄດ້ສຳເລັດ ຜົນເສຍຫາຍໃນເປື້ອງຕົ້ນ ເຫັນວ່າຊັ້ນ 2 ຂອງຫ້ອງແຖວທັງ 3 ຫ້ອງ ແມ່ນໄດ້ຮັບຄວາມເສຍຫາຍຫຼາຍພໍສົມຄວນ ສ່ວນສາເຫດ ແລະ ມູນຄ່າຄວາມເສຍຫາຍຂອງການເກີດອັກຄີໄພຄັ້ງນີ້ ຍັງຢູ່ໃນຂັ້ນຕອນຂອງການສຶບສວນຂອງທາງເຈົ້າໜ້າທີ່ຕຳຫຼວດ.