ກອງປະຊຸມຄະນະກຳມະການແຫ່ງຊາດ ເພື່ອການຄວບຄຸມຢາສູບ ຈັດຂຶ້ນວັນທີ 5 ເມສາ 2022 ທີ່ກະຊວງສາທາລະນະສຸກ ເປັນປະທານຂອງທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນສຸກ ປະທານຄະນະກຳມະການແຫ່ງຊາດເພື່ອການຄວບຄຸມຢາສູບ ມີຮອງລັດຖະມົນຕີ ຫົວໜ້າກົມ ຮອງກົມ ແລະ ຂະແໜງການກ່ຽວຂ້ອງເຂົ້າຮ່ວມ.
![](https://v2.vientianemai.net/wp-content/uploads/2022/04/275785930_3416951525211389_5977182969761362089_n-1024x683.jpg)
ທ່ານ ບຸນແຝງ ພູມມະໄລສິດ ກ່າວວ່າ: ຢາສູບແມ່ນຜະລິດຕະພັນພິເສດ ເປັນສິນຄ້າເສບຕິດຊະນິດດຽວທີ່ຍັງຖືກກົດໝາຍ ແຕ່ເຮັດໃຫ້ຜູ້ບໍລິໂພກເປັນພະຍາດຮ້າຍແຮງ ແລະ ເສຍຊີວິດໄດ້ ໄລຍະຜ່ານມາ ຂະແໜງ ການກ່ຽວຂ້ອງກໍໄດ້ເອົາໃຈໃສ່ໃນການຄວບຄຸມດ້ວຍຫຼາຍຮູບແບບ ໂດຍໄດ້ສ້າງກົດໝາຍວ່າດ້ວຍການຄວບຄຸມຢາສູບທີ່ຖືກຮັບຮອງຈາກສະພາແຫ່ງຊາດ ແລະ ປະກາດໃຊ້ຢ່າງເປັນທາງການ ສະນັ້ນ ເພື່ອເຮັດໃຫ້ກົດໝາຍດັ່ງກ່າວສອດຄ່ອງກັບສະພາບການປ່ຽນແປງກ່ຽວກັບການຜະລິດ ການນຳເຂົ້າ ແລະ ການຊື້ຂາຍຜະລິດຕະພັນຢາສູບ ເຮັດໃຫ້ເນື້ອໃນຂອງກົດໝາຍຮັດກຸມ ສອດຄ່ອງກັບສະພາບຄວາມເປັນຈິງໃນປັດຈຸບັນ ເຮັດໃຫ້ອົງການທີ່ຮັບຜິດຊອບວຽກງານຄວບຄຸມຢາສູບ ສາມາດເຄື່ອນໄຫວວຽກງານຄວບຄຸມຢາສູບໄດ້ຢ່າງມີປະສິດທິພາບ ພ້ອມທັງຮັບປະກັນໃຫ້ຫຼຸດຜ່ອນການສູບຢາຂອງປະຊາຊົນ ຫຼຸດຜ່ອນການເປັນພະຍາດທີ່ເກີດຈາກການສູບຢາ ແລະ ຄ່າໃຊ້ຈ່າຍທີ່ບໍ່ຈຳເປັນຈາກການຊົມໃຊ້ຢາສູບ ສົ່ງເສີມໃຫ້ປະຊາຊົນທຸກຄົນມີສຸຂະພາບແຂງແຮງ ແລະ ມີອາຍຸຍືນ.
![](https://v2.vientianemai.net/wp-content/uploads/2022/04/275405502_2287063658108703_4873555274691284277_n-1024x683.jpg)
ຈາກຜົນການສຳຫຼວດແຫ່ງຊາດກ່ຽວກັບຢາສູບ ສະແດງໃຫ້ເຫັນວ່າ ອັດຕາການສູບຢາຂອງຄົນລາວຍັງສືບຕໍ່ເພີ່ມຂຶ້ນ ຈາກ 25,5% ໃນປີ 2012 ເປັນ 27,9% ໃນປີ 2015 ອີງຕາມການສຶກສາຂອງ UNDP ໃນປີ 2019 ຄິດໄລ່ຄ່າໃຊ້ຈ່າຍທາງກົງ ແລະ ທາງອ້ອມ ໃນການປິ່ນປົວພະຍາດທີ່ເກີດຈາກຢາສູບລະດັບຊາດປະມານ 350 ລ້ານໂດລາ ປະມານ 2,3% ຂອງ GDP ດັ່ງນັ້ນ ຖ້າບໍ່ມີມາດຕະການຄວບຄຸມທີ່ເໝາະສົມ ຈະເຮັດໃຫ້ພົນລະເມືອງເສຍຊີວິດຈາກການສູບຢາໃນໂລກຈະເພີ່ມຂຶ້ນເປັນ 10 ລ້ານຄົນຕໍ່ປີ ພາຍໃນປີ 2030 ສຳລັບ ສປປ ລາວມີຄົນເສຍຊີວິດຍ້ອນພະຍາດທີ່ເກີດຈາກການສູບຢາສູບປະມານ 7.000 ຄົນຕໍ່ປີ ຫຼື ປະມານ 19 ຄົົນຕໍ່ວັນ ຄຽງຄູ່ກັບການຄວບຄຸມຢາສູບ ຍັງມີສິ່ງທາຍຫຼາຍດ້ານ ເປັນຕົ້ນລາຄາຢາສູບຢູ່ ສປປ ລາວຍັງຕໍ່າເມື່ອທຽບກັບປະເທດອາຊຽນ ສະນັ້ນ ຕ້ອງໄດ້ສຸມໃສ່ແກ້ໄຂຈະໃຫ້ລາຄາຢາສູບສູງຂຶ້ນ ເພື່ອປົກປ້ອງຜູ້ທີ່ຈະເລີ່ມສູບຢາໃໝ່ ແລະ ຜູ້ສູບຢາທີ່ມີລາຍຮັບຕໍ່າ ໂດຍການເພີ່ມອາກອນຢາສູບໃຫ້ສູງຂຶ້ນ.
![](https://v2.vientianemai.net/wp-content/uploads/2022/04/277027852_1160736374686685_2129405015156245557_n-1024x683.jpg)
# ຂ່າວ-ພາບ : ອົ່ນ ໄຟສົມທອງ