ວັນທີ 13 ພຶດສະພາ 2020 ທີ່ສະພາແຫ່ງຊາດຫວຽດນາມ ໄດ້ມີພິທີມອບ-ຮັບເຄື່ອງຊ່ວຍເຫຼືອການແພດ ຈາກສະພາແຫ່ງຊາດຫວຽດນາມໃຫ້ລາວ ກຳປູເຈຍ ອິນໂດເນເຊຍ ມາເລເຊຍ ຟີລິບປິນ ສິງກະໂປ ແລະ ຍີ່ປຸ່ນ ເຄື່ອງຊ່ວຍເຫຼືອດັ່ງກ່າວ ເປັນຜ້າອັດປາກການແພດເພື່ອປ້ອງກັນພະຍາດ COVID-19 ກ່າວມອບໂດຍທ່ານ ຫງວຽນແຫ້ງຟຸກ ຫົວໜ້າຫ້ອງວ່າການສະພາແຫ່ງຊາດຫວຽດນາມ ແລະ ກ່າວຮັບໂດຍທ່ານ ແສງເພັດ ຮຸ່ງບຸນຍວງ ເອກອັກຄະລັດຖະທູດລາວ ປະຈຳຫວຽດນາມ ໄດ້ຕາງໜ້າໃຫ້ບັນດາເອກອັກຄະລັດຖະທູດຂອງປະເທດທີ່ໄດ້ຮັບເຄື່ອງຊ່ວຍເຫຼືອ ພ້ອມທັງຍົກໃຫ້ເຫັນຜົນກະທົບອັນຮ້າຍແຮງຂອງພະຍາດ COVID-19 ທີ່ກຳລັງແຜ່ລະບາດເປັນວົງກວ້າງໃນທົ່ວໂລກ ພ້ອມດຽວກັນນັ້ນ ຍັງໄດ້ຕີລາຄາສູງຕໍ່ຜົນສຳເລັດອັນໃຫຍ່ຫຼວງຂອງພັກ-ລັດຖະບານ ແລະ ປະຊາຊົນຫວຽດນາມຍາດມາໄດ້ ໃນການສະກັດກັ້ນ ຢັບຢັ້ງ ຈຳກັດພະຍາດທີ່ຮ້າຍແຮງດັ່ງກ່າວ ເຊິ່ງຫວຽດນາມໄດ້ກາຍເປັນແວ່ນແຍງ ແລະ ໄດ້ຮັບການຍ້ອງຍໍຊົມເຊີຍຈາກບັນດາປະເທດໃນໂລກ.
ເຖິງແມ່ນວ່າຫວຽດນາມຍັງປະສົບກັບຄວາມຫຍຸ້ງຍາກ ແລະ ໄດ້ຮັບຜົນກະທົບຈາກການລະບາດພະຍາດ COVID-19 ກໍຕາມ ແຕ່ຫວຽດນາມຍັງໄດ້ບິແບ່ງຊ່ວຍເຫຼືອທັງວັດຖຸອຸປະກອນການແພດ ແລະ ບົດຮຽນໃນການຕ້ານ ແລະ ສະກັດກັ້ນພະຍາດ COVID-19 ໃຫ້ແກຫຼາຍປະເທດ ເຊິ່ງໃນນັ້ນມີລາວເຮົາ.
ໂອກາດນີ້ ທ່ານ ແສງເພັດ ຮຸ່ງບຸນຍວງ ໄດ້ສະແດງຄວາມຮູ້ບຸນຄຸນ ແລະ ຂອບໃຈມາຍັງສະພາແຫ່ງຊາດຫວຽດນາມ ພັກ-ລັດຖະບານ ແລະ ປະຊາຊົນຫວຽດນາມ ໃນການຊ່ວຍເຫຼືອອຸປະກອນການແພດຄັ້ງນີ້ ແລະ ໄດ້ຢືນຢັນວ່າອຸປະກອນການແພດທີ່ໄດ້ຮັບການຊ່ວຍເຫຼືອຄັ້ງນີ້ ຈະຖືກນຳໃຊ້ເຂົ້າໃນການ ຕ້ານພະຍາດໂຄວິດ-19 ຢູ່ແຕ່ລະປະເທດທີ່ໄດ້ຮັບການຊ່ວຍເຫຼືອໃຫ້ມີປະສິດທິຜົນສູງ.
# ຂ່າວ & ພາບ: ສົມສະຫວັນ