ເພື່ອເປັນການຊຸກຍູ້ຊ່ວຍເຫຼືອ ແລະ ຮ່ວມໃຈຕ້ານການລະບາດຂອງພະຍາດໂຄວິດ-19 (Covid-19 ) ວັນທີ 18 ພຶດສະພາ 2020 ທີ່ສະຖາບັນພັດທະນາສືມືແຮງງານລາວ-ເກົາຫຼີ ອົງການກອຍກາປະຈຳລາວ ໄດ້ນຳເອົາອຸປະກອນການແພດ (ຜ້າອັດປາກ-ດັງ ເຈວລ້າງມື ເຄື່ອງວັດແທກອຸນຫະພູມ) ແລະ ເຄື່ອງບໍລິໂພກຈຳນວນໜຶ່ງ ມູນຄ່າ 280 ລ້ານກີບ ມາມອບໃຫ້ສະຖາບັນດັ່ງກ່າວ ກ່າວມອບໂດຍທ່ານ ຊັງ ຊູໂອ ຜູ້ຕາງໜ້າອົງການກອຍກາ ປະຈຳລາວ ແລະ ກ່າວຮັບໂດຍທ່ານ ບຸນມາ ສິດທິໂສມ ຫົວໜ້າສະຖາບັນພັດທະນາສືມືແຮງງານລາວ-ເກົາຫຼີ ມີທ່ານ ຊິນ ຊອງຊຸນ ເອກອັກຄະລັດຖະທູດ ສ ເກົາຫຼີ ປະຈຳລາວ ພ້ອມດ້ວຍພະນັກງານກ່ຽວຂ້ອງທັງສອງຝ່າຍເຂົ້າຮ່ວມ.
ສຳລັບອຸປະກອນການແພດ ຈະນຳໃຊ້ເຂົ້າໃນການກວດກາອຸນຫະພູມ ລ້າງມືກ່ອນເຂົ້າຫ້ອງຮຽນ ສ່ວນເຄື່ອງບໍລິໂພກຈະນຳມາແຈກຢາຍໃຫ້ກັບນັກສຶກສາພາຍໃນສະຖາບັນ ໂອກາດນີ້ ທ່ານ ບຸນມາ ສິດທິໂສມ ໄດ້ສະແດງຄວາມຂອບໃຈມາຍັງອົງການກອຍກາປະຈຳລາວ ທີ່ຍາມໃດກໍໄດ້ໃຫ້ການຊ່ວຍເຫຼືອສະຖາບັນຕະຫຼອດມາ ແລະ ຈະນຳເອົາເຄື່ອງຈຳນວນນີ້ມາແຈກຢາຍໃຫ້ນັກສຶກສາຢ່າງທົ່ວເຖິງ.
# ຂ່າວ & ພາບ: ອົ່ນ