ໂຮງຮຽນສິນໄຊ ສຸມໃສ່ປ້ອງກັນພະຍາດໂຄວິດຢ່າງເຂັ້ມງວດ

ອີງຕາມແຈ້ງການເລກທີ 524/ສຫນຍ ແຈ້ງການເລກທີ 445/ສສກ ແລະ ຄຳແນະນຳເລກທີ 391/ສມ ຂອງກົມສາມັນກະຊວງສຶກສາທິການ ແລະ ກີລາ ວ່າດ້ວຍການໄຂສົກຮຽນສາມັນຄືນໃໝ່ຂອງຊັ້ນ ປ5 ມ4 ແລະ ມ7 ເລີ່ມຈັດຕັ້ງປະຕິບັດວັນທີ 18 ພຶດສະພາ 2020 ເປັນຕົ້ນໄປ ດັ່ງນັ້ນໂຮງຮຽນປະຖົມ ແລະ ມັດທະຍົມສົມບູນສິນໄຊ ເມືອງຈັນທະບູລີ ນະຄອນຫຼວງວຽງຈັນ ກໍເປັນໜຶ່ງໃນສະຖາບັນການສຶກສາພາກເອກະຊົນ ໄດ້ປະຕິບັດຕາມແຈ້ງການດັ່ງກ່າວ ພາຍຫຼັງໃຫ້ນັກຮຽນພັກຮຽນເປັນເວລາເກືອບ 2 ເດືອນ.

ທ່ານ ນາງ ອາລີ ພົນເສນາ ຜູ້ອຳນວຍການໂຮງຮຽນປະຖົມ ແລະ ມັດທະຍົມສົມບູນສິນໄຊ ໄດ້ກ່າວວ່າ: ກ່ອນເປີດຮຽນຄືນໃໝ່ໃນວັນທີ 18 ພຶດສະພາ 2020 ກ່ອນໜ້ານີ້ ໂຮງຮຽນໄດ້ມີການກະກຽມຄວາມພ້ອມດ້ານຕ່າງໆເພື່ອຮັບປະກັນ ເປັນຕົ້ນໄດ້ອະນາໄມທຳຄວາມສະອາດສະຖານທີ່ດ້ານນອກອາຄານຮຽນ ແລະ ພາຍໃນຫ້ອງຮຽນ ດ້ວຍການຂ້າເຊື້ອເຫຼົ້າ 90 ເຊັດຖູໂຕະ ຕັ່ງນັ່ງ ຈັດສະຖານທີ່ນັ່ງຮຽນໃຫ້ມີໄລຍະຫ່າງ ພ້ອມເຮັດໜັງສືແຈ້ງເຖິງຜູ້ປົກຄອງນັກຮຽນເພື່ອໃຫ້ແນະນຳລູກຫຼາຍຕົນເອງ ເປັນຕົ້ນການເຂົ້າ-ອອກໂຮງຮຽນ ການປະຕິບັດໂມງເວລາ ການຄັດແຍກນັກຮຽນທີ່ເຂົ້າມາໂຮງຮຽນ ການຮຽນ-ການສອນໃນຫ້ອງ ການປ້ອງກັນ ແລະ ຮັກສາອະນາໄມ ເວລາຮັບປະທານອາຫານທ່ຽງ ເວລາເລີກຮຽນ ແລະ ອື່ນໆ.

ໂດຍປະຕິບັດໄລຍະຫ່າງປ້ອງກັນພະຍາດໂຄວິດ-19 ໂຮງຮຽນສິນໄຊໄດ້ເພີ່ມຈຳນວນຫ້ອງຮຽນ ແລະ ຄູອາຈານ ຊັ້ນ ປ5 ແລະ ມ4 ຈາກເມື່ອກ່ອນ 3 ຫ້ອງ ມາເປັນ 6 ຫ້ອງ ແລະ ຊັ້ນ ມ7 ຈຳນວນ 2 ຫ້ອງ ແຕ່ລະຫ້ອງບັນຈຸນັກຮຽນ 18-20 ຄົນ ນັ່ງສະຫຼຽງກັນ ມີນັກຮຽນທັງໝົດ 279 ຄົນ ຍິງ 116 ຄົນ ໃນນັ້ນ ປ5 ມີ 129 ຄົນ ມ4 ມີ 113 ຄົນ ແລະ ມ4 ມີ 37 ຄົນ ມີຄູອາຈານທັງໝົດ 30 ຄົນ ເຊິ່ງນັກຮຽນທີ່ມາໂຮງຮຽນ ກ່ອນຈະເຂົ້າໄປໂຮງຮຽນພາຍຫຼັງຜູ້ປົກຄອງມາສົ່ງຢູ່ປະຕູຮົ້ວໂຮງຮຽນ ທາງໂຮງຮຽນຈັດຕັ້ງໃຫ້ຄູກວດວັດແທກອຸນຫະພູມ ລ້າງມືດ້ວຍເຈວ ມີຜ້າອັດປາກອັດດັງທຸກຄົນ ຢູ່ຫ່າງກັນ ກ່ອນຈະເຂົ້າໄປໃນຫ້ອງຮຽນທຸກຄັ້ງ ຕ້ອງລ້າງມືດ້ວຍສະບູ ແລະ ທາເຈວທີ່ຄູກຳນົດໃຫ້ ເວລາເຄົາລົບທຸງ ຢືນລຽນແຖວຫ່າງກັນ 1 ແມັດ ຊື້ອາຫານ ແລະ ເຄື່ອງດື່ມຕ້ອງລຽນຄີວຫ່າງກັນ 1 ແມັດ ນັກ ຮຽນຕ້ອງເອົາອາຫານມາແຕ່ເຮືອນ ເວລາຮັບປະທານອາຫານຕ້ອງນັ່ງຢູ່ຫ່າງກັນ ບໍ່ລົມກັນ ເວລາສຳເລັດຕ້ອງກັບໄປພັກຜ່ອນຢູ່ຫ້ອງຮຽນຂອງຕົນ ຕອນເລີກຮຽນຕ້ອງຢູ່ຫ້ອງຮຽນ ເວລາຜູ້ປົກຄອງມາຮັບ ໃຫ້ຄູປະກາດທາງໂທລະໂຄ່ງແລ້ວ ໄປຫາຜູ້ປົກຄອງ ນັກຮຽນບໍ່ສະບາຍ ບໍ່ໃຫ້ມາໂຮງຮຽນ ຖ້າມາໂຮງຮຽນແລ້ວບໍ່ສະບາຍ ຕ້ອງແຈ້ງຕໍ່ຄູແລ້ວໃຫ້ຜູ້ປົກຄອງມາຮັບກັບເຮືອນ ແລະ ອື່ນໆ ໂດຍລວມແລ້ວ ນັກຮຽນ ແລະ ຄູອາຈານແມ່ນໃຫ້ປະຕິບັດຕາມແຈ້ງການຂອງຂັ້ນເທິງຢ່າງເຂັ້ມງວດ ທັງນີ້ເພື່ອປ້ອງກັນພະຍາດໂຄວິດ.

ໂອກາດນີ້ ທ່ານອຳນວຍການໂຮງຮຽນສິນໄຊ ຍັງໄດ້ຮຽກຮ້ອງມາຍັງຜູ້ປົກຄອງນັກຮຽນຕ້ອງແນະນຳລູກຫຼານຂອງຕົນເປັນປະຈຳ ເພື່ອໃຫ້ພວກເຂົາມີຄວາມເຂົ້າໃຈໃນການປ້ອງກັນຕົນເອງ ພ້ອມທັງຮຽກຮ້ອງມາຍັງນັກຮຽນທຸກຊັ້ນປີທ້າຍຕ້ອງຕັ້ງໃຈຮ່ຳຮຽນ ເອົາໃຈໃສ່ຄົ້ນຄວ້າບົດຮຽນເພື່ອໃຫ້ໄດ້ຄະແນນດີ ຮຽນເກ່ງ ເສັງຈົບຊັ້ນໃຫ້ໄດ້ສົມບູນຂຶ້ນໄປ ພ້ອມທັງປະຕິບັດລະບຽບຂອງໂຮງຮຽນໃຫ້ໄດ້ດີ.