ໃນສະພາບເຂົ້າຍາກໝາກແພງ ອັນເນື່ອງມາຈາກການເກີດໄພພິບັດທາງທຳມະຊາດ ເກີດພະຍາດລະບາດໜັກໜ່ວງ ເຊັ່ນດັ່ງທີ່ພວກເຮົາປະສົບພົບພໍ້ໃນໄລຍະຜ່ານມາ ກໍຄື ທີ່ພວກເຮົາຮູ້ກັນໃນສະພາບສູ່ມື້ນີ້ ຍ້ອນການລະບາດຂອງພະຍາດໂຄໂຣນາ ໄວຣັສ ຫຼື ໂຄວິດ 19 ມີຫຼາຍສິ່ງຫຼາຍຢ່າງທີ່ເຮົາຕ້ອງການ ແຕ່ຍັງຂາດເຂີນບໍ່ວ່າຈະເປັນ ເງິນ ຜ້າອັດປາກ ນ້ຳຢາລ້າງມື ອາຫານການກິນ ລວມທັງຢາປິ່ນປົວພະຍາດດັ່ງກ່າວ ເຮັດໃຫ້ສັງຄົມມີຄວາມຕ້ອງການສູງສິ່ງທີ່ກ່າວມານັ້ນ ໄປຄຽງຄູ່ກັບຄວາມຮຽກຮ້ອງຕ້ອງການສິ່ງທີ່ຈຳເປັນ ແລະ ຮີບດ່ວນຄືແນວນັ້ນ ພວກເຮົາກໍໄດ້ຮັບການຕອບສະໜອງສິ່ງດັ່ງກ່າວທັງຈາກພາກລັດ ເອກະຊົນ ນິຕິບຸກຄົນ ແລະ ບຸກຄົນຢູ່ພາຍໃນ ແລະ ທັງຈາກຕ່າງປະເທດ ເຖິງບໍ່ທັນພຽງພໍ ແຕ່ກໍສາມາດແກ້ໄຂສະພາບຄວາມຂາດເຂີນໄດ້ສ່ວນຫຼວງຫຼາຍ ແຕ່ສິ່ງທີ່ສຳຄັນທີ່ສຸດ ເມື່ອໄດ້ຮັບການຊ່ວຍເຫຼືອ ໄດ້ຮັບການປະກອບສ່ວນແລ້ວ ບັນຫາສຳຄັນຕົ້ນຕໍກໍແມ່ນ ການປົກປັກຮັກສາ ການເກັບມ້ຽນ ການແຈກຢາຍ ການສະໜອງສິ່ງເຫຼົ່ານັ້ນໃຫ້ສັງຄົມ ດ້ວຍຄວາມໂປ່ງໃສ ຍຸຕິທຳ ແລະ ທ່ວງທັນກັບເວລາ ທັນກັບສະພາບການ ຖືກຈຸດ ຖືກເປົ້າໝາຍ ຊຶ່ງຜ່ານມາພວກເຮົາກໍຮັບຮູ້ນຳກັນແລ້ວວ່າ ລັດຖະບານກໍໄດ້ເອົາໃຈໃສ່ບັນຫາດັ່ງກ່າວນີ້ ໂດຍສະເພາະແມ່ນຄະນະສະເພາະກິດຂັ້ນສູນກາງ ກໍຄືຂັ້ນທ້ອງຖິ່ນ ເພິ່ນກໍໄດ້ແຈ້ງຂໍ້ມູນລະອຽດກ່ຽວກັບການຊ່ວຍເຫຼືອ ການແຈກຢາຍ ຊຶ່ງອາດຈະເປັນເງິນກີບ ເງິນຕາຕ່າງປະເທດ ເຄື່ອງມືອຸປະກອນການແພດ ນ້ຳຢາລ້າງມື ຜ້າອັດປາກ ລວມທັງຢາປິ່ນປົວຜູ້ທີ່ໄດ້ຮັບເຊື້ອພະຍາດ ໂຄວິດ 19 ອັນເຮັດໃຫ້ການຄວບຄຸມ ການແກ້ສະພາບການແພ່ລະບາດຂອງພະຍາດດັ່ງກ່າວ ຄ່ອຍໆໝົດໄປ ລວມທັງຜູ້ທີ່ເປັນພະຍາດນີ້ກໍໄດ້ຮັບການປິ່ນປົວໃຫ້ຄ່ອຍໆຫາຍດີ ໂດຍປາສະຈາກການເສຍຊີວິດ ນີ້ກໍສະແດງໃຫ້ເຫັນວ່າ ການວາງ ແລະ ການປະຕິບັດມາດຕະການຕ່າງໆຢ່າງເຂັ້ມງວດຂອງໝົດທົ່ວສັງຄົມມີຄວາມເຂັ້ມງວດ ເຮັດໃຫ້ພວກເຮົາຄ່ອຍໆຫຼຸດ ພົ້ນຈາກໄພອັນຕະລາຍຂອງພະຍາດທີ່ພວມລະບາດຢູ່ທຸກປະເທດໃນໂລກເທື່ອລະກ້າວເວົ້າລວມ ເວົ້າສະເພາະຢູ່ປະເທດຂອງພວກເຮົາ.
ເຖິງຢ່າງໃດກໍຕາມ ເພື່ອເປັນການກັນ ແລະ ສະກັດກັ້ນບັນຫາການສວຍໃຊ້ອຳນາດ ໜ້າທີ່ ຕຳແໜ່ງຂອງບາງບຸກຄົນເພື່ອຜົນປະໂຫຍດສ່ວນຕົວ ໃນສະພາບທີ່ປະຊາຊົນພວມຕົກຢູ່ໃນໄພອັນຕະລາຍ ດັ່ງນັ້ນ ລັດ ສປປລາວ ພວກເຮົາຈຶ່ງໄດ້ກຳນົດມາດຕະການທາງອາຍາເອົາໄວ້ເພື່ອແກ້ໄຂ ຫຼື ເພື່ອເປັນບ່ອນອີງໃນການດຳເນີນຄະດີຕໍ່ບຸກຄົນດັ່ງກ່າວໄວ້ ໃນມາດຕາ 306 ຂອງປະມວນກົດໝາຍອາຍາ ຊຶ່ງເນື້ອໃນໄດ້ລະບຸວ່າ: ບຸກຄົນໃດ ຫາກໃຊ້ອຳນາດ ໜ້າທີ່ ຕຳແໜ່ງໃນທາງທີ່ບໍ່ຖືກຕ້ອງ ຫຼື ໃຊ້ສິດ ໜ້າທີ່ ຕຳແໜ່ງເກີນກວ່າ ກົດໝາຍກຳນົດໄວ້ ທີ່ເປັນການລະເມີດລະບຽບການ ກ່ຽວກັບການບໍລິຈາກເງິນ ແລະ ເຄື່ອງບັນເທົາທຸກ ຊຶ່ງກໍ່ຄວາມເສຍຫາຍຢ່າງຫຼວງຫຼາຍ ຈະຖືກລົງໂທດຕັດອິດສະລະພາບແຕ່ ສາມເດືອນ ຫາ ສາມປີ ຫຼື ດັດສ້າງໂດຍບໍ່ຕັດອິດສະລະພາບ ແລະ ຈະຖືກປັບໃໝ ແຕ່ 5.000.000. ກີບ ຫາ 10.000.000 ກີບ. ຕົວຢ່າງ: ທ້າວ ກົນ ເປັນຫົວໜ້າ ທັງເປັນຜູ້ຮັບຜິດຊອບເງິນ ຫຼື ເຄື່ອງບັນເທົາທຸກຢູ່ອົງການໃດໜຶ່ງ ແລ້ວຜູ້ກ່ຽວໄດ້ສວຍໃຊ້ສິດ ແລະ ໜ້າທີ່ຂອງຕົນ ແບ່ງເອົາເງິນ ຫຼື ເຄື່ອງຂອງບັນເທົາທຸກດັ່ງກ່າວໄປນຳໃຊ້ ຫຼື ຂາຍ ຫຼື ເອົາໄປແຈກຢາຍພັກພວກ ຈູ້ມເຈື້ອ ຍາດຕິພີ່ນ້ອງຂອງຕົນໂດຍບໍ່ຖືກຕ້ອງ ຕາມລະບຽບການ ຫຼື ເງື່ອນໄຂຂອງການແຈກຢາຍ ຜູ້ກ່ຽວກໍຈະມີຄວາມຜິດຕາມມາດຕານີ້.