ທ່ານ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ຮອງຫົວໜ້າຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ຖະແຫຼງຕໍ່ສື່ມວນຊົນ ໃນວັນທີ 15 ພຶດສະພາ 2020 ທີ່ກະຊວງສາທາລະນະສຸກ ກ່ຽວກັບການປະຕິບັດບັນດາມາດຕະການຜ່ອນຜັນ ໃນການປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ແຕ່ວັນທີ 18 ພຶດສະພາ-1 ມິຖຸນາ 2020 ວ່າ: ໂດຍໄດ້ຮັບມອບໝາຍຈາກທ່ານຫົວໜ້າຄະນະສະເພາະກິດ ກໍຄືລັດຖະບານ ຈຶ່ງຂໍແຈ້ງມາຍັງພໍ່ແມ່ພີ່ນ້ອງປະຊາຊົນລາວ ພະນັກງານ ລັດຖະກອນ ທະຫານ ຕຳຫຼວດ ຜູ້ປະກອບການ ຊາວຕ່າງດ້າວ ແລະ ຊາວຕ່າງປະເທດທີ່ອາໄສຢູ່ ສປປ ລາວ ຊາບທົ່ວເຖິງກັນວ່າ ການແຜ່ລະບາດຂອງພະຍາດ COVID-19 ຍັງສືບຕໍ່ເປັນໄພຄຸກຄາມໃນທຸກໆປະເທດທົ່ວໂລກ ແລະ ຍັງມີການແຜ່ລະບາດເປັນວົງກວ້າງຢູ່ບາງປະເທດ ມາຮອດວັນນີ້ ໂຄວິດ-19 ໄດ້ຂ້າຊີວິດຂອງຄົນເປັນແສນໆ ຍັງມີຜູ້ຕິດເຊື້ອຫຼາຍກວ່າ 4 ລ້ານກວ່າຄົນພ້ອມກັນນີ້ ກໍຍັງສືບຕໍ່ມີຜູ້ຕິດເຊື້ອ ແລະ ເສຍຊີວິດເປັນແຕ່ລະວັນ ເຊິ່ງຍັງບໍ່ຮູ້ໄດ້ວ່າ ເວລາໃດພວກເຮົາຈຶ່ງຈະສາມາດຢັບຢັ້ງ ແລະ ຢຸດຕິມັນໄດ້ ອັນໄດ້ມີຜົນກະທົບຢ່າງໜັກໜ່ວງຕໍ່ເສດຖະກິດ ແລະ ສັງຄົມໃນທົ່ວໂລກ.
ສຳລັບຢູ່ປະເທດພວກເຮົາ ຜ່ານໄລຍະເວລາ 1 ເດືອນກວ່າ ທີ່ພວກເຮົາພ້ອມກັນຈັດຕັ້ງປະຕິ ບັດຄຳສັ່ງຂອງນາຍົກລັດຖະມົນຕີ ສະບັບເລກທີ 06/ນຍ ຄັ້ງວັນທີ 29 ມີນາ 2020 ແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 524/ຫສນຍ ລົງວັນທີ 1 ພຶດສະພາ 2020 ບັນດານິຕິກຳ ແລະ ຄຳແນະນຳຂອງຄະນະສະເພາະກິດ ແລະ ພາກສ່ວນກ່ຽວຂ້ອງພວກເຮົາສາມາດຄວບຄຸມການແຜ່ລະບາດໄວ້ໄດ້ໃນລະດັບຕ່ຳ ໂດຍບໍ່ມີຜູ້ຕິດເຊື້ອເພີ່ມ ແຕ່ວັນທີ 12 ເມສາເປັນຕົ້ນມາ ລວມເປັນເວລາ 33 ວັນແລ້ວ ແລະ ສາມາດປິ່ນປົວຜູ້ຕິດເຊື້ອຫາຍດີຈຳນວນ 14 ຄົນ ໃນຈຳນວນຜູ້ຕິດເຊື້ອທັງໝົດ 19 ຄົນ ບັນດາອົງການຈັດຕັ້ງສາກົນ ແລະ ປະເທດຕ່າງໆກໍໄດ້ຕີລາຄາສູງວ່າ ສປປ ລາວ ມີມາດຕະການປ້ອງກັນແຕ່ຫົວທີໄດ້ດີ ຈຶ່ງສາມາດຄວບຄຸມການລະບາດບໍ່ໃຫ້ຂະຫຍາຍອອກສູ່ວົງກວ້າງ.
ເຖິງແນວໃດກໍຕາມ ພວກເຮົາກໍບໍ່ຄວນປະໝາດຢ່າງເດັດຂາດ ເນື່ອງຈາກວ່າຍັງມີການລະບາດຢູ່ໃນໂລກ ແລະ ບາງປະເທດໃນອາຊຽນ. ໄລຍະຜ່ານມາ ຫຼາຍປະເທດໄດ້ຜ່ອນຜັນມາດຕະການລົງ ແຕ່ສັງເກດເຫັນວ່າຢູ່ບາງປະເທດໄດ້ມີການລະບາດຄືນມາຮອບໃໝ່. ສະນັ້ນ ເພື່ອສືບຕໍ່ປະຕິບັດມາດຕະການປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ທັງເຮັດແນວໃດໃຫ້ມີຜົນກະທົບຕໍ່ເສດຖະກິດ-ສັງຄົມໜ້ອຍທີ່ສຸດ ສ້າງເງື່ອນໄຂໃຫ້ປະຊາຊົນ ແລະ ສັງຄົມໄດ້ກັບມາໃຊ້ຊີວິດຕາມປົກກະຕິເທື່ອລະກ້າວ ລັດຖະບານຈຶ່ງໄດ້ຕົກລົງ ແລະ ຊີ້ນຳກ່ຽວກັບການຜ່ອນຜັນມາດຕະການຈຳນວນໜຶ່ງ ແລະ ສືບຕໍ່ປະຕິບັດຢ່າງເຂັ້ມງວດ ບາງມາດຕະການປ້ອງກັນການຕິດເຊື້ອໃນໄລຍະແຕ່ວັນທີ 18 ພຶດສະພາ ຫາ 1 ມິຖຸນາ 2020 ລະອຽດດັ່ງນີ້:
ໃຫ້ບັນດາກະຊວງ ອົງການທຽບເທົ່າກະຊວງ ອົງການປົກຄອງທ້ອງຖິ່ນທຸກຂັ້ນ ພະນັກງານ ລັດຖະກອນ ທະຫານ ຕຳຫຼວດ ປະຊາຊົນບັນດາເຜົ່າໃນທົ່ວປະເທດ ສືບຕໍ່ປະຕິບັດບາງມາດຕະການ ຕາມຄຳສັ່ງ 06/ນຍ ແລະ ຍົກສູງຄວາມຮັບຜິດຊອບໃນການຕິດຕາມ ເຝົ້າລະວັງການປ້ອງກັນ ຄວບຄຸມ ສະກັດກັ້ນ ແລະ ແກ້ໄຂການລະບາດຂອງພະຍາດ COVID-19 ດ້ວຍຄວາມເປັນເຈົ້າການ ແລະ ຄວາມຮັບຜິດຊອບສູງ ໃຫ້ປະຊາຊົນ ພະນັກງານ ລັດຖະກອນ ທະຫານ ຕຳຫຼວດ ຜູ້ປະກອບການ ຊາວຕ່າງດ້າວ ແລະ ຊາວຕ່າງປະເທດ ທີ່ອາໄສຢູ່ ສປປ ລາວ ສືບຕໍ່ປະຕິບັດຢ່າງເຂັ້ມງວດ ບັນດາມາດຕະການປ້ອງກັນການຕິດເຊື້ອ ເປັນຕົ້ນແມ່ນການຮັກສາໄລຍະຫ່າງ 1 ແມັດຂຶ້ນໄປ ລ້າງມືດ້ວຍນ້ຳສະອາດ ໃສ່ສະບູ ຫຼືເຈວລ້າງມື ໃສ່ຜ້າອັດປາກ-ດັງ ແທກອຸນຫະພູມ ແລະ ອະນາໄມສະຖານທີ່ຕາມຄຳແນະນຳຂອງຄະນະສະເພາະກິດວາງອອກ ໃຫ້ຄະນະສະເພາະກິດ ອົງການປົກຄອງທ້ອງຖິ່ນທຸກຂັ້ນ ແລະ ພາກສ່ວນກ່ຽວຂ້ອງ ສືບຕໍ່ໂຄສະນາເຜີຍແຜ່ໃຫ້ສັງຄົມເຂົ້າໃຈຢ່າງເລິກເຊິ່ງ ແລະ ທົ່ວເຖິງ ກ່ຽວກັບຄວາມອັນຕະລາຍຂອງພະຍາດດັ່ງກ່າວ ແລະ ມາດຕະການປ້ອງກັນ ໂດຍມີວິທີແນະນຳຢ່າງລະອຽດ ແລະ ເຂົ້າໃຈງ່າຍ ເພື່ອເຜີຍແຜ່ຜ່ານສື່ຕ່າງໆ ພ້ອມກັນນັ້ນ ກໍໃຫ້ເອົາໃຈໃສ່ວຽກງານໂຕ້ຕອບ ແລະ ຕີຖອຍຂ່າວລວງ ຂ່າວລື ຂ່າວອະກຸສົນ ແລະ ຂ່າວປັ່ນປ່ວນ.
ເຫັນດີໃຫ້ປະຕິບັດມາດຕະການຜ່ອນຜັນຈຳນວນໜຶ່ງເພີ່ມຕື່ມ ເພື່ອໃຫ້ມີຜົນກະທົບຕໍ່ເສດຖະກິດ-ສັງຄົມໜ້ອຍທີ່ສຸດ ແລະ ໃຫ້ສັງຄົມສາມາດກັບມາໃຊ້ຊີວິດເປັນປົກກະຕິເທື່ອລະກ້າວ ແຕ່ໃຫ້ປະຕິບັດມາດຕະການປ້ອງກັນການຕິດເຊື້ອ ເປັນຕົ້ນ ການຮັກສາໄລຍະຫ່າງ 1 ແມັດຂຶ້ນໄປ ລ້າງມືດ້ວຍນ້ຳສະອາດ ໃສ່ສະບູ ຫຼື ເຈວລ້າງມື ໃສ່ຜ້າອັດປາກ-ດັງ ແທກອຸນຫະພູມ ແລະ ອະນາໄມສະຖານທີ່ ຕາມຄຳແນະນຳຂອງຄະນະສະເພາະກິດວາງອອກ ລາຍລະອຽດຂອງບັນດາມາດຕະການທີ່ຜ່ອນຜັນມີດັ່ງນີ້:
1). ອະນຸຍາດໃຫ້ສຳນັກງານອົງການຂອງພັກ-ລັດ ສຳນັກງານຂອງບໍລິສັດ ເປີດດຳເນີນການປົກກະຕິ ໂດຍໃຫ້ພະນັກງານ ລັດຖະກອນ ໄປເຮັດວຽກເປັນປົກກະຕິ ແຕ່ຕ້ອງໃຫ້ຮັບປະກັນມາດຕະການ ປ້ອງກັນການຕິດເຊື້ອຕາມຄຳແນະນຳຂອງຄະນະສະເພາະກິດ ຖ້າຫາກສຳນັກງານອົງການໃດມີເງື່ອນໄຂເຮັດວຽກຜ່ານລະບົບສື່ສານເອເລັກໂຕຣນິກ ແລະ ເຄືອຂ່າຍອິນເຕີເນັດ ກໍສາມາດສືບຕໍ່ຕາມຄວາມເໝາະສົມ;
2). ອະນຸຍາດໃຫ້ປະຊາຊົນ ພະນັກງານ ລັດຖະກອນ ທະຫານ ຕຳຫຼວດ ຜູ້ປະກອບການ ຊາວຕ່າງດ້າວ ແລະ ຊາວຕ່າງປະເທດທີ່ອາໄສຢູ່ ສປປ ລາວ ສາມາດເດີນທາງພາຍໃນປະເທດໄດ້ ແຕ່ຕ້ອງໃຫ້ປະຕິບັດຕາມມາດຕະການປ້ອງກັນການຕິດເຊື້ອຢ່າງເຂັ້ມງວດ;
3). ອະນຸຍາດໃຫ້ເປີດການຂົນສົ່ງໂດຍສານທາງບົກ ທາງນ້ຳ ທາງອາກາດ ພາຍໃນປະເທດ ລະຫວ່າງແຂວງຫາແຂວງ ແຕ່ຕ້ອງໃຫ້ປະຕິບັດຕາມມາດຕະການປ້ອງກັນການຕິດເຊື້ອ ຕາມຄຳແນະນຳ ຂອງຄະນະສະເພາະກິດ ແລະ ຂອງຂະແໜງການກ່ຽວຂ້ອງຢ່າງເຂັ້ມງວດ;
4). ອະນຸຍາດໃຫ້ມີການຝຶກອົບຮົມ ສຳມະນາ ແລະ ການປະຊຸມເປັນທາງການພາຍໃນປະເທດ ແຕ່ບໍ່ອະນຸຍາດໃຫ້ຈັດງານລ້ຽງ ແລະ ໃຫ້ຮັກສາໄລຍະຫ່າງ 1 ແມັດຂຶ້ນໄປ ມີບ່ອນລ້າງມືດ້ວຍນ້ຳສະອາດ ໃສ່ສະບູ ຫຼື ເຈວລ້າງມື ໃສ່ຜ້າອັດປາກ-ດັງ ແທກອຸນຫະພູມ ແລະ ອະນາໄມສະຖານທີ່ຕາມຄຳແນະນຳ ຂອງຄະນະສະເພາະກິດວາງອອກ. ສຳລັບການດຳເນີນກອງປະຊຸມໃຫຍ່ 3 ຂັ້ນ ຂອງພັກ ແມ່ນໃຫ້ປະຕິບັດຕາມຄຳສັ່ງແນະນຳເພີ່ມເຕີມຂອງຄະນະເລຂາທິການສູນກາງພັກ ສະບັບເລກທີ 08/ຄລສພ ລົງວັນທີ 11 ພຶດສະພາ 2020
5). ໃຫ້ກະຊວງສຶກສາທິການ ແລະ ກິລາ ກະຊວງປ້ອງກັນປະ ເທດ ແລະ ກະຊວງປ້ອງກັນຄວາມສະຫງົບ ເປີດໂຮງຮຽນຄືນໃນຊັ້ນປະຖົມສຶກສາປີທີ 5 ມັດທະຍົມສຶກສາປີທີ 4 ແລະ ປີທີ 7 ແລະ ໂຮງຮຽນໃນຂົງເຂດປ້ອງກັນຊາດ ແລະ ປ້ອງກັນຄວາມສະຫງົບ ເລີ່ມແຕ່ວັນທີ 18 ພຶດສະພາ 2020 ໂດຍຮັກສາໄລຍະຫ່າງ 1 ແມັດຂຶ້ນໄປ ມີບ່ອນລ້າງມືດ້ວຍນ້ຳສະອາດ ໃສ່ສະບູ ຫຼື ເຈວລ້າງມື ໃສ່ຜ້າອັດປາກ-ດັງ ແທກອຸນຫະພູມ ແລະ ອະນາໄມສະຖານທີ່ ຕາມຄຳແນະນຳຂອງຄະນະສະເພາະກິດວາງອອກ. ສ່ວນໂຮງຮຽນລ້ຽງເດັກ ແລະ ອະນຸບານ ຊັ້ນຮຽນ ປ1-ປ4 ມ1-ມ3 ມ5-ມ6 ວິທະຍາໄລ ມະຫາວິທະ ຍາໄລ ແລະ ສະຖາບັນການສຶກສາລະດັບອື່ນໆ ໃຫ້ກະກຽມເປີດເລີ່ມແຕ່ວັນທີ 02 ມິຖຸນາ 2020 ເປັນຕົ້ນໄປ.
6). ອະນຸຍາດໃຫ້ອອກກຳລັງກາຍ ຫຼືຫຼິ້ນກິລາກາງແຈ້ງ ແລະ ໃນຮົ່ມທຸກປະເພດ ແຕ່ຕ້ອງປະຕິບັດບັນດາມາດຕະການປ້ອງກັນການຕິດເຊື້ອ ຕາມຄຳແນະນຳຂອງຄະນະສະເພາະກິດ
7). ອະນຸຍາດໃຫ້ເປີດດຳເນີນທຸລະກິດການຄ້າ ແລະ ການບໍລິການຕ່າງໆເຊັ່ນ: ຮ້ານອາຫານ ຮ້ານຂາຍຂອງກິນສຸກ ຮ້ານຂາຍເຄື່ອງຍ່ອຍ ຮ້ານຕັດຜົມ ຮ້ານເສີມສວຍ ຕະຫຼາດສົດ ສູນການຄ້າ ຮ້ານຄ້າຂາຍຍົກ ຂາຍຍ່ອຍ ຮ້ານຊຸບເປີມາເກັດ ຮ້ານກາເຟ ຮ້ານສ້ອມແປງລົດ ຮ້ານລ້າງ-ອັດສີດ ໂຮງງານ ນ້ຳດື່ມ ໂຮງງານນ້ຳກ້ອນ ສະຖານທີ່ທ່ອງທ່ຽວ ຮ້ານນວດ ແລະ ສະປາທຸກປະເພດ ສາມາດດຳເນີນກິດຈະການໄດ້ປົກກະຕິ ແຕ່ໃຫ້ຂະແໜງການກ່ຽວຂ້ອງແນະນຳ ແລະ ກຳນົດເວລາເປີດ-ປິດ ແຕ່ລະປະເພດກິດຈະການໃຫ້ລະອຽດ
8). ບັນດາໂຄງການ ບໍລິສັດ ແລະ ໂຮງງານ ສາມາດເປີດດຳເນີນກິດຈະການ ໂດຍປະຕິບັດຕາມເງື່ອນໄຂ ແລະ ມາດຕະການທີ່ໄດ້ກຳນົດໃນຄຳແນະນຳຂອງຄະນະສະເພາະກິດ ສະບັບເລກທີ 071/ສພກ ລົງວັນທີ 11 ພຶດສະພາ 2020 9). ອະນຸຍາດໃຫ້ຊາວຕ່າງປະເທດທີ່ໄດ້ມາເຮັດວຽກອອກແຮງງານ ແລະ ສຶກສາຢູ່ ສປປ ລາວ ກັບຄືນປະເທດຂອງຕົນຕາມຈຸດປະສົງ. ສຳລັບນັກສຶກສາລາວ ແລະ ແຮງງານລາວທີ່ຕ້ອງການກັບຄືນໄປຮຽນ ຫຼືອອກແຮງງານຢູ່ຕ່າງປະເທດ ແມ່ນສາມາດເດີນທາງໄປໄດ້ ແຕ່ຕ້ອງໄດ້ປະຕິບັດຕາມລະບຽບການຂອງປະເທດທີ່ຈະເດີນທາງໄປນັ້ນ.
ພ້ອມນັ້ນຍັງເຫັນດີໃຫ້ສືບຕໍ່ປະຕິບັດຢ່າງເຂັ້ມງວດ ບາງມາດຕະການທີ່ໄດ້ກຳນົດໃນຄຳສັ່ງ 06/ນຍ ລົງວັນທີ 29 ມີນາ 2020 ດັ່ງນີ້:
1). ສືບຕໍ່ປິດບັນດາກິດຈະການ ເປັນຕົ້ນ: ຕະຫຼາດກາງຄືນ ຮ້ານບັນເທີງ ຮ້ານກິນ-ດື່ມ (ເຫຼົ້າ ເບຍ ແລະ ສິ່ງມຶນເມົາ) ຮ້ານຄາຣາໂອເກະ ຮ້ານເກມ ໂຮງສາຍຮູບເງົາ ກາຊິໂນ ແລະ ການຈັດລາຍການແຂ່ງຂັນກິລາທີ່ມີຜູ້ເຂົ້າຊົມຈຳນວນຫຼາຍ ຊຶ່ງບໍ່ສາມາດຮັກສາໄລຍະຫ່າງເກີນກວ່າ 1 ແມັດໄດ້ ແລະ ມີຄວາມສ່ຽງຕໍ່ການຕິດເຊື້ອ;
2). ສືບຕໍ່ຫ້າມຈັດກິດຈະກຳຊຸມນຸມ (ບໍ່ເປັນທາງການ) ຊຸມແຊວ ແລະ ງານສັງສັນ. ຫ້າມຈັດງານປະເພນີ ແລະ ງານດອງ ທີ່ມີຜູ້ເຂົ້າຮ່ວມເກີນ 50 ຄົນ ທີ່ບໍ່ສາມາດຮັກສາໄລຍະຫ່າງເກີນກວ່າ 1 ແມັດ ໄດ້ ແລະ ມີຄວາມສ່ຽງຕໍ່ການຕິດເຊື້ອ;
3). ສືບຕໍ່ປິດດ່ານປະເພນີ ດ່ານທ້ອງຖິ່ນ ແລະ ດ່ານສາກົນ ສຳລັບການເຂົ້າ-ອອກ ຂອງບຸກຄົນທົ່ວໄປ ເວັ້ນເສຍແຕ່ລົດຂົນສົ່ງສິນຄ້າ ຜູ້ທີ່ໄດ້ກຳນົດໃນຂໍ້ທີ 4.9 ຂອງແຈ້ງການສະບັບເລກທີ 580/ຫສນຍ ລົງວັນທີ 15 ພຶດສະພາ 2020 ແລະ ຜູ້ທີ່ໄດ້ຮັບການອະນຸຍາດຈາກຄະນະສະເພາະກິດ
4). ສືບຕໍ່ໂຈະການອອກວີຊາທຸກປະເພດໃຫ້ບຸກຄົນທົ່ວໄປທີ່ເດີນທາງມາຈາກ ຫຼື ຜ່ານປະເທດ ທີ່ຍັງມີການລະບາດຂອງພະຍາດ COVID-19 ຍົກເວັ້ນແຕ່ສຳລັບນັກການທູດ ຊ່ຽວຊານ ວິຊາການ ແລະ ແຮງງານຕ່າງປະເທດທີ່ມີຄວາມຈຳເປັນ ແລະ ຮີບດ່ວນ ເຂົ້າມາປະຕິບັດວຽກງານຢູ່ສະຖານທູດ ບັນດາກິດຈະການ ແລະ ໂຄງການຕ່າງໆທີ່ມີຄວາມສຳຄັນ ແລະ ຈຳເປັນ ແຕ່ຕ້ອງປະຕິບັດມາດຕະການຕ່າງໆ ຕາມຄຳແນະນຳຂອງຄະນະສະເພາະກິດ. ສຳລັບຂັ້ນຕອນໃນການປະຕິບັດຕົວຈິງ ກະຊວງການຕ່າງປະເທດຈະອອກຄຳແນະນຳຕ່າງຫາກ.
ມາດຕະການຜ່ອນຜັນນີ້ ແມ່ນເປັນການຊົ່ວຄາວ ຖ້າມີການລາຍງານ ກໍລະນີຜູ້ຕິດເຊື້ອເກີດຂຶ້ນຢູ່ໃນແຂວງໃດໜຶ່ງ ແມ່ນຈະໄດ້ຈຳກັດການເຂົ້າ-ອອກ ແລະ ປະຕິບັດຄືນມາດຕະການຕ່າງໆຢ່າງເຂັ້ມງວດ ສະເພາະແຂວງນັ້ນ ເຊິ່ງຄະນະສະເພາະກິດແຂວງນັ້ນ ຈະເປັນຜູ້ປະກາດແຈ້ງການ; ຖ້າຫາກເກີດມີຜູ້ຕິດເຊື້ອເປັນຈຸ້ມແຕ່ 2 ແຂວງຂຶ້ນໄປ ແມ່ນຈະໄດ້ກັບມາປະຕິບັດບັນດາມາດຕະການຕ່າງໆ ທີ່ໄດ້ກຳນົດໃນຄຳສັ່ງເລກທີ 06/ນຍ ຄືນໃໝ່ ຢ່າງເຂັ້ມງວດ.
ສະເໜີໃຫ້ບັນດາກະຊວງ ຂະແໜງການ ອົງການປົກຄອງທ້ອງຖິ່ນທຸກຂັ້ນ ກວດກາຄືນບັນດານິຕິກຳ ຄຳແນະນຳຕ່າງໆຂອງຕົນ ເພື່ອປັບປຸງໃຫ້ສອດຄ່ອງກັບມາດຕະການຜ່ອນຜັນຂ້າງເທິງ ແລະ ຜັນຂະ ຫຍາຍເປັນອັນລະອຽດ ເພື່ອມີຄວາມເຂົ້າໃຈເປັນເອກະພາບໃນການຈັດຕັ້ງປະຕິບັດ;
ສະເໜີໃຫ້ກຳລັງປ້ອງກັນຊາດ ປ້ອງກັນຄວາມສະຫງົບ ຄະນະສະເພາະກິດ ບັນດາກະຊວງ ຂະແໜງການ ອົງການປົກຄອງທ້ອງຖິ່ນທຸກຂັ້ນ ແລະ ທຸກພາກສ່ວນໃນສັງຄົມ ພ້ອມກັນເປັນເຈົ້າການຕິດຕາມກວດກາ ຮັກສາຄວາມສະຫງົບ ຮັກສາຄວາມເປັນລະບຽບຮຽບຮ້ອຍໃນສັງຄົມ ແລະ ຈັດຕັ້ງປະຕິບັດມາດຕະການທີ່ໄດ້ກຳນົດຢ່າງເຂັ້ມງວດ. ກໍລະນີມີການລະເມີດ ແມ່ນໃຫ້ເຈົ້າໜ້າທີ່ປ້ອງກັນຄວາມສະ ຫງົບ ແລະ ເຈົ້າໜ້າທີ່ ທີ່ກ່ຽວຂ້ອງ ດຳເນີນມາດຕະການຕາມກົດໝາຍ ແລະ ລະບຽບການກ່ຽວຂ້ອງຢ່າງເຂັ້ມງວດ.
ມາດຕະການຂ້າງເທິງນີ້ເລີ່ມມີຜົນສັກສິດ ນັບແຕ່ວັນທີ 18 ພຶດສະພາ-1 ມິຖຸນາ 2020. ໃນພາກປະຕິບັດຕົວຈິງ ຈະໄດ້ມີການປະເມີນ ທົບທວນ ແລະ ດັດປັບໃຫ້ເໝາະສົມຕື່ມ ກໍລະນີມີການປ່ຽນແປງ ລັດຖະບານຈະແຈ້ງໃຫ້ຊາບເປັນແຕ່ລະໄລຍະ. ໃນນາມຕາງໜ້າຄະນະສະເພາະກິດ ຂ້າພະເຈົ້າ ຂໍຮຽກຮ້ອງໃຫ້ພົນລະເມືອງລາວທຸກຄົນ ພ້ອມດ້ວຍຊາວຕ່າງດ້າວ ຜູ້ບໍ່ມີສັນຊາດ ຊາວຕ່າງປະເທດ ທີ່ດຳລົງຊີວິດ ແລະ ທຳມາຫາກິນຢູ່ ສປປ ລາວ ທຸກຖ້ວນໜ້າ ຈົ່ງເຊີດຊູນ້ຳໃຈເປັນເຈົ້າຂອງປະເທດຊາດ ສາມັກຄີເປັນຈິດໜຶ່ງໃຈດຽວກັນ ສືບຕໍ່ຕັ້ງໜ້າເຂົ້າຮ່ວມ ປະຕິບັດບັນດາມາດຕະການຢ່າງຖືກຕ້ອງ ແລະ ເຂັ້ມງວດ ເພື່ອເຮັດໃຫ້ການປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໃຫ້ໄດ້ຮັບຜົນດີ.