ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈຳການຄະນະສະເພາະກິດ ໄດ້ຖະແຫຼງຂ່າວຕໍ່ສື່ມວນຊົນ ວັນທີ 15 ພືດສະພາ 2020 ຢູ່ສູນປະຕິບັດງານຄະນະສະເພາະກິດຄວບຄຸມພະຍາດໂຄວິດ-19 ວ່າ: ສະພາບການເຝົ້າລະວັງ COVID-19 ຢູ່ ສປປ ລາວ ຮອດ 17 ໂມງ ຂອງວັນທີ 14 ພຶດສະພາ 2020 ຜູ້ເດີນທາງເຂົ້າມາ ສປປ ລາວ ທັງໝົດ 2.335 ຄົນ ໃນນັ້ນມີຈຸດຜ່ານດ່ານລາວ-ໄທ 1.362 ຄົນ (ມີແຮງງານລາວກັບມາຈາກປະເທດໄທ ຜ່ານດ່ານຊ່ອງເມັກ ແຂວງຈຳປາສັກ 21 ຄົນ) ເຫຼືອນັ້ນແມ່ນຜູ້ຂັບລົດຂົນສົ່ງສິນຄ້າ ຜ່ານຈຸດດ່ານລາວ-ຈີນ 23 ຄົນ ໃນນີ້ມີພະນັກງານຈີນ 6 ຄົນ ເຊິ່ງມາເຮັດວຽກຊົ່ວຄາວ ຢູ່ບໍລິສັດ DMC ທີ່ເຫຼືອແມ່ນຜູ້ຂັບລົດຂົນສົ່ງສິນຄ້າ ແລະ ຜ່ານຈຸດດ່ານລາວ-ຫວຽດ 911 ຄົນ ໃນນັ້ນມີ 11 ຄົນເປັນພະນັກງານສະພາແຫ່ງຊາດ ທີ່ໄປອົບຮົມຢູ່ຫວຽດນາມກັບຄືນມາ ເຫຼືອນັ້ນແມ່ນຄົນຂັບລົດຂົນສົ່ງສິນຄ້າ ແລະ ຜູ້ເດີນທາງຜ່ານສະໜາມບິນສາກົນວັດໄຕ 39 ຄົນ ເຊິ່ງເປັນການນຳ ສສ ຫວຽດນາມ ທີ່ເຂົ້າມາຮ່ວມໄວ້ອາໄລງານຊາປະນະກິດສົບການນຳຂັ້ນສູງຂອງ ສປປ ລາວ ແລະ ທັງໝົດໄດ້ກັບແລ້ວ ເຊິ່ງໃນທຸກດ່ານກໍໄດ້ກວດວັດອຸນຫະພູມຮ່າງກາຍ ແລະ ບໍ່ມີຄົນເປັນໄຂ້.
ການເຝົ້າລະວັງ ແລະ ວິເຄາະໃນວັນທີ 14 ພຶດສະພາ 2020 ໄດ້ເກັບຕົວຢ່າງມາກວດທັງໝົດ 112 ຄົນ ໃນນັ້ນ ມີກໍລະນີສົງໄສ 20 ຄົນ ເກັບຕົວຢ່າງມາກວດຫາເຊື້ອຄືນຂອງຜູ້ຕິດເຊື້ອທີ່ນອນປິ່ນປົວຢູ່ໂຮງໝໍມິດຕະພາບ 5 ຄົນ (ນ້ຳເບີ 7, 10, 16 17 ແລະ 18) ແລະ ທີ່ປິ່ນປົວຫາຍດີອອກໂຮງໝໍ ແລ້ວມີອາການໄຂ້ 1 ຄົນ ແລະ ແຮງງານລາວທີ່ກັບມາຈາກປະເທດໄທ 86 ຄົນ ເຊິ່ງຜົນກວດທັງໝົດຂອງມື້ວານນີ້ ບໍ່ພົບເຊື້ອ ໝາຍຄວາມວ່າໃນວັນທີ 14 ພຶດສະພາ 2020 ບໍ່ມີຜູ້ຕິດເຊື້ອໃໝ່ ສັງລວມການກວດວິເຄາະ ແຕ່ເດືອນມັງກອນ ຮອດວັນທີ 14 ພຶດສະພາ 2020 ໄດ້ເກັບຕົວຢ່າງມາກວດທັງໝົດ ມີ 4.204 ຕົວຢ່າງກວດພົບເຊື້ອສະສົມ 19 ຄົນ (33 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).
ການຕິດຕາມປີ່ນປົວຄົນເຈັບຢູ່ໂຮງໝໍ ປັດຈຸບັນມີຜູ້ນອນຕິດຕາມຢູ່ໂຮງໝໍມິດຕະພາບ 5 ຄົນ ຍິງ 4 ຄົນ ທັງໝົດເຫັນວ່າມີອາການປົກກະຕິ ສຳລັບການຕິດຕາມສະພາບການລະບາດຂອງປະເທດໃກ້ຄຽງ ແລະ ການລະບາດຢູ່ໃນໂລກ ເຫັນວ່າ: ມາຮອດເວລາ 6:00 ໂມງເຊົ້າ ຂອງວັນທີ 15 ພຶດສະພາ 2020 ທົ່ວໂລກມີການລາຍງານການລະບາດທັງໝົດ 213 (ປະເທດ/ເຂດ) ມີການຢັ້ງຢືນຜູ້ຕິດເຊື້ອພະຍາດ COVID-19 ແມ່ນ 4.518.574 (92.918 ໃໝ່) ເສຍຊິວິດ 302.949 (5.184 ໃໝ່) ກວມເອົາ 6,70% ຂອງຜູ້ຕິດເຊື້ອທັງໝົດ ປີ່ນປົວຫາຍດີ 1.699.354 (44,535 ໃໝ່) ກວມເອົາ 37,60% ຂອງຜູ້ຕິດເຊື້ອທັງໝົດ ບັນຫາສຳຄັນແມ່ນມີບາງປະເທດ ຈຳນວນຜູ້ຕິດເຊື້ອມື້ດຽວ ມີເຖິງ 24,100 ຄົນ ແລະ ເສຍຊີວິດ 1,607 ຄົນຕໍ່ມື້ ອັດຕາຄວາມຮ້າຍແຮງຂອງມື້ນີ້ແມ່ນ 6,70% (ມື້ວານນີ້ 6,72%) ສະເພາະກຸ່ມປະເທດອາຊຽນ ກໍເຫັນວ່າຍັງມີບາງປະເທດທີ່ມີອັດຕາການຕິດເຊື້ອໃໝ່ ປະຈຳວັນທີ 14 ພຶດສະພາ 2020 ສູງເຖິງ 752 ຄົນ ໃນມື້ດຽວນີ້ ຢູ່ກຸ່ມປະເທດອາຊຽນມີຜູ້ເສຍຊີວິດ 34 ຄົນ.
ສະນັ້ນ ຈຶ່ງຮຽກຮ້ອງໃຫ້ທຸກພາກສ່ວນໃນສັງຄົມ ຊຸມຊົນ ຄອບຄົວ ແລະ ສ່ວນບຸກຄົນ ມີຄວາມອົດທົນພະຍາຍາມ ເອົາໃຈໃສ່ຮ່ວມແຮງຮ່ວມໃຈກັນ ສືບຕໍ່ຈັດຕັ້ງປະຕິບັດຄຳແນະນຳ ແລະ ມາດຕະການຕ່າງໆຂອງລັດຖະບານ ໃຫ້ຖືກຕ້ອງ ແລະ ເຂັ້ມງວດ.
# ຂ່າວ & ພາບ : ລັດເວລາ