ກອງປະຊຸມຄະນະຊີ້ນຳແຜນງານຮ່ວມມື ວ່າດ້ວຍການເພີ່ມປະສິດທິພາບຂອງງົບປະມານພາກລັດ ເພື່ອບັນລຸເປົ້າໝາຍການພັດທະນາແບບຍືນຍົງ ດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025) ໄດ້ຈັດຂຶ້ນວັນທີ 10 ມີນາ 2022 ຢູ່ໂຮງແຮມ ລາວພລາຊາ ພາຍໃຕ້ການເປັນປະທານຮ່ວມຂອງທ່ານນາງ ພອນວັນ ອຸທະວົງ ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານນາງ ຊາຣາ ເຊເກນເນສ ຜູ້ປະສານງານອົງການສະຫະປະຊາຊາດ ປະຈຳ ສປປ ລາວ ດ້ວຍການເຂົ້າຮ່ວມຂອງຜູ້ຕາງໜ້າຈາກຂະແໜງການ ແລະ ຄູ່ຮ່ວມພັດທະນາທັງແບບຊ້ອງໜ້າ ແລະ ອອນລາຍ.
ກອງປະຊຸມຄັ້ງນີ້ ແມ່ນເພື່ອທົບທວນຄວາມຄືບໜ້າຂອງການຈັດຕັ້ງປະຕິບັດແຜນງານຮ່ວມມືດັ່ງກ່າວ ພ້ອມທັງປຶກສາຫາລືແຜນວຽກທີ່ຍັງເຫຼືອສໍາລັບປີ 2022 ເຊິ່ງໄດ້ຮັບການສະໜັບສະໜູນຈາກກອງທຶນຮ່ວມ SDG ເວົ້າລວມແລ້ວ ແຜນງານດັ່ງກ່າວແມ່ນສຸມໃສ່ການສະໜັບສະໜູນການສ້າງຍຸດທະສາດການການເງິນ ເພື່ອຈັດຕັ້ງປະຕິບັດແຜນການ 5 ປີ ຄັ້ງທີ IX (2021-2025) ເຊິ່ງຜູ້ຈັດຕັ້ງປະຕິບັດຕົ້ນຕໍ ມີກະຊວງແຜນການ ແລະ ການລົງທຶນ ກະຊວງການເງິນ ແລະ ກະຊວງສາທາລະນະສຸກ ໂດຍປະສານສົມທົບດ້ານວິຊາການຢ່າງໃກ້ຊິດກັບ ອົງການສະຫະປະຊາຊາດເພື່ອການພັດທະນາ (UNDP) ແລະ ຈັດຕັ້ງປະຕິບັດຮ່ວມກັບອົງການກອງທຶນພັດທະ ນາທຶນຂອງສະຫະປະຊາຊາດ (UNCDF) ແລະ ອົງການສະຫະປະຊາຊາດ ກອງທຶນສໍາລັບປະຊາກອນ (UNFPA) ນອກຈາກນີ້ ແຜນງານນີ້ຖືວ່າເປັນໜຶ່ງໃນການສະໜັບສະໜູນຕົ້ນຕໍຂອງອົງການສະຫະປະຊາຊາດ (ສປຊ) ດ້ານການສະໜອງທຶນເພື່ອການພັດທະນາໃນ ສປປ ລາວ ຄຽງຄູ່ກັບການຂະຫຍາຍການມີສ່ວນຮ່ວມ ຂອງບັນດາຄູ່ຮ່ວມພັດທະນາທັງຂອງອົງການ ສປຊ ແລະ ທີ່ບໍ່ແມ່ນອົງການ ສປຊ.
ທ່ານນາງ ຊາຣາ ເຊເກນເນສ ໄດ້ເນັ້ນວ່າ:ຈໍານວນຄູ່ຮ່ວມພັດທະນາທີ່ໄດ້ມີສ່ວນຮ່ວມດ້ານວິຊາການໃນການຈັດຕັ້ງປະຕິບັດວຽກງານນີ້ແມ່ນເພີ່ມຂຶ້ນ ສະແດງໃຫ້ເຫັນເຖິງຄວາມສຳເລັດຂອງວຽກງານດັ່ງກ່າວ ເຊິ່ງເປັນປັດໄຈສຳຄັນທີ່ຈະຊ່ວຍໃຫ້ວຽກງານນີ້ປະສົບຜົນສຳເລັດ ແລະ ຂ້າພະເຈົ້າຫວັງວ່າພວກເຮົາຈະສາມາດເສີມຂະ ຫຍາຍການຮ່ວມມືນີ້ໃຫ້ນັບມື້ນັບກວ້າງອອກໃນຕໍ່ໜ້າ.
ກອງປະຊຸມໄດ້ຮັບຟັງການລາຍງານກ່ຽວກັບຄວາມຄືບໜ້າຂອງວຽກງານດັ່ງກ່າວ ທີ່ເຫັນວ່າມີຫຼາຍພໍສົມ ຄວນ ລວມທັງການຮັບຮອງເອົາຂະບວນການໃນການສ້າງຍຸດທະສາດການເງິນ ທີ່ກອງປະຊຸມໂຕະມົນລະດັບສູງ ໃນເດືອນພະຈິກ 2021 ນອກຈາກນີ້ ຍັງໄດ້ປຶກສາຫາລືກ່ຽວກັບບັນດາແຜນວຽກແຕ່ນີ້ຮອດເດືອນກັນຍາ 2022 ລວມທັງການປັບປຸງຍຸດທະສາດການເງິນສະບັບສົມບູນ ຕາມຜົນຂອງປຶກສາຫາລື ແລະ ປັບປຸງໃນແຕ່ລະຄັ້ງ ເຊິ່ງຄາດວ່າຈະສໍາເລັດໃນໄລຍະ 2-3 ເດືອນທີ່ຈະມາເຖິງນີ້.
ທ່ານນາງ ພອນວັນ ອຸທະວົງ ໄດ້ເນັ້ນໜັກຕື່ມວ່າ:ການສ້າງຍຸດທະສາດການເງິນທີ່ອີງໃສ່ສະພາບຄວາມເປັນຈິງຂອງ ສປປ ລາວ ໂດຍການປຶກສາຫາລືກັບທຸກພາກສ່ວນທີ່ກ່ຽວຂ້ອງ ແມ່ນຈະຊ່ວຍໃຫ້ພວກເຮົາສາມາດສ້າງຍຸດທະສາດການເງິນທີ່ມີຄວາມແທດເໝາະ ແລະ ສອດຄ່ອງກັບນະໂຍບາຍແຫ່ງຊາດ ກໍຄືບັນດາແຜນການ ແລະ ຍຸດທະສາດຕ່າງໆທີ່ມີຢູ່ໃນປັດຈຸບັນ ເພື່ອຮັບປະກັນການສະໜອງທຶນແບບຍືນຍົງ ແນໃສ່ບັນລຸເປົ້າໝາຍການພັດທະນາແຫ່ງຊາດໃຫ້ໄດ້ຕາມຄາດໝາຍ.
ກະຊວງແຜນການ ແລະ ການລົງທຶນ ແລະ ອົງການສະຫະປະຊາຊາດ ຍັງໄດ້ສະແດງຄວາມໝາຍໝັ້ນໃນການສືບຕໍ່ແຜນງານຮ່ວມມື ໄລຍະທີສອງ ໂດຍອີງໃສ່ຜົນສໍາເລັດຂອງການຮ່ວມມືໃນໄລຍະຜ່ານມາ ແລະ ຄວາມເປັນໄປໄດ້ໃນການລະດົມການຊ່ວຍເຫຼືອຈາກຄູ່ຮ່ວມພັດທະນາຕ່າງໆ ເຊິ່ງແຜນງານໄລຍະທີສອງ ຈະເປັນໂອກາດທີ່ດີໃນການສືບຕໍ່ວຽກງານການຈັດຕັ້ງປະຕິບັດຍຸດທະສາດການເງິນ ໂດຍສະເພາະ ການສ້າງຄວາມກົມກຽວ ແລະ ຍົກສູງປະສິດທິພາບລະຫວ່າງການວາງແຜນ ແລະ ການກຳນົດງົບປະມານໃຫ້ນັບມື້ນັບດີຂຶ້ນ ແລະ ສົ່ງເສີມການເຮັດວຽກແບບເປັນລະບົບເພື່ອພ້ອມກັນແກ້ໄຂບັນຫາ ແລະ ສິ່ງທ້າທາຍທາງດ້ານການເງິນ.
# ຂ່າວ – ພາບ : ສີພອນ