ວັນທີ 10 ມີນາ 2022 ທີ່ຫ້ອງວ່າການແຂວງຫຼວງພະບາງ ກົມອາຊຽນ ກະຊວງການຕ່າງປະເທດ ໄດ້ຈັດກອງປະຊຸມສໍາມະນາເຜີຍແຜ່ກ່ຽວກັບການເຄື່ອນໄຫວວຽກງານອາຊຽນຂອງ ສປປ ລາວ ໃຫ້ບັນດາຈຸດ ປະສານງານອາຊຽນຂອງບັນດາແຂວງພາກເໜືອ ໂດຍມີທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ແລະ ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ໃຫ້ກຽດກ່າວເປີດ ແລະ ມີຜູ້ຕາງໜ້າຈາກພະແນກການຕ່າງປະເທດ ແລະ ພະແນກທີ່ກ່ຽວຂ້ອງຂອງ 8 ແຂວງພາກເໜືອ ທັງຫມົດ 50 ທ່ານເຂົ້າຮ່ວມ.
ກອງປະຊຸມສໍາມະນາຄັ້ງນີ້ ເປັນໜື່ງໃນກິດຈະກຳທີ່ໄດ້ຮັບການຮ່ວມມື ແລະ ສະໜັບສະໜູນໂດຍສູນອາຊຽນ-ຍີ່ປຸ່ນ. ໃນກອງປະຊຸມສຳມະນາຄັ້ງນີ້ ຜູ້ຕາງໜ້າຈາກບັນດາກະຊວງທີ່ຮັບຜິດຊອບ 3 ເສົາຄໍ້າປະຊາຄົມອາຊຽນ ໄດ້ຂື້ນບັນລະບາຍສະຫຼຸບການເຄື່ອນໄຫວວຽກງານອາຊຽນໃນແຕ່ລະເສົາຄ້ຳຄື: ກະຊວງການຕ່າງປະເທດ ໄດ້ສະຫລຸບວຽກງານເສົາຄໍ້າປະຊາຄົມການເມືອງ-ຄວາມໝັ້ນຄົງອາຊຽນ ລວມທັງຜົນກອງປະຊຸມສຸດຍອດອາຊຽນ ຄັ້ງທີ 38 ແລະ 39 ແລະ ກອງປະຊຸມທີ່ກ່ຽວຂ້ອງ ແລະ ການປະກອບສ່ວນຂອງການຮ່ວມມື ອາຊຽນ-ຍີ່ປຸ່ນ ເຂົ້າໃນການສ້າງປະຊາຄົມອາຊຽນ; ກະຊວງອຸດສະຫະກຳ ແລະ ການຄ້າ ໄດ້ສະຫລຸບວຽກງານ ເສົາຄໍ້າປະຊາຄົມເສດຖະກິດອາຊຽນ ແລະ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ໄດ້ສະຫຼຸບວຽກງານເສົາຄໍ້າປະຊາຄົມວັດທະນະທຳ-ສັງຄົມອາຊຽນ. ພ້ອມນີ້ ຍັງໄດ້ຮັບຟັງການບັນຍາຍ ແລະ ແລກປ່ຽນຄຳຄິດຄຳເຫັນກ່ຽວກັບການຮ່ວມມືດ້ານເສດຖະກິດພາກພື້ນ ແລະ ອະນຸພາກພື້ນ ແລະ ໄດ້ປຶກສາຫາລືກ່ຽວກັບວຽກງານການປະສານງານດ້ານການພົວພັນຕ່າງປະເທດລະຫວ່າງກະຊວງການຕ່າງປະເທດ ແລະ ພະແນກການຕ່າງປະເທດຂອງແຂວງ.
ໃນໂອກາດນິີ້ ກົມອາຊຽນ ກະຊວງການຕ່າງປະເທດ ຍັງໄດ້ແຈ້ງໃຫ້ຊາບກ່ຽວກັບການກະກຽມການເປັນປະທານອາຊຽນຂອງ ສປປ ລາວ ໃນປີ 2024 ເຊິ່ງໄດ້ເລີ່ມດໍາເນີນການກະກຽມດ້ານຕ່າງໆ ເປັນຕົ້ນ ໄດ້ສໍາເລັດການອອກຂໍ້ຕົກລົງວ່າດ້ວຍການແຕ່ງຕັ້ງຄະນະກໍາມະການຊີ້ນໍາລະດັບຊາດ ເພື່ອກະກຽມ ແລະ ດໍາເນີນການເປັນປະທານອາຊຽນໃນປີ 2024 ລົງນາມໂດຍພະນະທ່ານ ພັນຄໍາ ວິພາວັນ ນາຍົກລັດຖະມົນຕີແຫ່ງ ສປປ ລາວ. ນັບແຕ່ ສປປ ລາວ ເຂົ້າເປັນສະມາຊິກອາຊຽນ ໃນວັນທີ 23 ກໍລະກົດ 1997 ສປປ ລາວ ໄດ້ຮັບກຽດເປັນປະທານອາຊຽນມາແລ້ວ 2 ຄັ້ງຄື: ໃນປີ 2004-2005 ແລະ ໃນປີ 2016.
ໃນກອງປະຊຸມສຳມະນາຄັ້ງນີ້ ບັນດາຜູ້ຕາງໜ້າຈາກ 8 ແຂວງພາກເໜືອ ໄດ້ແຈ້ງກ່ຽວກັບການຈັດຕັ້ງປະຕິບັດແຜນການພັດທະນາເສດຖະກິດ-ສັງຄົມຂອງແຂວງຕົນ ກໍຄືຂໍ້ສະເໜີ ແລະ ທິດທາງແຜນການໃນການເຄື່ອນໄຫວວຽກງານການຕ່າງປະເທດໃນຂອບອາຊຽນ ໂດຍສະເພາະຂໍ້ສະດວກ ແລະ ຂໍ້ຫຍຸ້ງຍາກຕ່າງໆ ລວມທັງການຊຸກຍູ້-ຍາດແຍ່ງການລົງທຶນຈາກຕ່າງປະເທດເຂົ້າໃນການພັດທະນາເສດຖະກິດ-ສັງຄົມຂອງບັນດາແຂວງ..
# ຂ່າວ & ພາບ : ໄຊບັນດິດ