ກອງປະຊຸມກອງປະຊຸມດຳເນີນຊີວິດການເມືອງ ຄະນະບໍລິຫານງານພັກກະຊວງເຕັກໂນໂລຊີ ແລະ ການສື່ສານ ສະໄໝທີ I ຈັດຂຶ້ນວັນທີ 9 ມີນາ 2022 ທີ່ກະຊວງດັ່ງກ່າວ ເປັນປະທານຂອງສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດ ມີສະຫາຍ ບໍ່ວຽງຄຳ ວົງດາລາ ກຳມະການສູນກາງພັກ ເລຂາຄະນະພັກ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ບັນດາຄະນະຊີ້ນຳກອງປະຊຸມໃຫຍ່ຂັ້ນສູນກາງ ຄະນະປະຈຳພັກ ແລະ ກຳມະການພັກ ກະຊວງເຕັກໂນໂລຊີ ແລະ ການສື່ສານເຂົ້າຮ່ວມຢ່າງພ້ອມພຽງ.
![](https://v2.vientianemai.net/wp-content/uploads/2022/03/275015319_1012725692952780_7896692178969918774_n.jpg)
ກອງປະຊຸມໃນຄັ້ງນີ້ ຄະນະບໍລິຫານງານພັກກະຊວງເຕັກໂນໂລຊີ ແລະ ການສື່ສານ ໄດ້ດຳເນີນຊີວິດການເມືອງທ້າຍສະໄໝຂອງຕົນ ແລະ ພ້ອມກັນປະກອບຄຳເຫັນໃສ່ບົດສຳຫຼວດການນຳພາລວມຂອງຄະນະບໍລິຫານງານພັກກະຊວງເຕັກໂນໂລຊີ ແລະ ການສື່ສານໃນໄລຍະ 5 ປີ ຜ່ານມາ ແລະ ດຳເນີນການສຳຫຼວດກວດກາບຸກຄົນໃນຄະນະພັກ ເຊິ່ງບົດສຳຫຼວດດັ່ງກ່າວ ໄດ້ຍົກໃຫ້ເຫັນຜົນງານອັນພົ້ນເດັ່ນຂອງການເຄື່ອນໄຫວນຳພາ-ຊີ້ນຳຂອງຄະນະພັກ ພ້ອມນັ້ນໄດ້ຍົກໃຫ້ເຫັນຈຸດດີ ຈຸດອ່ອນ ຂໍ້ຄົງຄ້າງ ສາເຫດ ແລະ ບົດຮຽນທີ່ຖອດຖອນໄດ້ ພ້ອມທັງໄດ້ກຳນົດວິທີການ ແລະ ມາດຕະການແກ້ໄຂຈຸດອ່ອນ ຂໍ້ຄົງຄ້າງ ແລະ ການກຳນົດທິດທາງແກ້ໄຂໃນການນຳພາ-ຊີ້ນຳ ຂອງຄະນະພັກໃນ 5 ປີ ຕໍ່ໜ້າ.
![](https://v2.vientianemai.net/wp-content/uploads/2022/03/275435423_340659831328753_693176313536213032_n.jpg)
ໂອກາດນີ້ ສະຫາຍ ບຸນທອງ ຈິດມະນີ ໄດ້ໃຫ້ທິດຊີ້ນຳໃນການສືບຕໍ່ກະກຽມຄວາມພ້ອມຮອບດ້ານ ການດຳເນີນກອງປະຊຸມໃຫຍ່ ຄັ້ງທີ II ຂອງອົງຄະນະພັກກະຊວງເຕັກໂນໂລຊີ ແລະ ການສື່ສານໃຫ້ມີຜົນສຳເລັດດີດັ່ງນີ້: ພາຍຫຼັງສຳເລັດການດຳເນີນຊີວິດການເມືອງໃນຄັ້ງນີ້ແລ້ວ ໃຫ້ບັນດາຄະນະພັກນໍາເອົາເນື້ອໃນຈິດໃຈຜົນສຳເລັດຂອງການດຳເນີນຊີວິດການເມືອງໃນຄັ້ງນີ້ໄປຜັນຂະຫຍາຍ ແລະ ແກ້ໄຂບັນຫາຕົວຈິງ ເພື່ອສ້າງການຫັນປ່ຽນໃໝ່ທີ່ແຂງແຮງ ແລະ ເລິກເຊິ່ງຕາມທິດທີ່ພັກເຮົາວາງໄວ້ ໃຫ້ຮີບຮ້ອນຮຽບຮຽງ-ປັບປຸງຮ່າງລາຍງານການເມືອງ ບົດສຳຫຼວດການນຳພາລວມຂອງຄະນະພັກ ແລະ ແຜນພັດທະນາຂະແໜງການເຕັກໂນໂລຊີ ແລະ ການສື່ສານ ໃນ 5 ປີ ຕໍ່ໜ້າ ໃຫ້ສອດຄ່ອງກັບມະຕິກອງປະຊຸມໃຫຍ່ຄັ້ງທີ XI ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 ກໍຄືປະຕິບັດວາລະແຫ່ງຊາດທາງດ້ານເສດຖະກິດ-ການເງິນຂອງປະເທດ ພ້ອມກັນຄົ້ນຄວ້າປະກອບຄຳເຫັນໃນເວລາທາບທາມຮອບທີ III ເຮັດໃຫ້ທັງ 3 ເນື້ອໃນດັ່ງກ່າວ ເປັນຕົ້ນ ຮ່າງລາຍງານການເມືອງ ແລະ ແຜນພັດທະນາຂະແໜງການໃຫ້ມີເນື້ອໃນຄົບຖ້ວນສົມບູນ ສອດຄ່ອງ ແລະ ຕອບສະໜອງກັບການເລັ່ງທວງຂອງການຄຸ້ມຄອງບໍລິຫານລັດ ແລະ ການພັດທະນາເສດຖະກິດ-ສັງຄົມ ໃນເງື່ອນໄຂໃໝ່ ສອດຄ່ອງກັບການຂະຫຍາຍຕົວທາງດານດ້ານເຕັກໂນໂລຊີ ແລະ ການສື່ສານໃນຍຸກປັດຈຸບັນ ພ້ອມກັນຊີ້ແຈງໃຫ້ສະມາຊິກພັກ ພະນັກງານ-ລັດຖະກອນ ຮັບຮູ້ ແລະ ເຂົ້າໃຈກ່ຽວກັບບັນຫາຕ່າງໆທີ່ເຂົາເຈົ້າໄດ້ຕຳນິສົ່ງຂ່າວຕໍ່ແຕ່ລະສະຫາຍໃນຄະນະພັກ ແມ່ນໄດ້ນຳມາເວົ້າວ່າກັນກົງໄປກົງມາ ໃຫ້ເອົາໃຈໃສ່ສືບຕໍ່ນຳພາ-ຊີ້ນຳວຽກງານໂຄສະນາ ສຶກສາອົບຮົມການເມືອງແນວຄິດ ຍູ້ຂະບວນການຮອບດ້ານໃຫ້ຟົດຟື້ນ ແລະ ແຂງແຮງຕື່ມອີກ ໂດຍສະເພາະ ການປະຕິບັດ 2 ວາລະແຫ່ງຊາດ ຂະບວນການຈັດຕັ້ງປະຕິບັດໜ້າທີ່ການເມືອງ ວິຊາສະເພາະຂອງແຕ່ລະຂົງເຂດ ເອົາໃຈໃສ່ສະກັດກັ້ນພະຍາດໂຄວິດ-19 ແລະ ຂະບວນການອື່ນໆ ສືບຕໍ່ຄົ້ນຄວ້າກະກຽມບຸຄະລາກອນທີ່ຈະສະໝັກຮັບເລືອກຕັ້ງເຂົ້າໃນຄະນະບໍລິຫານງານພັກກະຊວງເຕັກໂນໂລຊີ ແລະ ການສື່ສານຊຸດໃໝ່ ໂດຍໃຫ້ອີງໃສ່ຜົນຂອງການດຳເນີນຊີວິດການເມືອງໃນຄັ້ງນີ້ ແລະ ອື່ນໆ.
![](https://v2.vientianemai.net/wp-content/uploads/2022/03/274986893_494925032135770_5511048099917795108_n.jpg)
# ຂ່າວ & ພາບ : ຂັນທະວີ