ໃນໂອກາດເຂົ້າຮ່ວມກອງປະຊຸມທາງໄກ ສະໄໝພິເສດຂອງລັດຖະມົນຕີແຮງງານອາຊຽນ ກ່ຽວກັບການຮັບມືຈາກຜົນກະທົບຂອງພະຍາດ COVID-19 ຕໍ່ແຮງງານ ແລະ ການຈ້າງງານ ວັນທີ 14 ພຶດສະພາ 2020 ທ່ານ ຄຳແພງ ໄຊສົມແພງ ລັດຖະມົນກະຊວງແຮງງານ ແລະ ສະຫວັດດີການ-ສັງຄົມ ໄດ້ສະເໜີວ່າ: ໃນເງື່ອນໄຂທີ່ສະພາບການແຜ່ລະບາດຂອງພະຍາດ COVID-19 ຍັງບໍ່ຮູ້ຈະສິ້ນສຸດເວລາໃດ ບັນດາປະເທດສະມາຊິກອາຊຽນ ທີ່ມີຜູ້ອອກແຮງງານລາວໄປເຮັດວຽກຢູ່ປະເທດສະມາຊິກໃດໜຶ່ງ ທີ່ຍັງຢູ່ ຫຼືກັບຄືນປະເທດແລ້ວ ຂໍໃຫ້ມີການປະຕິບັດນະໂຍບາຍການອຸດໜູນຕ່າງໆ ຕາມກົດໝາຍທີ່ກ່ຽວຂ້ອງຂອງປະເທດນັ້ນ ພ້ອມນີ້ ກໍໄດ້ສະເໜີອົງການແຮງງານສາກົນ ພິຈາລະນາແນະນຳດ້ານນະໂຍບາຍ ແລະ ການຊ່ວຍເຫຼືອດ້ານເຕັກນິກ ວິຊາການ ແລະ ແຫຼ່ງທຶນ ເພື່ອແກ້ໄຂຜົນກະທົບດ້ານແຮງງານຈາກພະຍາດ COVID-19 ໃຫ້ມີປະສິດທິຜົນດີຂຶ້ນ.
ທ່ານ ຄຳແພງ ໄຊສົມແພງ ກ່າວວ່າ: ການລະບາດຂອງ COVID-19 ມີຜົນກະທົບຕໍ່ເສດຖະກິດ-ສັງຄົມພາຍໃນປະເທດຫຼາຍດ້ານ ເປັນຕົ້ນ ການປິດຫົວໜ່ວຍແຮງງານ/ຫົວໜ່ວຍທຸລະກິດ ໄດ້ສົ່ງຜົນກະທົບໂດຍກົງທາງທຸລະກິດ ເຮັດໃຫ້ແຮງງານຈຳນວນຫຼາຍໄດ້ພັກວຽກ ມີຫຼາຍຫົວໜ່ວຍທຸລະກິດທີ່ມີຄວາມຈຳເປັນ ໃນການຫຼຸດຜ່ອນການຜະລິດ ກໍມີຄວາມສ່ຽງໃນການຍົກເລີກສັນຍາແຮງງານ ມີຫຼາຍຫົວໜ່ວຍທຸລະກິດ ບໍ່ສາມາດຈ່າຍຄ່າແຮງງານໃຫ້ແຮງງານໄດ້ ໃນເວລາທີ່ຍັງບໍ່ສາມາດດຳເນີນກິດຈະການ ໂດຍສະເພາະຂະແໜງບໍລິການທ່ອງທ່ຽວ ໂຮງແຮມ ຮ້ານອາຫານ ແລະ ອື່ນໆ ທີ່ມີຜົນກະທົບຫຼາຍ ສຳລັບຂະແໜງອຸດສາຫະກຳຈຳນວນໜຶ່ງ ຍັງສາມາດຮັກສາແຮງງານໄວ້ ໂດຍການຫຼຸດຄ່າແຮງງານທີ່ເຄີຍໄດ້ຮັບປົກກະຕິລົງ ພ້ອມນີ້ ແຮງງານລາວ 100.000 ກວ່າຄົນ ໄດ້ເດີນທາງກັບຈາກຕ່າງປະເທດ ເຊິ່ງມີຜົນກະທົບຕໍ່ຄ່າແຮງງານ ແລະ ຊີວິດການເປັນຢູ່.
ບັນຫານີ້ເປັນພຽງຜົນກະທົບໃນໄລຍະເບື້ອງຕົ້ນເທົ່ານັ້ນ ຖ້າສະພາບການແຜ່ລະບາດຂອງພະຍາດ COVID-19 ຍັງແກ່ຍາວໄປຕື່ມອີກ ຈະມີສິ່ງທ້າທາຍອັນໃຫຍ່ຫຼວງໃຫ້ລັດຖະບານ ທີ່ຈະຕ້ອງໄດ້ຫາວິທີການແກ້ໄຂ ເຊິ່ງຕາມການຄາດຄະເນເບື້ອງຕົ້ນ ຜົນກະທົບຂອງພະຍາດ COVID-19 ໃນປັດຈຸບັນ ຫາກມີການແກ່ຍາວ ຈະເຮັດໃຫ້ອັດຕາການຫວ່າງງານພາຍໃນ ສປປ ລາວ ເພີ່ມຂຶ້ນຈາກອັດຕາປົກກະຕິ 2% ຂຶ້ນເປັນ 25%.
# ຂ່າວ & ພາບ : ເພັດສະໝອນ