ຫາກຕິດຕາມກະແສສັງຄົມແລ້ວ ນອກຈາກຂ່າວຄາວກ່ຽວກັບພະຍາດໂຕຮ້າຍກາດ COVID-19 ທີ່ມາແຮງໃນເວລານີ້ ກໍຍັງມີຂ່າວກ່ຽວກັບຄ່ານ້ຳ-ຄ່າໄຟຕາມມາ ຍ້ອນວ່າທາງການໄດ້ຮຽກຮ້ອງໃຫ້ຢູ່ເຮືອນ ເລີ່ມແຕ່ຕົ້ນເດືອນເມສາເປັນຕົ້ນມາ ເພື່ອຕໍ່ສູ້ກັບການລະບາດຂອງພະຍາດ COVID-19 ຄັນຢູ່ເຮືອນ ແນ່ນອນການຊົມໃຊ້ໄຟຟ້າ ແລະ ນ້ຳປະປາຈະຫຼາຍຂຶ້ນ.
ເຫັນໄດ້ຄວາມຈຳເປັນດັ່ງກ່າວ ລັດຖະບານຈຶ່ງອອກຂໍ້ຕົກລົງເລື່ອງນະໂຍບາຍຕ່າງໆ ເຊິ່ງໃນນັ້ນມີຂໍ້ຕົກລົງ ເລກທີ 31/ນຍ ລົງວັນທີ 02/04/2020 ໃນມາດຕາ 01: ຂໍ້ 7 ນ້ອຍ ບອກວ່າ “ໃຫ້ຄົ້ນຄວ້າຜ່ອນຜັນລາຄາ ແລະ ຕໍ່ເວລາໃນການຊຳລະຄ່າໄຟຟ້າ ແລະ ນ້ຳປະປາຂອງຜູ້ຊົມໃຊ້ຄົວເຮືອນ ແລະ ພາກທຸລະກິດ…” ນັ້ນກໍ່ໝາຍຄວາມວ່າ ຄ່າໄຟ-ຄ່ານ້ຳໃນເດືອນ 4-5-6/2020 ຕ້ອງມີນະໂຍບາຍອອກມາໃໝ່ ໃນຂະນະຂຽນບົດນີ້ຢູ່ນີ້ ນະໂຍບາຍເຫຼົ່ານີ້ຍັງບໍ່ທັນອອກມາ ຄິດວ່າການເກັບຄ່ານ້ຳ-ຄ່າໄຟໃນເດືອນດັ່ງກ່າວ ກໍຈະຕ້ອງລໍເບິ່ງວ່ານະໂຍບາຍຈະອອກມາແນວໃດ? ເວົ້າເລື່ອງໃບບິນເກັບເງິນຄ່ານ້ຳ-ຄ່າໄຟນີ້ ບໍ່ແມ່ນເກັບແບບເດືອນຕໍ່ເດືອນເນີ ! ເຊັ່ນວ່າ: ບິນເດືອນ 4 ແມ່ນເກັບຕາມການຊົມໃຊ້ຂອງເດືອນ 3 ສະນັ້ນ ຖ້າຈະມີນະໂຍບາຍຜ່ອນຜັນລາຄາຕາມຂໍ້ຕົກລົງຂອງລັດຖະບານ ບິນນັ້ນກໍຈະແມ່ນເດືອນ 5 ທີ່ເກັບຕາມການຊົມໃຊ້ຂອງເດືອນ 4… ສ່ວນກະແສຄ່າໄຟຟ້າແພງຂຶ້ນທົບເທົ່າ ຫຼື ຕ່າງໆນາໆນັ້ນ ຫາກແມ່ນໃບບິນເດືອນ 4/2020 ແມ່ນເກັບຕາມລາຄາເກົ່າ ເພາະເປັນການຊົມໃຊ້ໃນເດືອນ 3/2020.
ຜ່ານມາການເກັບຄ່າໄຟ-ຄ່ານ້ຳ ມີການເກັບຫຼາຍລະດັບແຕກຕ່າງກັນ ສະເພາະໄຟຟ້ານີ້ ປະເພດທີ່ຢູ່ອາໄສ ມີ 6 ຂັ້ນ ຈາກລາຄາຕ່ຳສຸດ 348 ກີບ ຫາ 999 ກີບ ຕໍ່ໜຶ່ງກິໂລວັດ…ໃນນັ້ນ ໄດ້ກຳນົດປະລິມານຊົມໃຊ້ແມ່ນ 0-25 ກິໂລວັດ ເປັນລາຄາຕ່ຳສຸດ ສ່ວນນ້ຳປະປາລາຄາຕ່ຳສຸດແມ່ນ 1.379 ກີບ ໂດຍກຳນົດປະລິມານຊົມໃຊ້ແມ່ນ 0-10 ແມັດກ້ອນ.
ສິ່ງທີ່ສັງຄົມໂສເລ້ກັນ ແລະ ເປັນກະແສຕາມສື່ອອນລາຍໃນເວລານີ້ ແມ່ນເລື່ອງຄ່າໄຟຟ້າທີ່ມີການເໜັງຕີງຂຶ້ນຫຼາຍ ນັບແຕ່ເດືອນ 4/2020 ເຊິ່ງເປັນເດືອນທີ່ເກັບຄ່າຊົມໃຊ້ຂອງເດືອນ 3/2020 ຕາມລາຄາເກົ່າ ສ່ວນເດືອນ 5/2020 ເກັບຄ່າຊົມໃຊ້ຂອງເດືອນ 4/2020 ນັ້ນ ຢູ່ນະຄອນຫຼວງວຽງຈັນ ຍັງບໍ່ທັນເຫັນບິນອອກມາເທື່ອ.
ກະແສຄົນວິພາກວິຈານຫຼາຍແມ່ນ ແຈ້ງການລົງວັນທີ 11 ເມສາ 2020 ຂອງລັດວິສາຫະກິດໄຟຟ້າລາວ ກ່ຽວກັບລາຄາໄຟຟ້າສະບັບປັບປຸງໃໝ່ ເລີ່ມແຕ່ເດືອນພຶດສະພາ 2020 ເຖິງເດືອນທັນວາ 2025 ຂໍຍົກເອົາປະເພດທີ່ຢູ່ອາໄສເພິ່ນກຳນົດສອງຂັ້ນທໍ່ນັ້ນຄື: ປະລິມານຊົມໃຊ້ໃນເດືອນແຕ່ 0 ຫາ 150 ກິໂລວັດ ແລະ ສູງກວ່າ 150 ກິໂລວັດຂຶ້ນໄປ ໂດຍລາຄາຈະປັບຂຶ້ນໄປເລື້ອຍໆເຊັ່ນ: ປີ 2020 ເລີ່ມເດືອນ 5 ລາຄາຕ່ຳສຸດແມ່ນ 355 ກີບຕໍ່ໜຶ່ງກິໂລວັດ ສູງສຸດແມ່ນ 710 ກີບຕໍ່ໜຶ່ງກິໂລວັດ ປີຖັດໄປກໍຂຶ້ນລາຄາຕ່ຳສຸດ 2021 ແມ່ນ 359 ກີບ ສູງສຸດ 717 …ຮອດປີ 2025 ລາຄາຕ່ຳສຸດແມ່ນ 373 ກີບ ແລະ ສູງສຸດ 746 ກີບ…ກຳນົດຮອດ 2025 ທໍ່ນັ້ນ ກໍບໍ່ຮູ້ວ່າຕໍ່ໄປຈະຂຶ້ນ ຫຼື ລົງ… ນະໂຍບາຍລາຄາໃໝ່ນີ້ ເບິ່ງຄືຖືກລົງ ແຕ່ໃນຕົວຈິງຜູ້ໃຊ້ໄຟຟ້າຫຼາຍກວ່າ 150 ກິໂລວັດຕໍ່ເດືອນ ແມ່ນໄດ້ເສຍແພງຂຶ້ນເກືອບທົບເທົ່າ.
ຍ້ອນວ່າອາກາດປະເທດເຮົາຢູ່ໃນລະດັບຮ້ອນ ສຳລັບຄົນໃນເມືອງເກືອບວ່າມີໜ້ອຍເຮືອນທີ່ສຸດ ໃຊ້ໄຟຟ້າຫຼຸດເດືອນໜຶ່ງ 150 ກິໂລວັດ ສະນັ້ນ ລາຄາໄຟຟ້າໃໝ່ນີ້ ຈຶ່ງກະທົບຕໍ່ຄອບຄົວມະນຸດເງິນເດືອນເປັນສ່ວນໃຫຍ່.
ມີຜູ້ຕັ້ງບັນຫາວ່າ: ລາຄາໃໝ່ນີ້ ສ່ອງແສງໃຫ້ເຫັນຢ່າງຊັດເຈນວ່າ ບໍ່ໄດ້ດັດແປງລາຄາໃຫ້ຖືກລົງ ເບິ່ງລວມໆຄືຖືກລົງ ແຕ່ໃນແຜນຄິດໄລ່ຍັງຄົງບໍ່ຫຼຸດປະລິມານການຊົມໃຊ້ໃນລາຄາຕ່ຳສຸດໃຫ້ສູງຂຶ້ນ ສະນັ້ນ ຈຶ່ງຂໍສະເໜີວ່າ ຄວນປັບປະລິມານການຊົມໃຊ້ລາຄາຕ່ຳສຸດ ແມ່ນ 0 ຫາ 300 ກິໂລວັດ ເພາະໃນຕົວຈິງ ຜູ້ຊົມໃຊ້ຢູ່ຕົວເມືອງກາຍ 300 ກິໂລວັດ ຂຶ້ນໄປ.
ນັ້ນແມ່ນບາງຂໍ້ມູນທີ່ຜູ້ຂຽນເກັບກຳມາໄດ້ນໍ? ສ່ວນວ່າການປະຕິບັດຕົວຈິງໃນເດືອນ (4-5-6/2020) ນັ້ນ ຄົງຕ້ອງລໍເບິ່ງແຈ້ງການຢ່າງເປັນທາງການ ວ່າເພິ່ນຈະມີນະໂຍບາຍຫຍັງແດ່? ສະນັ້ນ ຈຶ່ງຂໍຮຽກຮ້ອງໃຫ້ພວກເຮົາໝົດທຸກຄົນ ຈົ່ງອົດທົນລໍຖ້າຟັງ…ຢ່າຕື່ນຕາມກະແສ…ສ້າງຄວາມສັບສົນແກ່ຕົນເອງ ແລະ ສັງຄົມ.
ບັນຫາທຸກຢ່າງມີທາງອອກສະເໝີ