ການພັດທະນາຊັບພະຍາກອນມະນຸດ ໃນສາຂາວິຊາຄູ ເປັນວຽກງານທີ່ມີຄວາມສຳຄັນ ໃນການພັດທະນາຊັບພະຍາກອນມະນຸດ ໃຫ້ມີຄວາມຮູ້ຄວາມສາມາດ ສະນັ້ນ ກະຊວງສຶກສາທິການ ແລະ ກີລາ ຈິ່ງໄດ້ເອົາໃຈໃສ່ປັບປຸງວຽກງານດັ່ງກ່າວ ໃຫ້ແທດເໝາະກັບສະພາບຄວາມເປັນຈິງແຕ່ລະໄລຍະເຊັ່ນ ໄດ້ມີການປັບປຸງນິຕິກຳ ແລະ ບັນດາເຄື່ອງມືທີ່ຈຳເປັນໃນການສະໜັບສະໜູນ ການຈັດຕັ້ງປະຕິບັດມາດຕະການແກ້ໄຂຕ່າງໆເຊັ່ນ ມາດຕະການແກ້ໄຂບັນຫາຄູເຫຼືອ ແລະ ຄູບໍ່ພໍ ຜ່ານການສຳຫຼວດໂຮງຮຽນປະຖົມ ຈຳນວນ 2.557 ໂຮງຮຽນ ໄດ້ຈັດກຸ່ມໂຮງຮຽນຈຳນວນ 411 ກຸ່ມ ເຊິ່ງໂຮງຮຽນທີ່ມີນັກໜ້ອຍກວ່າ 30 ຄົນລົງມາມີ 425 ໂຮງຮຽນ ໃນນີ້ ໂຮງຮຽນທີ່ມີນັກຮຽນ 6-10 ຄົນ ມີ 40 ໂຮງຮຽນ ນັກຮຽນ 5 ຄົນມີ 10 ໂຮງຮຽນ ນັກຮຽນມີ 2 ຄົນມີ 1 ໂຮງຮຽນ ຈັດສັນຄູຊັ້ນປະຖົມຈາກບ່ອນທີ່ເຫຼືອໄປບ່ອນທີ່ບໍ່ພໍໄດ້ 96 ຄົນ ເຮັດໃຫ້ຈຳນວນຄູເຫຼືອຈາກ 622 ຄົນ ມາເປັນ 526 ຄົນ ເທົ່າກັບ 15,43% ວິເຄາະຄວາມຕ້ອງການຄູເພີ່ມ ປັບປຸງແຜນກໍ່ສ້າງຄູໃຫ້ແທດເໝາະກັບແຜນຄວາມຕ້ອງການຕົວຈິງ ແຕ່ສົກຮຽນ 2019-2025.
ກຳນົດມາດຕະການແກ້ການບັນຈຸລັດຖະກອນຄູ ແລະ ບໍລິຫານ ໄດ້ອອກຄຳສັ່ງແນະນຳກ່ຽວກັບການຮັບບັນຈຸລັດຖະກອນຄູ ແລະ ບໍລິຫານປະຈຳປີ 2019 ໂດຍໃຫ້ແຕ່ລະພາກສ່ວນ ແຕ່ງຕັ້ງຄະນະກຳມະການສອບເສັງເລືອກບັນຈຸໃຫ້ຖືກຕ້ອງຕາມຊັ້ນ ສາຍ ແລະ ລາຍວິຊາທີ່ຕ້ອງການ ໂດຍສະເພາະ ເຂດຫ່າງໄກສອກຫຼີກ ຜູ້ສະໝັກໃໝ່ຕ້ອງມີຄະແນນວິຊາສະເພາະສະເລ່ຍ 3,00 ຂຶ້ນໄປ ໃຫ້ບັນຈຸຄູອາສາສະໝັກ 80% ແລະ ຄູຈົບໃໝ່ 20% ປີ 2019 ໄດ້ຮັບໂກຕາທັງໝົດ 936 ຕົວເລກ ໃນນັ້ນໄດ້ບັນຈຸຄູ 879 ຄົນ ເທົ່າກັບ 93,91% ພະນັກງານບໍລິຫານ 57 ຄົນ ເທົ່າກັບ 6,09% ບັນຈຸຄູອາສາສະໝັກ 858 ຄົນ ເທົ່າກັບ 8,60% ຂອງຈຳນວນຄູອາສາສະໝັກ 10.645 ຄົນ ບັນຈຸນັກສຶກສາຄູທີ່ຮຽນຈົບໃໝ່ 21 ຄົນ ເຊິ່ງປະກອບມີຄູການສຶກສາກ່ອນໄວຮຽນ 207 ຄົນ ຄູປະຖົມສຶກສາ 193 ຄົນ ຄູມັດທະຍົມ 373 ຄົນ ຄູມະຫາວິທະຍາໄລ 35 ຄົນ ຄູວິທະຍາໄລຄູ ວິທະຍາໄລພາລະ-ສິລະວິທະຍາໄລສົງ 15 ຄົນ ຄູວິທະຍາໄລເຕັກນິກວິຊາຊີບ 56 ຄົນ.
ມາດຕະການແກ້ໄຂບັນຫາຄູອາສາສະໝັກ ເຊິ່ງໄດ້ອອກຄຳສັ່ງແນະນຳກ່ຽວກັບການແກ້ໄຂບັນຫາ ໂດຍໃຫ້ບັນດາແຂວງ ນະຄອນຫຼວງ ເມືອງ ຈັດບູລິມະສິດເປັນ 3 ບັນຊີຄື ບັນຊີບູລິມະສິດທີ 1 ບັນຊີເປົ້າໝາຍເພື່ອອາສະໝັກເຂົ້າເປັນລັດຖະກອນຄູ ບູລິມະສິດທີ 2 ບັນຊີເປົ້າໝາຍຄູອາສາສະໝັກທີ່ສົ່ງໄປຍົກລະດັບ ແລະ ບັນຊີເປົ້າໝາຍຄູອາສາສະໝັກ ທີ່ຈະໄປເຝິກອົບຮົມວິຊາຊີບອື່ນ ຜ່ານການຈັດຕັ້ງປະຕິບັດຕົວຈິງຂອງການຈັດສັນບັນຊີບູລິມະສິດ ສັງລວມການຈັດບັນຊີຄູອາສະໝັກໃນ 40 ເມືອງເປົ້າໝາຍໄດ້ 3.375 ຄົນ ໃນນັ້ນບັນຊີທີ 1 ມີ 2.160 ຄົນ ບັນທີ 2 ມີ 586 ຄົນ ບັນຊີທີ 3 ມີ 629 ຄົນ ສຳລັບການຈັດບັນຊີອາສະໝັກໃນທົ່ວປະເທດ ສາມາດສັງລວມໄດ້ 11.211 ຄົນ ໃນນີ້ ບັນຊີທີ 1 ມີ 6.709 ຄົນ ບັນທີ 2 ມີ 2.240 ຄົນ ບັນຊີທີ 3 ມີ 2.262 ຄົນ.
ເພື່ອເປັນການສືບຕໍ່ການຈັດຕັ້ງປະຕິບັດ ມາດຕະການຂອງວຽກງານການພັດທະນາຊັບພະຍາກອນມະນຸດ ໃນສາຂາວິຊາຄູ ໃຫ້ນັບມື້ດີຂຶ້ນ ສະນັ້ນ ຈິ່ງໄດ້ກຳນົດທິດທາງ ແຜນການໃນຕໍ່ໜ້າເຊັ່ນ ສຶບຕໍ່ຊັບຊ້ອນ ແລະ ຈັດສັນຄູຄືນໃໝ່ ໂດຍຂະຫຍາຍໄປ 148 ເມືອງ ໃຫ້ສຳເລັດຕາມຄາດໝາຍ ການບັນຈຸຄູໃໝ່ປີ 2020 ຄົ້ນຄວ້າໃຫ້ບູລິມະສິດບັນຈຸຄູໃນ 4 ວິຊາພື້ນຖານ (ພື້ນຖານວິຊາຊີບ ໄອຊີທີ ພາລະສຶກສາ ແລະ ສິລະປະສຶກສາ) ທີ່ຍັງຂາດການປະສານສົມທົບກັບສະຖາບັນພັດທະນາອາຊີວະສຶກສາ ໃນການຄັດເລືອກເອົານັກຮຽນ-ນັກສຶກສາທີ່ຈົບ ໃນຖານອາຊີວະສຶກສາ ໄປບຳລຸງວິຊາຄູ ເພື່ອໃຫ້ໄປສອນວິຊາພື້ນຖານວິຊາຊີບ ຫຼື ວິຊາທີ່ກ່ຽວຂ້ອງກັບຫຼັກສູດ ໃນໂຮງຮຽນສາມັນສຶກສາ ປັບປຸງຖານຂໍ້ມູນຄຸ້ມຄອງບຸກຄະລາກອນ ເພື່ອໃຫ້ຂໍ້ມູນໃນການສ້າງແຜນຄວາມຕ້ອງການຄູ ບັນຈຸຄູໃໝ່ ຊັບຊ້ອນ ຈັດສັນຄູໃຫ້ມີຄວາມຊັດເຈນ ທັງສາມາດເຊື່ອມໂຍງກັນໄດ້ລະຫວ່າງສູນກາງ ແລະ ທ້ອງຖິ່ນ ບັນຈຸລັດຖະກອນຄູໃໝ່ໃຫ້ຖືກຕ້ອງຕາມຄວາມຕ້ອງການຕົວຈິງ ຕາມແຕ່ລະຊັ້ນ ສາຍ ແລະ ລາຍວິຊາທີ່ຍັງຂາດຄູ ໂດຍສະເພາະ ເຂດຫ່າງໄກສອກຫຼີກ ຄົ້ນຄວ້າກ່ຽວກັບການໃຫ້ມີຄູສັນຍາຈ້າງ ເພື່ອແກ້ໄຂການຂາດຄູ ໂດຍສະເພາະ ຢູ່ເຂດຊົນນະບົດ ແລະ ອື່ນໆ.