ເພື່ອເປັນການຫຼຸດຜ່ອນຜົນກະທົບຕໍ່ເສດຖະກິດຂອງລາວ ຈາກການສືບຕໍ່ປະຕິບັດມາດຕະການໃນການປ້ອງກັນ ຄວບຄຸມ ສະກັດກັ້ນ ແລະ ແກ້ໄຂການແຜ່ລະບາດຂອງ COVID-19 ໃນໄລຍະແຕ່ວັນທີ 4-17 ພຶດສະພາ 2020 ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ໄດ້ກຳນົດ ແລະ ປັບປຸງເງື່ອນໄຂ ແລະ ມາດຕະການສຳລັບການສືບຕໍ່ເຄື່ອນໄຫວຂອງພາກທຸລະກິດ ໃນໄລຍະທີ່ມີການລະບາດຂອງພະຍາດດັ່ງກ່າວ ຕາມທີ່ໄດ້ກຳນົດໃນຄຳແນະນຳ 031/ສພກ ລົງວັນທີ 21 ເມສາ 2020 ເຊິ່ງພາກທຸລະກິດຕ້ອງໄດ້ປະຕິບັດ 6 ເງື່ອນໄຂ ແລະ 5 ມາດຕະການທີ່ວາງອອກຢ່າງເຂັ້ມງວດ.
ສຳລັບ 6 ເງື່ອນໄຂຂອງພາກທຸລະກິດ ທີ່ສາມາດເປີດດຳເນີນກິດຈະການໃນໄລຍະມີການລະບາດຂອງພະຍາດ COVID-19 ປະກອບມີ: 1. ມີສະຖານທີ່ເຮັດວຽກທີ່ບໍ່ແອອັດ ແລະ ຮັບປະກັນໄລຍະຫ່າງ 1 ແມັດຂຶ້ນໄປ 2. ມີຫ້ອງອາຫານທີ່ບໍ່ແອອັດ ຮັບປະກັນຫຼັກການອະນາໄມ ບໍ່ໃຫ້ໃຊ້ເຄື່ອງຮ່ວມກັນ ແລະ ເວລານັ່ງກິນອາຫານຕ້ອງມີໄລຍະຫ່າງ 1 ແມັດຂຶ້ນໄປ ແລະ ມີສະຖານທີ່ແຍກປ່ຽວສຳລັບກໍລະນີສົງໃສພະຍາດ COVID-19 3. ມີນ້ຳດື່ມ ນ້ຳໃຊ້ທີ່ສະອາດ ມີຜ້າອັດປາກ-ດັງ ບ່ອນລ້າງມື ສະບູ ແລະ ເຈລລ້າງມື ໃຫ້ພະນັກງານກຳມະກອນຢ່າງພຽງພໍ ແລະ ໃຫ້ຖືກຕາມຫຼັກການອະນາໄມ 4. ມີເຈົ້າໜ້າທີ່ຮັກສາເວນຍາມ ແລະ ມີການກວດກາພະນັກງານ ກຳມະກອນທີ່ເຂົ້າອອກຢ່າງເຂັ້ມງວດ 5. ມີໜ່ວຍງານອະນາໄມ ແລະ ມີກະຕ່າຂີ້ເຫຍື້ອແບບມີຝາປິດຢູ່ແຕ່ລະຈຸດ ເພື່ອບັນຈຸຂີ້ເຫຍື້ອ ແລະ ສິ່ງເສດເຫຼືອທີ່ມີຄວາມສ່ຽງຕໍ່ການຕິດເຊື້ອພະຍາດ 6. ມີການອຳນວຍຄວາມສະດວກໃຫ້ແກ່ທີມແພດ ແລະ ພາກສ່ວນທີ່ກ່ຽວຂ້ອງເຂົ້າ ໄປຕິດຕາມກວດກາເຜີຍແຜ່ຄວາມຮູ້ກ່ຽວກັບພະຍາດ COVID-19 ເປັນແຕ່ລະໄລຍະ ສຳລັບໂຄງການ ບໍລິສັດ ແລະ ໂຮງງານຕ່າງໆ. ນອກຈາກນັ້ນ ພາກທຸລະກິດທີ່ຈະດຳເນີນກິດຈະການຕ້ອງປະຕິບັດ 6 ມາດຕະການ ຄື: ຕ້ອງມີຈຸດກວດອຸນຫະພູມ ແລະ ສະໜອງເຈວລ້າງມືໃຫ້ພະນັກງານ-ກຳມະກອນຢູ່ທາງເຂົ້າ-ອອກ ບ່ອນເຮັດວຽກ ຫໍພັກ ແລະ ຫ້ອງອາຫານ ຕອນເຊົ້າ-ແລງໃນແຕ່ລະວັນ ແລະ ຖ້າພົບເຫັນຜູ້ມີອາການໄຂ້ (ອຸນຫະພູມສູງກວ່າ 37,5 ອົງສາ) ໄອ ຫຼື ຫາຍໃຈຍາກແມ່ນໃຫ້ບັນທຶກໄວ້ ແລະ ຕ້ອງໄດ້ສົ່ງເຂົ້າຫ້ອງແຍກປ່ຽວຂອງໂຄງການ ບໍລິສັດ ແລະ ໂຮງງານ ທີ່ຈັດໄວ້ຢ່າງຮີບດ່ວນ ແລ້ວໂທປຶກສາສາຍດ່ວນ 166 ແລະ 165 ພົວພັນໃຫ້ແພດໝໍເຂົ້າກວດທັນທີ 2. ຕ້ອງມີຜ້າອັດປາກ-ດັງສະໜອງໃຫ້ພະນັກງານ-ກຳມະກອນທຸກຄົນໃສ່ຕະຫຼອດໄລຍະເວລາເຮັດວຽກ ແລະ ເວລາຢູ່ຮ່ວມກັນໃນສະຖານທີ່ໃດໜຶ່ງ ແລະ ມີສະຖານທີ່ສະດວກສຳລັບລ້າງມື ໃສ່ສະບູ ຫຼື ເຈວລ້າງມື ຕ້ອງມີການຮັກສາໄລຍະຫ່າງຢ່າງໜ້ອຍ 1 ແມັດຂຶ້ນໄປ ສຳລັບພະນັກງານ-ກຳມະກອນ ຫ້າມດຳເນີນກິດຈະກຳທີ່ບໍ່ສາມາດຮັກສາໄລຍະຫ່າງໄດ້ ເຊັ່ນ: ກີລາ ງານລ້ຽງ ລວມທັງງານຊຸມນຸມຕ່າງໆ 4. ຕ້ອງມີມາດຕະການກວດກາຄົນຂັບລົດຂົນສົ່ງສິນຄ້າ ຫຼື ຜູ້ມາພົວພັນວຽກຈາກພາຍນອກຢ່າງເຄັ່ງຄັດ ຕາມມາດຕະການທີ່ວາງອອກຄືກັນກັບພະນັກງານ-ກຳມະກອນຂອງຕົນ 5. ຕ້ອງອະນາໄມສະຖານທີ່ເຮັດວຽກຂອງພະນັກງານ-ກຳມະກອນ ຫ້ອງອາຫານ ຫ້ອງນ້ຳ ບ່ອນພັກ ແລະ ສາງບ່ອນທີ່ຮັບສົ່ງສິນຄ້າ ພາຍຫຼັງສີ້ນສຸດກິດຈະກຳທຸກໆມື້ ສຳລັບໂຄງການ ບໍລິສັດ ແລະ ໂຮງງານ.