ແຕ່ວັນທີ 2-4 ມີນາ 2022 ການແລ່ນຕໍ່ທວນໄຟງານກີລາໂອແລມປິກຄົນພິການລະດູໜາວ ປັກກິ່ງ ຈະຈັດຂຶ້ນຢູ່ 3 ເຂດ ຄື: ນະຄອນຫຼວງປັກກິ່ງ ເມືອງຢຽນຊິ້ງ ແລະ ນະຄອນຈ່າງເຈ່ຍໂຂ ໂດຍແບ່ງເປັນ 3 ຂັ້ນຕອນ ຄື: ການເກັບໄຟ ການເຕົ້າໂຮມໄຟ ແລະ ການແລ່ນຕໍ່ທວນໄຟ ສິ່ງທີ່ເຮັດໃຫ້ຄົນທັງຫຼາຍສົນໃຈຫຼາຍທີ່ສຸດ ນັ້ນກໍຄືເປັນຫຍັງໄຟງານກີລາໂອແລມປິກຄົນພິການລະດູໜາວປັກກິ່ງ ຕ້ອງເຮັດພິທີເກັບໄຟຢູ່ 9 ບ່ອນ?,
ທຳອິດໄຟງານກີລາໂອລິມປິກລະດູໜາວ ປັກກິ່ງ ແມ່ນເຮັດພິທີເກັບໄຟຢູ່ສະໜາມກີລາໂອແລມປິກບູຮານຢູ່ປະເທດເກຣັກ ເຊິ່ງເປັນແຫຼ່ງກຳເນີດຂອງງານກີລາໂອແລມປິກ ແຕ່ອີງຕາມຄວາມຮຽກຮ້ອງຂອງຄະນະກຳມະການໂອແລມປິກຄົນພິການສາກົນ ແລະ ແນວຄິດພື້ນຖານກ່ຽວກັບໄຟຂອງງານກີລາໂອແລມປິກຄົນພິການ ບຸກຄົນ ອົງການຈັດຕັ້ງ ແລະ ຕົວເມືອງໃດໆ ຕ່າງກໍສາມາດປະກອບສ່ວນໃນການເຮັດພິທີເກັບໄຟງານກີລາໂອແລມປິກຄົນພິການ ສະນັ້ນ ໄຟງານກີລາໂອແລມປິກຄົນພິການ ຈຶ່ງເຮັດພິທີເກັບໄຟຢູ່ຕົວເມືອງ ແລະ ເຂດຊຸມຊົນຕ່າງໆ.
ນອກຈາກຢູ່ສະໂຕກ ແມນເດວີວ ປະເທດອັງກິດ ທີ່ເປັນບ່ອນກຳເນີດງານກີລາໂອແລມປິກຄົນພິການແລ້ວ ພິທີເກັບໄຟອີກ 8 ບ່ອນ ສຳລັບງານກີລາໂອແລມປິກຄົນພິການລະດູໜາວ ປັກກິ່ງ ຈະຈັດພິທີຢູ່ນະຄອນຫຼວງປັກກິ່ງ ເມືອງຢຽນຊິ້ງ ແລະ ນະຄອນຈ່າງເຈ່ຍໂຂ ເຊິ່ງລວມທັງສະຖານທີ່ຊ່ວຍເຫຼືອຄົນພິການ ເຊັ່ນ: ໂຮງຮຽນ ເຂດຊຸມຊົນ ຫໍສະໝຸດ ເປັນຕົ້ນສະຖານທີ່ວັດທະນະທຳປະຫວັດສາດ ເຂດນິຄົມເຕັກນິກວິທະຍາສາດທັນສະໄໝ ແລະ ບ່ອນເຄີຍເຮັດພິທີເກັບໄຟງານກີລາໂອແລມປິກຄົນພິການ ປັກກິ່ງ ປີ 2008 ເຊິ່ງອີງຕາມຂ່າວລາຍງານວ່າ: ຕອນບ່າຍຂອງວັນທີ 2 ມີນາ 2022 ໄຟທີ່ຖືກເກັບຢູ່ 9 ບ່ອນຈະນຳມາລວມກັນຢູ່ສວນສາທາລະນະທ່ຽນຖານ ແລ້ວກາຍເປັນໄຟງານກີລາໂອແລມປິກຄົນພິການລະດູໜາວ ປັກກິ່ງ.
# ຂ່າວ & ພາບ : ສະບາໄພ