ຄຽງຄູ່ກັບງານກີລາໂອແລມປິກຄົນພິການລະດູໜາວ ຢູ່ປັກກິ່ງ ສປ ຈີນ ປີ 2022 ທີ່ຈະໄຂຂຶ້ນເປັນທາງການໃນອີກບໍ່ດົນນີ້ ນັກກີລາຄົນພິການຈາກປະເທດຕ່າງໆທົ່ວໂລກ ຕ່າງກໍມີຄວາມໄຝ່ຝັນຈະແຂ່ງຂັນຢ່າງສຸດຂີດ ທ້າທາຍຂີດຈຳກັດ ເຊິ່ງເປັນການສະແດງໃຫ້ເຫັນຈິດໃຈ ແລະ ສະເໜ່ຂອງກີລາ ຄືດັ່ງບັນເລງເພງສັນລະເສີນຊີວິດທີ່ເຕີບໃຫຍ່ບໍ່ມີວັນສິ້ນສຸດ.
![](https://v2.vientianemai.net/wp-content/uploads/2022/03/received_319990670166350.jpeg)
ເຮືອນພັກນັກກີລາໃນງານກີລາໂອແລມປິກຄົນພິການລະດູໜາວ ເປັນ “ເຮືອນພັກນັກກີລາ” ຢ່າງແທ້ຈິງ ເຮືອນພັກນັກກີລາໃນງານກີລາໂອແລມປິກຄົນພິການລະດູໜາວ ປັກກິ່ງ 2022 ຢູ່ນະຄອນຫຼວງປັກກິ່ງ ເມືອງຢຽນຊີ້ງ ແລະ ນະຄອນຈ່າງເຈ່ຍໂຂ ໄດ້ເປີດນຳໃຊ້ເປັນທາງການໃນວັນທີ 25 ກຸມພາຜ່ານມາ ໂດຍຜູ້ຮັບຜິດຊອບຂອງເຮືອນພັກດັ່ງກ່າວ ກ່າວວ່າ: ເພື່ອບັນລຸເປົ້າໝາຍການຈັດ “ງານກີລາໂອແລມປິກສອງຄັ້ງ ໃຫ້ມີຄວາມໜ້າເບິ່ງໜ້າຊົມຄືກັນ” ແລະ ເຮັດໃຫ້ງານກີລາໂອແລມປິກຄົນພິການລະດູໜາວ ຈັດຂຶ້ນຢ່າງສະດວກ ແລະ ປອດໄພ ຈຶ່ງໄດ້ປ່ຽນເຮືອນພັກນັກກີລາງານກີລາໂອແລມປິກລະດູໜາວ ຄັ້ງທີ 24 ມາເປັນເຮືອນພັກນັກກີລາງານກີລາໂອແລມປິກຄົນພິການລະດູໜາວ ເພື່ອສ້າງ “ເຮືອນພັກນັກກີລາ” ທີ່ມີຄວາມປອດໄພ ອົບອຸ່ນ ແລະ ຢູ່ສະບາຍ ການສ້າງສິ່ງອຳນວຍຄວາມສະດວກຈຶ່ງແມ່ນວຽກງານທີ່ສຳຄັນທີ່ສຸດ ຢູ່ຕາມເຮືອນພັກນັກກີລາສຳລັບງານກີລາໂອແລມປິກຄົນພິການລະດູໜາວປັກກິ່ງ ລະບຽງ ແລະໃນເຮືອນ ປູດ້ວຍກາໂລກັນມື່ນ ມືຈັບປ່ອງຢ້ຽມ ປັກສຽບໄຟຟ້າ ສະວິດ ແລະ ປຸ່ມກົດຮ້ອງຂໍການຊ່ວຍເຫຼືອ ຕ່າງກໍຖືກຕິດຕັ້ງຢູ່ບ່ອນຕ່ຳ ເພື່ອຄວາມສະດວກຂອງຄົນພິການ ຫ້ອງນ້ຳໄດ້ຕິດຕັ້ງອຸປະກອນອະນາໄມ ແລະ ອຸປະກອນອາບນ້ຳທີ່ສະດວກ ໂຕະກິນເຂົ້າໄດ້ເພີ່ມລາຍການອາຫານທີ່ເປັນໜັງສືສຳລັບຄົນຕາບອດ ການຄຸ້ມຄອງຕ່າງໆໄດ້ນຳໃຊ້ລະບົບອັດສະລິຍະ ການບໍລິການມີຄວາມລະອຽດ ຮອບຄອບ ແລະ ການເບິ່ງແຍງດູແລ ແມ່ນອີງຕາມຄວາມຕ້ອງການຂອງນັກກີລາ ເຊິ່ງຈະເຮັດໃຫ້ນັກກີລາຮູ້ສຶກເຖິງ “ຄວາມອົບອຸ່ນປານວ່າຢູ່ໃນເຮືອນຂອງຕົນເອງ”.
![](https://v2.vientianemai.net/wp-content/uploads/2022/03/received_1972601166260372.jpeg)
ເມື່ອເບິ່ງໄລຍະຍາວແລ້ວ ວຽກງານກະກຽມງານກີລາໂອແລມປິກຄົນພິການລະດູໜາວ ປັກກິ່ງ ລວມທັງການສ້າງເຮືອນພັກນັກກີລາ ກໍເປັນການຊຸກຍູ້ການພັດທະນາວຽກງານຄົນພິການ ແລະ ຊຸກຍູ້ການສ້າງສັງຄົມແບບກວມລວມ ໃນໄລຍະຈັດງານກີລາໂອແລມປິກຄົນພິການລະດູໜາວ ປັກກິ່ງ ຄວາມເປັນລະບຽບ ແບບແຜນ ການໃຊ້ງານ ແລະ ຄວາມເປັນລະບົບຂອງສິ່ງອຳນວຍຄວາມສະດວກຕ່າງໆສຳລັບຄົນພິການຢູ່ນະຄອນຫຼວງປັກກິ່ງ ໄດ້ຮັບການຍົກສູງຂຶ້ນຢ່າງເດັ່ນຊັດ ການກໍ່ສ້າງສິ່ງອຳນວຍຄວາມສະດວກດ້ານການກິນ-ດື່ມ ການພັກເຊົາ ແລະ ການປິ່ນປົວພະຍາດຢູ່ນະຄອນຈ່າງເຈ່ຍໂຂ ໄດ້ຮັບຜົນສຳເລັດເບື້ອງຕົ້ນ ສາມາດເວົ້າໄດ້ວ່າ: ການຮັບປະກັນໃຫ້ຄົນພິການໄດ້ຮັບສິດ ແລະ ຜົນປະໂຫຍດທີ່ສະເໝີພາບກັນໃນດ້ານກີລາ ວັດທະນະທຳ ການສຶກສາ ການປະກອບອາຊີບ ແລະ ອື່ນໆ ແລະ ຮ່ວມກັນຊົມໃຊ້ໝາກຜົນຂອງການພັດທະນາເສດຖະກິດ-ສັງຄົມ ຈະກາຍເປັນມໍລະດົກອັນລ້ຳຄ່າຂອງງານກີລາໂອແລມປິກຄົນພິການລະດູໜາວ ປັກກິ່ງ.
![](https://v2.vientianemai.net/wp-content/uploads/2022/03/received_3171806779767775.jpeg)
ທ່ານ ແອນດຣູ ປາສັນ ປະທານຄະນະກຳມະການໂອລິມປິກຄົນພິການສາກົນ ກ່າວວ່າ: ວຽກງານບໍລິການຕ່າງໆສຳລັບງານກີລາໂອແລມປິກຄົນພິການລະດູໜາວ ປັກກິ່ງ ໄດ້ສຸມໃສ່ຄວາມລະອຽດ ຮອບຄອບ ທີ່ເຮັດໃຫ້ນັກກີລາທັງຫຼາຍມີຄວາມຮູ້ສຶກທີ່ດີໃນເວລາເຂົ້າຮ່ວມການແຂ່ງຂັນ ພວກເຮົາມີຄວາມຫວັງເປັນຢ່າງຍິ່ງຕໍ່ງານກີລາໂອແລມປິກຄົນພິການລະດູໜາວ ໃນຄັ້ງນີ້.
ໃນງານກີລາໂອແລມປິກລະດູໜາວ ປັກກິ່ງ ທີ່ດຳເນີນໄປເປັນເວລາ 16 ວັນ ຈີນໄດ້ຈັດງານກີລາທີ່ ງ່າຍດາຍ ປອດໄພ ແລະ ໜ້າເບິ່ງໜ້າຊົມໃຫ້ໂລກ ເຊິ່ງໄດ້ຮັບຄວາມຊົມເຊີຍຢ່າງກວ້າງຂວາງຈາກວົງຄະນາຍາດໂອແລມປິກ ກໍຄືປະຊາຄົມໂລກ ໂດຍອີງຕາມເປົ້າໝາຍຂອງການຈັດ “ງານກີລາໂອແລມປິກທັງ ສອງຄັ້ງ ໃຫ້ໜ້າເບິ່ງໜ້າຊົມຄືກັນ” ຈີນ ມີຄວາມໝັ້ນໃຈວ່າ: ຈະສາມາດຈັດງານກີລາໂອແລມປິກຄົນພິການລະດູໜາວ ໄດ້ຢ່າງໂດດເດັ່ນ ແລະ ໜ້າເບິ່ງໜ້າຊົມເຊັ່ນກັນ.
# ສະບາໄພ