ພິທີສອບເສັງນັກຮຽຍນເກ່ງ ຊັ້ນ ປ5 ມ4 ແລະ ມ7 ຂັ້ນເມືອງສີສັດຕະນາກ ປະຈໍາສົກຮຽນ 2021-2022 ຈັດຂຶ້ນວັນທີ 23 ກຸມພາ 2022 ຢູ່ໂຮງຮຽນມັດທະຍົມຕອນປາຍ ສີສັດຕະນາກ ໂດຍມີທ່ານ ທິນນະກອນ ທອງຄໍາ ຮອງເຈົ້າເມືອງສີສັດຕະນາກ ທ່ານ ບຸນທັນ ແສງມະນີ ຮອງຫົວໜ້າພະແນກສຶກສາທິການ ແລະ ກີລາ ນະຄອນຫຼວງວຽງຈັນ ທ່ານ ຄໍາສິງ ດວງດາລາ ຫົວໜ້າຫ້ອງການສຶກສາທິການ ແລະ ກີລາ ເມືອງສີສັດຕະນາກ ມີບັນດາຄະນະຜູ້ອໍານວຍການ ຄະນະກໍາມະການສອບເສັງ ຄູອາຈານ ແລະ ນ້ອງນັກຮຽນເຂົ້າຮ່ວມ.
![](https://v2.vientianemai.net/wp-content/uploads/2022/02/received_4669877736474206-1024x683.jpeg)
ທ່ານ ຄໍາສິງ ດວງດາລາ ກ່າວວ່າ: ການຈັດສອບເສັງນັກຮຽຍນເກ່ງ ຊັ້ນ ປ5 ມ4 ແລະ ມ7 ຂັ້ນເມືອງສີສັດຕະນາກ ຄັ້ງນີ້ ກໍເພື່ອເປັນການທົດສອບຄວາມຮູ້ ຄວາມສາມາດຂອງນ້ອງນັກຮຽນ ແລະ ການສິດສອນຂອງຄູອາຈານ ດ້ານວິຊາການ ລະຫວ່າງໂຮງຮຽນກັບໂຮງຮຽນ ທັງເປັນການຊອກຫານັກຮຽນທີ່ມີພອນສະຫວັນ ຮຽນດີ-ຮຽນເກ່ງທີ່ສຸດຢູ່ແຕ່ລະໂຮງຮຽນໃນຊັ້ນປະຖົມ ມັດທະຍົມຕອນຕົ້ນ ແລະ ມັດທະຍົມຕອນປາຍ ທັງພາກລັດ ແລະ ເອກະຊົນ ໃນທົ່ວເມືອງ.
![](https://v2.vientianemai.net/wp-content/uploads/2022/02/received_1028893264638984-1024x683.jpeg)
ການສອບເສັງນັກຮຽນເກ່ງປີນີ້ ແມ່ນມີຄວາມຫຍຸ້ງຍາກສັບສົນພໍສົມຄວນ ຍ້ອນສະພາບການແຜ່ລະ ບາດຂອງພະຍາດໂຄວິດ-19 ໄດ້ສົ່ງຜົນກະທົບຕໍ່ການຮຽນ-ການສອນ ເຮັດໃຫ້ການຈັດຕັ້ງການຮຽນ-ການສອນບໍ່ໄດ້ຕາມແຜນທີ່ກໍານົດເວລາ ແນວໃດກໍຕາມ ຂໍຍ້ອງຍໍຊົມເຊີຍມາຍັງຜູ້ອໍານວຍການໂຮງຮຽນທຸກແຫ່ງ ທັງພາກລັດ ແລະ ເອກະຊົນ ທີ່ໄດ້ເອົາໃຈໃສ່ທຸ່ມເທເຫື່ອແຮງ ສະຕິປັນຍາຂອງຕົນເຂົ້າໃນການຄັດເລືອກ ແລະ ຈັດຕັ້ງບໍາລຸງນັກຮຽນເກ່ງ ຈົນໄດ້ຈັດສົ່ງນັກຮຽນຂອງຕົນທີ່ເປັນຕົວແທນຂອງໂຮງຮຽນ ເຂົ້າມາແຂ່ງຂັນສອບເສັງນັກຮຽນເກ່ງໃນຄັ້ງນີ້.
![](https://v2.vientianemai.net/wp-content/uploads/2022/02/received_919776145372987-1024x683.jpeg)
ເຖິງແນວໃດກໍຕາມ ຂໍຮຽກຮ້ອງມາຍັງຄະນະກໍາມະການທຸກຄົນ ຈົ່ງໄດ້ເອົາໃຈໃສ່ໃນການປະຕິບັດໜ້າທີ່ຂອງຕົນ ປະຕິບັດກົດລະບຽບການສອບເສັງຢ່າງເຂັ້ມງວດ ຮຽກຮ້ອງມາຍັງນັກສອບເສັງທຸກຄົນ ຈົ່ງໄດ້ສຸມຈິດໃຈ ເອົາຄວາມຮູ້ທີ່ຕົນໄດ້ຄົ້ນຄວ້າ ໄດ້ເຝິກຊ້ອມ ເອົາອອກມານໍາໃຊ້ຈົນສຸດຄວາມສາມາດ ແລະ ກໍໃຫ້ປະຕິບັດຕາມກົດລະບຽບທີ່ໄດ້ກໍານົດໄວ້ຢ່າງເຂັ້ມງວດ.
ສໍາລັບການສອບເສັງຄັ້ງນີ້ ມີນັກຮຽນສອບເສັງທັງໝົດ ມີ 387 ຄົນ ຍິງ 247 ຄົນ ໃນນັ້ນ ຊັ້ນປະຖົມ ມີ 176 ຄົນ ຍິງ 116 ຄົນ ສອບເສັງ 3 ວິຊາ ຄື: ຄະນິດສາດ ພາສາລາວ-ວັນນະຄະດີ ແລະ ໂລກອ້ອມຕົວ ຊັ້ນ ມ.ຕົ້ນ ມີ 127 ຄົນ ຍິງ 92 ຄົນ ສອບເສັງ 4 ວິຊາ ຄື:ຄະນິດສາດ ຟິຊິກສາດ ເຄມີສາດ ແລະ ພາສາລາວ-ວັນນະຄະດີ ແລະ ຊັ້ນ ມ.ປາຍ ມີ 84 ຄົນ ຍິງ 39 ຄົນ ສອບເສັງ 4 ວິຊາ ຄື:ຄະນິດສາດ ຟິຊິກສາດ ເຄມີສາດ ແລະ ພາສາລາວ-ວັນນະຄະດີ.
# ຂ່າວ-ພາບ : ສີພອນ