ກຸ່ມຜະລິດກະສິກຳອິນຊີ ນະຄອນຫຼວງວຽງຈັນ ແມ່ນໄດ້ຮັບການຊຸກຍູ້ມາແຕ່ປີ 2004 ເປັນຕົ້ນມາ ໂດຍການສົມທົບລະຫວ່າງກົມປູກຝັງ ກະຊວງກະສິກຳ ແລະ ປ່າໄມ້ ຂະແໜງປູກຝັງ ພະແນກກະສິກຳ ແລະ ປ່າໄມ້ ແລະ ຫ້ອງການກະສິກຳ ແລະ ປ່າໄມ້ເມືອງ ໂດຍໄດ້ຮັບການສະໜັບສະໜູນຈາກໂຄງການສົ່ງເສີມກະສິກຳອິນຊີ ແລະ ການຕະຫຼາດ ໄດ້ຈັດຕັ້ງປະຕິບັດຢູ່ 4 ເມືອງເປົ້າໝາຍຂອງນະຄອນຫຼວງວຽງຈັນ ຮູບແບບການສົ່ງເສີມດັ່ງກ່າວ ແມ່ນມີລັກສະນະຄອບຄົວຕົວແບບ ມາຮອດປີ 2006 ຈຶ່ງໄດ້ສັ້ງຕັ້ງເປັນກຸ່ມ ໃນເບື້ອງຕົ້ນປະກອບມີ 15 ຄອບຄົວ ເນື້ອທີ່ 2,5 ເຮັກຕາ ປັດຈຸບັນກຸ່ມຜະລິດກະສິກຳອິນຊີ ນະຄອນຫຼວງວຽງຈັນ ໄດ້ມີບາດກ້າວການຂະຫຍາຍຕົວ ແລະ ນັບມື້ນັບເຂັ້ມແຂງເພີ່ມຂຶ້ນ.
ທ່ານ ທອງໄຊ ເພັດນະຄອນສີ ປະທານກຸ່ມຜະລິດກະສິກຳອິນຊີ ນະຄອນຫຼວງວຽງຈັນ ໄດ້ລາຍງານຕໍ່ກອງປະຊຸມໃຫຍ່ ຄັ້ງທີ VII ຂອງຄະນະພັກຮາກຖານພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ ເມື່ອບໍ່ດົນມານີ້ວ່າ: ກຸ່ມຜະລິດກະສິກຳ ນະຄອນຫຼວງວຽງຈັນ ນັບແຕ່ມື້ສ້າງຕັ້ງໃນປີ 2006 ໄດ້ມີ 5 ບ້ານ 15 ຄອບຄົວ ຄື: ກຸ່ມໂຄກຊາຍ ເມືອງຫາດຊາຍຟອງ ກຸ່ມໂນນແຕ້ ເມືອງໄຊທານີ ກຸ່ມໜອງດາ ເມືອງສີໂຄດຕະບອງ ກຸ່ມຊຽງດາ ແລະ ນາສ້າງໄຜ່ ເມືອງໄຊເສດຖາ ແລະ ໄດ້ເລີ່ມຈັດຕະຫຼາດນັດກະສິກຳອິນຊີ ຢູ່ເດີນທາດຫຼວງເດືອນລະຄັ້ງ ຜົນຜະລິດສ່ວນຫຼາຍແມ່ນບໍ່ໄດ້ຂາຍ ຍັງເປັນລັກສະນະໂຄສະນາ ໃນໄລຍະນັ້ນ ໂຄງການໄດ້ຊ່ວຍຈ່າຍຄ່ານ້ຳມັນລົດ ໃນການຂົ່ນສົ່ງພືດຜັກມາຂາຍ ຈ່າຍອັດຕາການກິນ ພ້ອມທັງສະໜັບສະໜູນໂຕະຕັ່ງ ແລະ ເຕັ້ນ ເພື່ອອຳນວຍຄວາມສະດວກໃຫ້ສະມາຊິກ ພ້ອມນັ້ນ ທາງພາກລັດກໍໄດ້ລະດົມພະນັກງານຊື້ຊ່ວຍ ໂດຍສະເພາະ ພະແນກກະສິກຳ ແລະ ປ່າໄມ້ ກະສິກຳເມືອງ ອົງການປົກຄອງເມືອງ ແລະ ພະນັກງານໂຄງການ.
ສະເພາະໄລຍະ 5 ປີຜ່ານມາ (2015-2019) ກຸ່ມຜະລິດກະສິກຳອິນຊີ ນະຄອນຫຼວງວຽງຈັນ ມີບາດກ້າວຂະຫຍາຍຕົວ ແລະ ມີຄວາມເຂັ້ມແຂງຫຼາຍຂຶ້ນ ເມື່ອທຽບໃສ່ໃນເມື່ອກ່ອນ ມາຮອດປັດຈຸບັນ ປະກອບມີ 12 ກຸ່ມນ້ອຍ ມີສະມາຊິກຊາວສວນທັງໝົດ 303 ຄອບຄົວ ເນື້ອທີ່ 329 ເຮັກຕາ ຜົນຜະລິດ 2.874 ໂຕນຕໍ່ປີ ໃນນັ້ນ ເມືອງຫາດຊາຍຟອງ ມີ 2 ກຸ່ມຄື: ກຸ່ມໂຄກຊາຍ ຫາດຊາຍຟອງເໜືອ 19 ຄອບຄົວ ເນື້ອທີ່ 7,12 ເຮັກຕາ ເມືອງໄຊເສດຖາ 2 ກຸ່ມຄື: ກຸ່ມຊຽງດາ ແລະ ນາສາງໄພ 24 ຄອບຄົວ ເນື້ອທີ່ 14,39 ເຮັກຕາ ເມືອງສີໂຄດຕະບອງ ມີ 2 ກຸ່ມຄື: ກຸ່ມໜອງດາ ແລະ ກຸ່ມຈຳປາ 22 ຄອບຄົວ ເນື້ອທີ່ 21,59 ເຮັກຕາ ເມືອງໄຊທານີ ມີ 4 ກຸ່ມຄື: ໂນນແຕ້ ສົມສະຫວັນ ທົ່ງມັ່ງ ແລະ ກຸ່ມ ປາກຊາບໃໝ່ 120 ຄອບຄົວ ເນື້ອທີ່ 160,2 ເຮັກຕາ ເມືອງນາຊາຍທອງມີກຸ່ມໂພນແກ້ວ 7 ຄອບຄົວ ເນື້ອທີ່ 5,84 ເຮັກຕາ ແລະ ເມືອງປາກງື່ມ ກຸ່ມທ່າຊ້າງ 111 ຄອບຄົວ ເນື້ອທີ່ 120 ເຮັກຕາ ສຳລັບການປູກພືດລະດູຝົນ ໄດ້ມີການຂະຫຍາຍຈຳນວນເຮືອນຮົ່ມ ປູກພືດຜັກຂອງກຸ່ມກະສິກຳອິນຊີ ນະຄອນຫຼວງວຽງຈັນ ໄດ້ທັງໝົດ 400 ກວ່າຫຼັງ ເຊິ່ງການປະກອບອາຊີບກະສິກຳອິນຊີ ໄດ້ພັດທະນາຊີວິດການເປັນຢູ່ຂອງປະຊາຊົນ ກໍຄື ສະມາຊິກກຸ່ມຜະລິດພືດຜັກອິນຊີ ມີລະດັບການດຳລົງຊີວິດທີ່ດີຂຶ້ນ ຖ້າທຽບໃສ່ເມື່ອກ່ອນຈາກຄອບຄົວທຸກຍາກຂາດເຂີນ ກາຍເປັນຄອບຄົວມີຢູ່ມີກິນ ແລະ ມີເງິນສະສົມໄວ້ໃນຍາມຈຳເປັນ ສາມາດຫຼຸດພົ້ນຈາກຄອບຄົວທຸກຍາກ ໄດ້ກາຍເປັນຄອບຄົວມີຢູ່ມີກິນ ມາເຖິງປັດຈຸບັນ ຫຼາຍຄອບຄົວມີລົດໃຫຍ່ ລົດຮຸນໄດ ແກ່ພືດຜັກມາຂາຍຕະຫຼາດອິນຊີຮັບໃຊ້ໃນຄອບຄົວ ແລະ ອື່ນໆ.
ເຖິງຢ່າງໃດກໍຕາມ ຕໍ່ກັບຜົນສຳເລັດ ແລະ ໝາກຜົນທີ່ສະມາຊິກພາຍໃນກຸ່ມໄດ້ຮັບນັ້ນ ແມ່ນຍ້ອນການນຳພາຂອງພັກ ແລະ ລັດ ແຕ່ຂັ້ນເທິງຮອດຂັ້ນພື້ນຖານການຜະລິດ ໄດ້ເອົາໃຈໃສ່ຊີ້ນຳ-ນຳພາ ລົງເລິກກຸ່ມກະສິກຳອິນຊີ ນອກນັ້ນ ກໍຍັງມີໂຄງການລົງທຶນຂອງລັດ ແລະ ສາກົນ ທີ່ໄດ້ໃຫ້ການຊ່ວຍເຫຼືອດ້ານວັດຖຸອຸປະກອນ ເຕັກນິກວິຊາການ ຈາກການເລີ່ມຕົ້ນຈົນຮອດປັດຈຸບັນ.