ຄະນະສະເພາະກິດແກ້ໄຂປາກົດການຫຍໍ້ທໍ້ ຂັ້ນແຂວງ ຂັ້ນເມືອງ ທີ່ປະຈຳຢູ່ບໍ່ຄຳ ຄຳເກີດ-ແສນອຸດົມ ເມືອງຄຳເກີດ ແຂວງບໍລິຄຳໄຊ ໄດ້ສະຫຼຸບຕີລາຄາຄືນ ການຈັດຕັ້ງປະຕິບັດວຽກງານແກ້ໄຂປາກົດການຫຍໍ້ທໍ້ທີ່ເກີດຂຶ້ນ ຢູ່ບໍ່ຄຳ ຄຳເກີດ-ແສນອຸດົມ
ທ່ານ ພັນໂທ ລຳເງິນ ພະບາດໄຊ ຫົວໜ້າກອງບັນຊາການ ປກສ ເມືອງຄຳເກີດ ໄດ້ຜ່ານບົດລາຍງານການຈັດຕັ້ງເຄື່ອນໄຫວ ຂອງຄະນະສະເພາະກິດແກ້ໄຂປາກົດການຫຍໍ້ທໍ້ຢູ່ບໍ່ຄຳ ຄຳເກີດ-ແສນອຸດົມ ແຕ່ວັນທີ 22 ເມສາ ຫາວັນທີ 5 ພຶດສະພາ 2020 ພາຍຫຼັງໄດ້ຮັບການແຕ່ງຕັ້ງຈາກຂັ້ນເທິງ ຄະນະສະເພາະກິດກໍໄດ້ເປີດກອງປະຊຸມປຶກສາຫາລື ແລະ ແບ່ງໜ້າວຽກໃຫ້ແຕ່ລະສະຫາຍຮັບຜິດຊອບ ຫຼັງຈາກນັ້ນກໍ່ໄດ້ປະສານສົມທົບກັບບໍລິສັດ ເພື່ອເອົາຂໍ້ມູນການເສຍຫາຍ ພ້ອມທັງຂຶ້ນບັນຊີຄັດຈ້ອນເປົ້າໝາຍ ລົງກວດກາສະຖານທີ່ເກີດເຫດ ຂຶ້ນບັນຊີກວດກາວັດຖຸສິ່ງຂອງທີ່ຄົນຮ້າຍລັກໄປ ໄດ້ສົມທົບກັບກຳລັງຂອງເຈົ້າໜ້າທີ່ທະຫານ ແລະ ຄະນະຮັກສາຄວາມປອດໄພຂອງບໍລິສັດ ລົງເກັບຂໍ້ມູນຂອງກາງຄະດີລັກຂຸດແຮ່ຄຳ ເຂດຍອດຫ້ວຍນ້ຳໄຫຼພູນ້ຳປານ ໄດ້ຈັກປັ່ນໄຟຟ້າຂະໜາດນ້ອຍ 7 ເຄື່ອງ ອຸປະກອນທີ່ໃຊ້ຂຸດແຮ່ຄຳ 12 ລາຍການ ນຳກຳລັງເຂົ້າກວດຄົ້ນເຄຫາສະຖານຂອງ 10 ເປົ້າໝາຍ ທີ່ຜ່ານການຄັດຈ້ອນພົບເຫັນຂອງກາງປະເພດໂທລະພາບ ຈຳນວນ 12 ໜ່ວຍ ສາຍທອງໄຟຟ້າ ແຜ່ນທອງເຫຼືອງ ອຸປະກອນໄຟຟ້າຈຳນວນ 487 ກິໂລກຣາມ ພ້ອມກັກຜູ້ຖືກຫາໄດ້ 9 ຄົນມາດຳເນີນຄະດີ ນອກນັ້ນຍັງໄດ້ນຳກຳລັງເຂົ້າກວດຄົ້ນເຄຫາສະຖານ ທ້າວ ມາຍຫົງຟູ ອາຍຸ 46 ປີ ຄົນສັນຊາດຫວຽດນາມ ທີ່ພັກເຊົາຢູ່ບ້ານແສນອຸດົມ ເມືອງຄຳເກີດ ແຂວງບໍລິຄຳໄຊ ທີ່ມີເຈດຕະນາຊຸກເຊື່ອງ ຊື້-ຂາຍຊັບທີ່ບໍ່ຖືກຕາມລະບຽບກົດໝາຍ ພົບເຫັນເຄື່ອງຂອງກາງປະເພດສາຍທອງໄຟຟ້າ ແຜ່ນທອງ ແລະ ອຸປະກອນຮັບໃຊ້ນ້ຳໜັກລວມ 1.573 ກິໂລກຣາມ ສົມທົບກັບກຳລັງທະຫານແຂວງເຂົ້າກັກຕົວເປົ້າໝາຍລັກຂຸດແຮ່ຄຳ ເຂດສຳປະທານຂອງບໍລິສັດ ສາມາດກັກເປົ້າໝາຍໄດ້ 2 ຄົນ ພ້ອມຂອງກາງແຮ່ທາດ 5 ກິໂລກຣາມ ຜ່ານການຈັດຕັ້ງປະຕິບັດຕົວຈິງກັກ ຕົວຜູ້ຖືກຫາໄດ້ 12 ຄົນ ຄົນສັນຊາດຫວຽດນາມ 1 ຄົນ ໃນນັ້ນຂໍ້ຫາລັກຊັບພົນລະເມືອງ 8 ຄົນ ຂໍ້ຫາຊຸກເຊື່ອງ ຊື້-ຂາຍຊັບບໍ່ຖືກຕ້ອງ 2 ຄົນ ຂໍ້ຫາລັກຂຸດແຮ່ຄຳ 2 ຄົນ ລວມຂອງກາງທີ່ເກັບກູ້ໄດ້ມີຄື: ໂທລະພາບ 12 ໜ່ວຍ ໜ້າຈໍຄອມພິວເຕີ 1 ໜ່ວຍ ສາຍໄຟຟ້າ ອຸປະກອນໄຟຟ້າ ສາຍທອງແດງ ແຜ່ນທອງເຫຼືອງ ຈຳນວນ 2.062 ກິໂລກຼາມ ແຮ່ຄຳ 92 ກິໂລກຼາມ ມາສືບສວນ-ສອບສວນຕາມລະບຽບກົດໝາຍ.