ທ່ານ ວົງພະທິບ ວິຣະວົງສາ ຜູ້ຈັດການທີມ ເຄວສ ຢູໄນເຕັດ ລາຍງານໃຫ້ຮູ້ເທື່ຶບໍ່ດົນມານີ້ ວ່າ: ເຄວສ ຢູໄນເຕັດ ມີຄວາມພ້ອມໃນການແຂ່ງຂັນບານເຕະ ຄອມມານໂດ ລາວລີກ 2 ປະຈຳປີ 2020 ໂດຍໄດ້ຄັດເລືອກນັກກີລາ ແລະ ເຝິກຊ້ອມປົກກະຕິ ແຕ່ເນື່ອງຈາກພະຍາດ COVID-19 ກຳລັງລະ ບາດ ໄດ້ຢຸດເຝິກຊ້ອມ ແລະ ໄດ້ໃຫ້ນັກກີລາກັບບ້ານ ເພື່ອພັກຜ່ອນເກັບຕົວ ພ້ອມທັງໄດ້ແນະນຳໃຫ້ເຝິກຊ້ອມ ແລະ ອອກກຳລັງກາຍເບົາໆ ເພື່ອກຽມພ້ອມດ້ານຮ່າງກາຍ ແລະ ຈິດໃຈ.
ສຳລັບປີນີ້ ເຄວສ ຢູໄນເຕັດ ຈະໃຊ້ຄູເຝິກໃໝ່ ທີ່ມີຄວາມສາມາດສູງ ແລະ ຫວັງຈະເຮັດໃຫ້ຜົນ ງານໃຫ້ດີທີ່ສຸດ ນອກນີ້ຍັງໄດ້ເສີມນັກກີລາຈຳນວນຫຼາຍ ສ່ວນນັກເຕະຕ່າງປະເທດ ແມ່ນຍັງຕົກລົງກັນບໍ່ໄດ້ ເນື່ອງຈາກມີຜົນກະທົບຈາກພະຍາດ COVID-19 ສຳລັບຜູ້ສະໜັບສະໜູນປະກອບມີວິທະຍາ ໄລ ເຄວສ ວິທະຍາໄລ ທິບວະລີ ແລະ ອົງການ one two one.
ສະໂມສອນ ເຄວສ ຢູໄນເຕັດ ສ້າງຕັ້ງຂຶ້ນປີ 2019 ໂດຍມີທີ່ຕັ້ງຢູ່ບ້ານສີວິໄລ ເມືອງໄຊທານີ ນະຄອນຫຼວງວຽງຈັນ ໄດ້ສົ່ງທີມເຂົ້າຮ່ວມການແຂ່ງຂັນ ຄອມມານໂດ ສາຍ ກ ປະຈຳປີ 2019 ໄດ້ອັນດັບ 10 ລົງແຂ່ງຂັນ 22 ນັດ ຊະນະ 5 ສະເໝີ 3 ເສຍ 15 ມີ 10 ຄະແນນ.
ການແຂ່ງຂັນບານເຕະ ຄອມມານໂດ ລາວລີກ 2 ປີ 2020 ມີ 12 ທີມເຂົ້າຮ່ວມ ຄື: ເຄວສ ຢູໄນເຕັດ ທຣີນີຕີ ເອັຟຊີ ແຄນລາວ ຢູໄນເຕັດ ເອັສອີຊີ ຢູໄນເຕັດ ເຄພີເອັສ ເອັຟຊີ ລາວ ທ໋ອບ ເອັຟຊີ ນະຄອນຫຼວງ ເອັຟຊີ ບີແຄນ ຢູໄນເຕັດ ເຮັສບີທີ 941 ເອັຟຊີ ກອງທັບ ເອັຟຊີ ວຽງຈັນ ຢູໄນເຕັດ ແລະ ປະສານໃຈ ເອັຟຊີ ໂດຍໄດ້ເລື່ອນວັນເປີດການແຂ່ງຂັນອອກໄປຈົນກວ່າສະພາບການລະບາດຂອງພະຍາດ COVID-19 ຈະຢຸດຕິ.