ບໍລິສັດທາງລົດໄຟ ລາວ-ຈີນ ຈຳກັດ ອອກແຈ້ງການໃຫ້ຮູ້ວ່າ: ນັບແຕ່ວັນທີ 14 ກຸມພາ 2022 ເປັນຕົ້ນໄປ ຈະໄດ້ເພີ່ມຖ້ຽວລົດໄຟ ໄປ-ກັບ ຈາກນະຄອນຫຼວງວຽງຈັນ-ນະຄອນຫຼວງພະບາງ ແຕ່ວັນຈັນ-ວັນພະຫັດ ໂດຍທຸກວັນຈະມີ 2 ຖ້ຽວ ຄື: ຈາກນະຄອນຫຼວງວຽງຈັນ-ບໍ່ເຕັນ ແມ່ນ C81/82 ແລະ ນະຄອນຫຼວງວຽງຈັນ-ນະຄອນຫຼວງພະບາງ C83/84 ເພື່ອຕອບສະໜອງຄວາມຕ້ອງການໃນການເດີນທາງຂອງຜູ້ໂດຍສານ ຂະນະດຽວກັນ ບໍລິສັດທາງລົດໄຟ ລາວ-ຈີນ ຈຳກັດ ຍັງຈະເປີດຖ້ຽວລົດໄຟດ່ວນ ແລະ ຖ້ຽວລົດໄຟໂດຍສານທຳມະດາ ຕື່ມອີກ.
ນັບແຕ່ໄດ້ເປີດນຳໃຊ້ທາງລົດໄຟ ລາວ-ຈີນ ໄລຍະ 2 ເດືອນກວ່າເປັນຕົ້ນມາ ບໍລິສັດທາງລົດໄຟ ລາວ-ຈີນ ຈຳກັດ ໄດ້ເພີ່ມຖ້ຽວລົດໄຟຫຼາຍຄັ້ງ ເພື່ອຕອບສະໜອງຄວາມຕ້ອງການຂອງຜູ້ໂດຍສານທີ່ນັບມື້ເພີ່ມຂຶ້ນ ພາຍຫຼັງສຳຜັດກັບຄວາມປອດໄພ ຄວາມດວກສະບາຍ ແລະ ຄວາມວ່ອງໄວຂອງລົດໄຟຄວາມໄວສູງແລ້ວ ປະຊາຊົນລາວຈໍານວນຫຼວງຫຼາຍກໍໄດ້ເລືອກມາຂີ່ລົດໄຟຄວາມໄວສູງນັບມື້ເພີ່ມຂຶ້ນ ແລະ ມາຮອດປັດຈຸບັນ ຈຳນວນຜູ້ໂດຍສານກໍຍັງເພີ່ມຂຶ້ນເລື້ອຍໆ ເຮັດໃຫ້ປີ້ລົດໄຟທີ່ຈະອອກເດີນທາງໃນມື້ຖັດໄປ ສ່ວນຫຼາຍແມ່ນຈະຂາຍໝົດແຕ່ຕອນເຊົ້າ.
ດ້ານການຂົນສົ່ງສິນຄ້າ ນັບແຕ່ເປີດຖ້ຽວລົດໄຟ “ຂະບວນດ່ວນແມ່ນ້ຳລ້ານຊ້າງ-ແມ່ນ້ຳຂອງ” ເປັນຕົ້ນມາ ຍ້ອນວ່າລົດໄຟຖ້ຽວນີ້ໄດ້ຜ່ານດ່ານໄວ ແລ່ນໄວ ສາມາດກຳນົດເວລາໄປເຖິງສະຖານີປາຍທາງໄດ້ຢ່າງກົງເວລາ ແລະ ການບໍລິການມີຄຸນນະພາບສູງ ຈຶ່ງໄດ້ຮັບຄວາມນິຍົມຊົມຊອບຈາກລູກຄ້າເປັນຈຳນວນຫຼວງຫຼາຍ ປະເພດສິນຄ້າກໍນັບມື້ເພີ່ມຂຶ້ນ ໂດຍສິນຄ້າຈາກປະເທດຈີນໄດ້ຂົນສົ່ງມາເຕົ້າໂຮມໄວ້ຢູ່ນະຄອນຄຸນໝິງ ແຂວງຢຸນນານ ແລ້ວຖືກສົ່ງຕໍ່ໄປ 10 ກວ່າປະເທດ ເປັນຕົ້ນ ມາເລເຊຍ ສິງກະໂປ ໄທ ແລະ ອື່ນໆ ໂດຍຜ່ານທາງລົດໄຟ ລາວ-ຈີນ ສ່ວນຜະລິດຕະພັນກະສິກຳທີ່ມີຄຸນນະພາບດີຂອງປະເທດລາວ ກໍສາມາດສົ່ງອອກໄປສູ່ປະເທດຈີນ ທີ່ເປັນຕະຫຼາດບໍລິໂພກໃຫຍ່ທີ່ສຸດໃນໂລກ ໂດຍຜ່ານທາງລົດໄຟສາຍນີ້ເຊັ່ນກັນ.
ມາຮອດວັນທີ 5 ກຸມພາ 2022 ທາງລົດໄຟ ລາວ-ຈີນ ຢູ່ປະເທດລາວ ໄດ້ໃຫ້ບໍລິການຖ້ຽວລົດໄຟໂດຍສານໄປ-ກັບ 116 ຖ້ຽວ ຂົນສົ່ງຜູ້ໂດຍສານໄດ້ 108.770 ຄົນ ສະເລ່ຍແລ້ວ ຂົນສົ່ງຜູ້ໂດຍສານໄດ້ 1.699 ຄົນຕໍ່ວັນ ໃນນີ້ສູງສຸດມີເຖິງ 2.804 ຄົນຕໍ່ວັນ ແລະ ໃຫ້ບໍລິການຖ້ຽວລົດໄຟຂົນສົ່ງສິນຄ້າ ໄປ-ກັບ 124,5 ຖ້ຽວ ລວມຂົນສົ່ງສິນຄ້າທັງໝົດ 133.191 ໂຕນ ສະເລ່ຍແລ້ວ ຂົນສົ່ງສິນຄ້າໄດ້ 2.081 ໂຕນຕໍ່ວັນ ຄຽງຄູ່ກັບເວລາຜ່ານໄປ ຄວາມສາມາດບົ່ມຊ້ອນຂອງທາງລົດໄຟ ລາວ-ຈີນ ນັບມື້ນັບຖືກຂຸດຄົ້ນອອກມາ ແລະ ປາກົດໃຫ້ເຫັນຢ່າງຈະແຈ້ງ ໂດຍສະເພາະໄດ້ນຳເອົາໂອກາດການພັດທະນາມາໃຫ້ປະເທດລາວ ທັງເຮັດໃຫ້ລັດຖະບານລາວໃຫ້ຄວາມສົນໃຈຢ່າງສູງຕໍ່ທາງລົດໄຟ ລາວ-ຈີນ.
ວັນທີ 7 ແລະ ວັນທີ 9 ກຸມພາ 2022 ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດ ສປປ ລາວ ພ້ອມດ້ວຍຄະນະ ໄດ້ຂີ່ລົດໄຟລາວ-ຈີນ 2 ເທື່ອ ແລະ ທ່ານກ່າວວ່າ: ນັບແຕ່ເປີດນຳໃຊ້ທາງລົດໄຟ ລາວ-ຈີນ ເປັນຕົ້ນມາ ປະຊາຊົນລາວຮູ້ສຶກພາກພູມໃຈທີ່ສຸດ ຫວັງວ່າປະຊາຊົນລາວທຸກຄົນຈະຫາໂອກາດໄປຂີ່ລົດໄຟຄວາມໄວສູງ ລາວ-ຈີນ ເພື່ອຮັບຮູ້ ແລະ ເຂົ້າໃຈຄວາມໝາຍຄວາມສຳຄັນຂອງຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຢ່າງແທ້ຈິງ ພ້ອມນີ້ ທ່ານຍັງໄດ້ພັນລະນາກ່ຽວກັບທາງລົດໄຟສາຍນີ້ວ່າ: “ມີຊ່ອງທາງແລ້ວ ກໍຈະມີໂອກາດແຫ່ງການພັດທະນາ” ເຊິ່ງເປັນການຢືນຢັນຢ່າງເຕັມສ່ວນເຖິງບົດບາດສຳຄັນຂອງທາງລົດໄຟ ລາວ-ຈີນ ໃນການຊຸກຍູ້ການພັດທະນາປະເທດລາວ.
ສຳລັບປະຊາຊົນລາວ ແລ້ວ ທາງລົດໄຟ ລາວ-ຈີນ ບໍ່ພຽງແຕ່ແມ່ນທາງເລືອກໃນການອອກເດີນທາງທີ່ສະດວກສະບາຍເທົ່ານັ້ນ ຫາກຍັງແມ່ນຄວາມຫວັງຂອງລາວ ທີ່ຈະເຊື່ອມຕໍ່ກັບບັນດາປະເທດໃນພາກພື້ນອາຊີຕາເວັນອອກສຽງໃຕ້ ແລະ ໄດ້ເຮັດໃຫ້ຍຸດທະສາດຫັນປະເທດທີ່ບໍ່ມີທາງອອກສູ່ທະເລ ກາຍເປັນປະເທດເຊື່ອມໂຍງ-ເຊື່ອມຈອດກັບພາກພື້ນປາກົດຜົນເປັນຈິງ ທັງຈະບັນລຸຄວາມໃຝ່ຝັນຂອງປະຊາຊົນລາວ ທີ່ມຸ່ງຫວັງກ້າວໄປສູ່ຊີວິດທີ່ສຸກສຳລານອີກດ້ວຍ.
# ຂ່າວ – ພາບ : ສະບາໄພ