ຄະນະບໍລິຫານງານຊາວໜຸ່ມບັນດາກົມ ຂອງກະຊວງກະສິກຳ ແລະ ປ່າໄມ້ ນຳໂດຍທ່ານ ຂັນທະນູ ລໍສະຫວັນ ຮອງເລຂາຊາວໜຸ່ມຮາກຖານກົມສົ່ງເສີມກະສິກຳ ຢ້ຽມຢາມກຸ່ມລ້ຽງໝູລາດຊອດໝູປ່າ ຢູ່ບ້ານໄຊ ເມືອງໄຊທານີ ນະຄອນຫຼວງວຽງຈັນ ວັນທີ 16 ກຸມພາ 2022 ໂດຍໄດ້ຮັບການຕ້ອນຮັບຈາກທ່ານ ຄຳພຸດ ຂຸນສຳລານ ຫົວໜ້າກຸ່ມລ້ຽງໝູລາດຊອດໝູປ່າ ພ້ອມດ້ວຍຄະນະ ມີພາກສ່ວນກ່ຽວຂ້ອງເຂົ້າຮ່ວມ.
![](https://v2.vientianemai.net/wp-content/uploads/2022/02/272688339_493704488809293_438727529838639531_n-1024x683.jpg)
ທ່ານ ຄຳພຸດ ຂຸນສຳລານ ໄດ້ລາຍງານວ່າ: ກຸ່ມລ້ຽງໝູລາດຊອດໝູປ່າບ້ານໄຊ ສ້າງຕັ້ງຂຶ້ນວັນທີ 15 ທັນວາ 2021 ມີສະມາຊິກ 8 ທ່ານ ຍິງ 1 ທ່ານ ປະກອບມີຫົວໜ້າກຸ່ມ 1 ທ່ານ ຮອງຫົວໜ້າກຸ່ມ 1 ທ່ານ ປະທານກວດກາ 1 ທ່ານ ປັດຈຸບັນ ມີໝູແມ່ພັນ 20 ໂຕ ໝູພໍ່ພັນ 7 ໂຕ ໝູກາງ 4 ໂຕ ໝູນ້ອຍ 114 ໂຕ ຂໍ້ສະດວກໃນການລ້ຽງ ແມ່ນໄດ້ຮັບການຊີ້ນຳຈາກຫ້ອງການກະສິກຳ ແລະ ປ່າໄມ້ເມືອງໄຊທານີ ແລະ ໄດ້ຮັບການໃກ້ຊິດຕິດແທດຈາກອົງການປົກຄອງບ້ານ ສະຖານທີ່ລ້ຽງແມ່ນໄກຈາກເຮືອນປະຊາຊົນ ບໍ່ສົ່ງຜົນກະທົບຕໍ່ສິ່ງແວດລ້ອມ ໝູປະເພດນີ້ລ້ຽງງ່າຍ ອາຫານແມ່ນເນັ້ນຂີ້ເບຍປະສົມຜັກທຳມະຊາດ ເປັນສ່ວນຫຼາຍ ສໍາລັບຂໍ້ຫຍຸ້ງຍາກແມ່ນຍັງຂາດປະສົບການ ຂາດແຫຼ່ງທຶນ ແລະ ຂາດອຸປະກອນຈຳນວນ ໜຶ່ງ ເພື່ອຮັບໃຊ້ການລ້ຽງ ສ່ວນການຕະຫຼາດແມ່ນຂາຍໝູນ້ອຍໃຫ້ປະຊາຊົນທົ່ວໄປ ເພື່ອໄປລ້ຽງຕໍ່ ຍັງບໍ່ ພຽງພໍທີ່ຈະສົ່ງຕະຫຼາດທົ່ວໄປ
![](https://v2.vientianemai.net/wp-content/uploads/2022/02/273499176_486766489466247_221160278239745404_n-1024x683.jpg)
ໂອກາດນີ້ ຄະນະນຳຊາວໜຸ່ມບັນດາກົມ ກໍໄດ້ແນະນຳຫຼັກວິຊາການດ້ານການລ້ຽງໝູ ເປັນຕົ້ນການ ຮັກສາສຸຂະພາບໝູ ສ່ວນປະສົມອາຫານໝູ ແລະ ວິທີປະສົມພໍ່ພັນ-ແມ່ພັນໝູ ລວມທັງການວາງແຜນ ການໃຊ້ຈ່າຍ ເພື່ອເຮັດໃຫ້ກຸ່ມລ້ຽງໝູດັ່ງກ່າວ ມີການເຕີບໃຫຍ່ຂະຫຍາຍໂຕຂຶ້ນເລື້ອຍໆ.
![](https://v2.vientianemai.net/wp-content/uploads/2022/02/272890404_732488391065616_2210403333791015995_n-1024x683.jpg)