31 ວັນຕໍ່ເນື່ອງ ທີ່ແພດໝໍບໍ່ພົບຜູ້ຕິດເຊື້ອພະຍາດອັກເສບປອດ ທີ່ເກີດຈາກເຊື້ອຈຸລະໂຣກສາຍພັນ ໃໝ່ (COVID-19) ຢູ່ ສປປ ລາວ ຕາມການຖະແຫຼງຂ່າວຂອງຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂພະຍາດ COVID-19 ວັນທີ 13 ພຶດສະພາ 2020 ຢູ່ສູນປະຕິບັດງານຄະນະສະເພາະເພື່ອປ້ອງກັນ ຄວບຄຸມ ແລະ ແກ້ໄຂພະຍາດ COVID-19 ກະຊວງສາທາລະນະສຸກ ຕົວເລກສະສົມຜູ້ຕິດເຊື້ອຍັງຢູ່ທີ່ 19 ຄົນ ແລະ ປິ່ນປົວຫາຍດີກັບຄືນບ້ານ ເພື່ອຕິດຕາມອາການອີກ 1 ຄົນ ລວມເປັນ 14 ຄົນ.
ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈຳການຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂພະຍາດ COVID-19 ກ່າວວ່າ: ວັນທີ 12 ພຶດສະພາ 2020 ໄດ້ເກັບຕົວຢ່າງມາກວດ 101 ຄົນ ໃນນີ້ມີກໍລະນີສົງໄສ 2 ຄົນ ຜູ້ຕິດເຊື້ອທີ່ຄົບຮອດ 14 ວັນ 2 ຄົນ (ນ້ຳເບີ 14 ແລະ 12) ແຮງງານລາວທີ່ກັບມາຈາກປະເທດໄທ 65 ຄົນ ແຮງງານໄທທີ່ເຂົ້າມາລາວ 2 ຄົນ (ຢູ່ແຂວງໄຊຍະບູລີ) ແລະ ບຸກຄົນທົ່ວໄປບໍ່ມີອາການສະແດງ 30 ຄົນ.
ສຳລັບແຮງງານລາວທີ່ກັບມາຈາກປະເທດໄທ 65 ຄົນ ໃນນີ້ແຂວງວຽງຈັນ 25 ຄົນ ຈຳປາສັກ 16 ຄົນ ສະຫວັນນະເຂດ 11 ຄົນ ຄຳມ່ວນ 10 ຄົນ ບໍລິຄຳໄຊ 02 ຄົນ ວຽງຈັນ 02 ຄົນ ແລະ ແຂວງສາ ລະວັນ 1 ຄົນ ຜົນກວດທັງໝົດຂອງແຮງງານລາວ ແຮງງານໄທທີ່ເຂົ້າມາ ແລະ ກໍລະນີສົງໄສຂອງວັນທີ 12 ພຶດສະພາ 2020 ແມ່ນບໍ່ພົບເຊື້ອ (ໝາຍຄວາມວ່າບໍ່ມີຜູ້ຕິດເຊື້ອໃໝ່) ສັງລວມການກວດວິເຄາະແຕ່ເດືອນມັງກອນ-ວັນທີ 12 ພຶດສະພາ 2020 ໄດ້ເກັບຕົວຢ່າງມາກວດ 3.975 ຕົວຢ່າງ ກວດພົບເຊື້ອສະສົມ 19 ຄົນ (31 ມື້ແລ້ວທີ່ບໍ່ພົບຜູ້ຕິດເຊື້ອໃໝ່) ແລະ ມີຜູ້ປິ່ນປົວຫາຍດີອອກໂຮງໝໍວັນນີ້ອີກ 1 ຄົນ ຍັງຕິດຕາມຢູ່ໂຮງໝໍ 5 ຄົນ.
ປັດຈຸບັນ ທົ່ວປະເທດມີສູນຈຳກັດບໍລິເວນ 60 ສູນ ມີຜູ້ຈຳກັດບໍລິເວນຢູ່ສູນ 1.919 ຄົນ ໄດ້ເກັບຕົວຢ່າງມາກວດວິເຄາະ ທັງໝົດນີ້ບໍ່ມີຜູ້ຕິດເຊື້ອ.
# ຂ່າວ & ພາບ : ຊິລິການດາ